Baş redaktordan

Hörmətli oxucular!

Vətənsevərlər, Qarabağsevərlər!

Çox çətinlikdən sonra, hələ də çətinliklər içərsində qalmaqla biz də qəzetimizi nəşr etmək qərarına gəldik. Qəzetimizi sizlərin mühakiməsinə veririk. İstərdik ki, "Azad Qarabağ" sizlərin hər birinin qəzeti olsun.

Bizi, Azərbaycanın ərazi bütövlüyü, Qarabağ, Zəngəzur, Göyçə, İrəvan uğrunda yorulmadan mübarizə aparan qara fəhlələrin məqsədi, məqamı, istəyi hamımıza məlumdur. İşğalçı ermənilər torpaqlarımızdan rədd olub getməlidirlər. Torpağımızın taleyi döyüş meydanında Azərbaycan əsgərinin silahı və rəşadəti ilə həll olunmalıdır. Cəmiyyətimizin hər layı, təbəqəsi müharibə qanunları ilə yaşamalıdır. Heç bir səviyyədə işğalçı Ermənistan nümayəndələri ilə danışıqlar, müzakirələr aparılmamalıdır. Hər bir vətəndaş torpağımız uğrunda savaşa hazır olmalıdır.

"Azad Qarabağ" iqtidarın, müxalifətin, qrupun yox, millətin qəzetidir!

"Azad Qarabağ" erməni işğalçılarına qarşı mübarizəyə, müqəddəs savaşa səfərbərlik qəzetidir!

"Azad Qarabağ" öz millətinə. dininə, adət-ənənələrinə bağlı olan vətənpərvərlik qəzetidi!

Hörmətli oxucular!

"Azad Qarabağ" hamımızın yazacağımız və hamımızın oxuyacağımız qəzet olacaqdır. Gəlin hamımız bir yerdə olaq. Bu gun hamımızın, bütün vətənsevərlərin bir yerdə olmağına ehtiyacımız və birsözümüz var:

Ya Qarabağ, ya ölüm!

Mövqe

	İlham Əliyev, Azərbaycan Respublikasının Prezidenti: Gələcək illərdə Azərbaycanın ərazi bütövlüyü məsələsində heç bir güzəşt olmayacaq. Heç bir qərar qəbul edilməyəcək ki, nə bu gün, nə sabah, nə də yüz ildən sonra imkan yaratsın ki, Dağlıq Qarabağ Azərbaycandan ayrılsın.		İsa Qəmbər, Müsavat partiyasının başqanı: Bir narahatçılıq doğuran məqam var - hakimiyyət Dağlıq Qarabağda referendum keçirilməsinə razılıq veribmi? Əgər hakimiyyət buna razılaşıbsa, bu o deməkdir ki, Qarabağın verlməsinə razılaşıb. Onda hakimiyyət buna görə bütün xalqın qarşısında cavab verməlidir. Bu danışıqlar prosesini çox diqqətlə izləyirik və Qarabağın verilməsi təhlükəsi olsa, sakit dayanmaq fikirində deyilik.
	Sabina Frayzer, Beynəlxalq Böhran Qrupunun Cənubi Qafqaz üzrə nümayəndəsi: Biz açıq şəkildə Azərbaycanın böyük hissəsinin işğal altında olduğunu bəyan etmişik... Diplomatik danışıqlar heç bir nəticə verməsə, Azərbaycan müharibə yolunu seçə bilər...		Alen Deletroz, Beynəlxalq Böhran Qrupunun vitse-prezidenti: Dağlıq Qarabağda gələcək referendum Dağlıq Qarabağın müstəqilliyinin elan olunması ilə nəticələnəcək, və bütün tərəflər əvvəlcədən bu nəticələri tanıyacaqlarını bildirməlidirlər.
	Terri Devis, Avropa Şurasının baş katibi: 6 həftədən sonra Dağlıq Qarabağ münaqişəsinin həllində yeniliklər olacaq.		Vəfa Quluzadə, müsətəqil politoloq: ATƏT-in Minsk qrupu həmsədrləri Dağlıq Qarabağı və Laçını ermənilərə verməyimizi istəyirlər. Əgər həmsədrlər nə istədiklərini açıq desələr, Azərbaycan xalqı onları daş-qalaq edər.

Rambuye qəsrində qurulmuş tələ

Sabah Paris yaxınlığındakı Rambuye qəsrində yüksək səviyyədə keçiriləcək görüş diqqətlə izlənilir. Müxtəlif proqnozlar verilir. Bəzi mülahizələrə görə, bu görüş Qarabağ məsələsinin həlində dönüş nöqtəsi ola bilər. Bu fikirlə razılaşmaq olar. Amma dönüş hansı istiqamətdə olacaqdır? Dəfələrlə məkrli planların qurulduğu bu qəsrdə Azərbaycanı hansı swrprizlər gözləyir? Beynəlxalq qurumlar, birinci növbədə Minsk qrupu həmsədrləri bu görüşdə ciddi nəticələrin əldə olunacağı ilə bağlı bəyanatlar verirlər. Ermənistan tərəfi Rambuye görüşünə yüksək əhval-ruhiyyə ilə getdiyini gizlətmir. Azərbaycan rəsmiləri istər-istəməz, nə qədər gizlətməyə çalışsalar da, güzəştə getməli olduqlarını faktiki olaraq etiraf edirlər. Xarici işlər naziri Elmar Məmmədyarov uzun müddət sülhməramlı qüvvələrin münaqişə zonasına gətirilməsinə dair danışıqların aparılmadığını bəyan etsə də, sonda bu məsələ ilə bağlı güzəştə getməli olduqlarını bildirdi. Buradan da məntiqlə düşünsək uyğun nəticənin çıxarılması çətin deyil. Sülhməramlıların gətirilməsinə razılıq verilirsə, bu tezi və ya geci referendumun keçirilməsini şərtləndirir. Fransa prezidentinin bu görüşün keçirilməsi üçün ev yiyəsi təşəbbüsü ilə çıxış etməsi də təsadüfi deyil. Fransa mətbuatında belə fikirlər səslənir ki, Şirak hakimiyyət olimpini tərk etməmişdən əvvəl öz xalqı və dost Ermənistan qarşısında əsas xidmətlərindən birini göstərməyə çalışır, tarixə Qarabağ münaqişəsinin həllinə nail olmuş prezident kimi düşmək istəyir. H.Əliyev dönəmindən başlayaraq Azərbaycan və Fransa hakimiyyətlərinin “xüsusi münasibətləri” də heç kəs üçün sirr deyil.

Çoxsaylı mülahizələrdən, rəsmi bəyanatlardan geniş iqtibaslar gətirmədən görüş öncəsi situasiya və hadisələrin mümkün inkişaf ssenarilərini diqqətə çəkək. ABŞ və Rusiya münaqişənin nəhayət ki, həllində maraqlı olduqlarını gizlətmirlər. Rusiya, bir tərəfdən, Kosovo üçün nəzərdə tutulan modelin universallığını, bu və digər münaqişələrə də tətbiq olunmasının zəruriliyini vurğulayır. Rusiya Kosovo modelinin  Dağlıq Qarabağdan daha çox, Dnestryanı, Abxaziya və Cənubi Osetiya ilə bağlı tətbiq olunmasında maraqlıdır. Rusiya Dağlıq Qarabağla bağlı ikili mövqedən çıxış etməklə, hər iki variantda, yəni həm həll, həm də hələlik qeyri-həll variantlarında öz dividentlərini götürməyə çalışır. Rusiya birinci halda Azərbaycana hərbi bazalarını qaytarmaqla, ikincidə isə hər iki münaqişə tərəfinə təsir vasitəsini əldə saxlamaqla maraqlarını təmin edir. ABŞ münaqişənin nizama salınmasında Bakı-Ceyhan neft kəməri və İran məsələsi ilə bağlı maraqlı görünür, lakin Kosovo variantının tətbiqindən qaçır. Yenə də bu modelin tətbiqi ABŞ-a daha çox Dağlıq Qarabağla deyil, Abxaziya, Dnestryanı və Osetiyanın taleyi ilə bağlı sərf eləmir. Ümumiyyətlə, ABŞ Dağlıq Qarabağa fərqli münasibət göstərir, dünyanın 30-dan artıq bu tipli münaqişə zonasından yalnız bu rejimə dövlət səviyyəsində yardım göstərir. ABŞ Ermənistana Rusiyadan daha çox təsirə malik olsaydı, yəqin ki, Dağlıq Qarabağ münaqişəsinin Kosovo modeli ilə həllinə uyğun nizamasalınmasına daha ciddi səy göstərərdi.

ABŞ və Rusiyanın fərqli və eyni zamanda oxşar maraqlarının Rambuye görüşü ərəfəsində uzlaşdırılması meyli hiss olunur. Bu razılaşma Azərbaycan üçün incəliklə qurulmuş tələni xatırladır. Fransanın ev sahibliyi ilə qurulacaq, böyük ehtimalla əsas ssenariyə görə, Azərbaycanı formal ərazi bütövlüyünün saxlanılması şərti ilə Dağlıq Qarabağın faktiki müstəqilliyinə razı salmağa cəhd ediləcəkdir. Dəfələrlə deyildiyi kimi, 3 əsas məsələ müzakirə olunur: Dağlıq Qarabağın inzibati sərhədlərindən kənarda bir neçə rayonun boşaldılması və məcburi köçkünlərin geri qaytarılması, Dağlıq Qarabağın statusu və referendum, sülhməramlı qüvvələrin yerləşdirilməsi. Bu ssenariyə görə, bir neçə rayonun geri qayıtarılması Azərbaycan hakimiyyətinə öz ölkəsində uyğun təbliqatın aparılması, digər məsələlərlə bağlı gedilən güzəştlərin ört-basdır edilməsi üçün imkan verəcəkdir. Bunun müqabilində Azərbaycan 10-15 ildən sonra statusla bağlı referendumun keçirilməsinə razılaşır.Və formal olaraq bu mərhələdə məsələ  Azərbaycanın ərazi bütövlüyü çərçivəsində həll olunur. Beynəlxalq təşkilatlar bu ssenari ilə Dağlıq Qarabağın Azərbaycan nəzarətindən çıxarılmasını tədricən rəsmiləşdirməyə ümid edirlər. Sülhməramlı qüvvələr də regiona yerləşdirildikdən sonra bu “tədrici rəsimləşdirmə” planının həyata keçirilməsində elə bir problem qalmayacaqdır. Azərbaycan cəmiyyəti də tədricən Qarabağ itgisinə uyğunlaşdırılacaqdır. Bu ssenarinin müəyyən variantlarda, məsələn bəzi detalların götürülməsi və ya əlavə  edilməsi şərti ilə də həyata keçirilməsi mümkündür. Başqa bir variantda gizli sazişlərin bağlanması da istisna edilmir.

Dağlıq Qarabağın statusu, sülhməramlı qüvvələrin yerləşdirilməsi ilə bağlı olan bütün müzakirələr, ssenarilər Qarabağın itirilməsinə doğru aparır. Çünki heç vaxt öz ssenarimizi qura bilməmiş, bütün  yolların ya Romaya, ya Moskvaya, indi də Rambuye qəsrinə aparması ilə  razılaşmışıq. Bu, nə vaxta qədər davam edəcək? Rambuye tələsindən çıxa biləcəyikmi? Çıxış yolu var, sadəcə, bu yolla getmək istəyənlər olmalıdır.

Akif Nağı

◄ 1 2 ... 16 ► ₪