Vətən Sevgisi

İnsan oğlu yarandığı gündən bəri onun üzərində bir sıra haqlar mövcuddur. İlk növbədə hamının öhdəsinə bu haqlara sahib çıxaraq onu qorumaq düşür. Təbii olaraq bu müqəddəs amalları qorumaq üçün insan onları ayrı-ayrılıqda  sevməyi bacarmalıdır. İnsan həyatından qiymətli olan anlayışlar ilk növbədə onun dini və vətənidir.

Din insanın qəlbində olan boşluğu doldurub ona mənəvi hüzur bəxş etdiyi üçün ilk olaraq gəlir. Dinlər içərisində ən kamili olan İslam dini bütün məsələlərdə, bütün müqəddəs amallar haqqında üstün və fərli görüşə malikdir. Məhz bu baxımdan da Allahın insanlığa bəxş etdiyi bu dinin konstitusiya kitabı olan Qurani-kərimdə bütün zəruri məsələlər öz əksini tapmışdır.

İnancımıza görə insan oğlu dininə sahib çıxmaqla ana vətəninə də sahib çıxmalıdır. Çünki dininə sahib çıxmayanın quru cəsədindən başqa heç bir mənəvi dəyəri olmaz. Yaxud vətəninə sahib çıxmayan  ilk olaraq inancına xəyanət etmiş olar, yenə də bir dəyəri qalmaz. Beləcə, insan oğlu sahib olduğu müqəddəs hər bir şeyi itirmiş olar. Əgər belə olmasa idi Allah təala öz müqəddəs kitabında ayəni xatırlatmazdı “(Ya Məhəmməd! (s.)” Musadan sonra bir dəfə Israil övladlarının başına gələnləri görmədinmi? Onlar öz peyğəmbərlərinə: bizə bir hökmdar göndər ki, (onun köməyi ilə) Allah yolunda vuruşaq. O da onlara: sizə vuruşma əmri olduqda bəlkə vuruşmadınız? Onlar cavabında dedilər “Allah yolunda nə üçün vuruşmayaq ki, yurdumuzdan çıxarıldıq, övladlarımızdan ayrıldıq.” Lakin onlara vuruşmaq vacib olduqda bir qismi istisna olmaqla hamısı (Döyüşdən ) üz çevirdilər. Allah özünə zülm edənləri tanıyır. Gördüyümüz kimi Allah- təala bu ayədə vətən yolunda savaşı vacib saymışdır. Eyni zamanda bu yoldan dönüb qaçanları özlərinə zülm etmiş olduqlarını bizə xatırladır. Qeyd etdiyimiz kimi vətəni qorumaq bizim haqqımızdır. Haqq isə Allaha aparan yolun başlanğıcıdır. Bu yolda ölən şəhid, qalan qazidir. Deməli, vətən savaşı haqq savaşı olduğu üçün bu yolda nə ölən, nə də qalan uduzmur. Əksinə ucalır. Həm allah qattında, həm də insanların gözündə. Burda bir şeyi də təkrar xatırlamaq yerinə düşərdi: vətəni qorumaq sevgidən doğur. Əgər biz onu ata-anamızdan, hətta canımızdan çox sevməsək qoruya bilmərik. Sevimli bir şeyi qorumaq isə  şərəf və iman məsələsidir. Məhz Peyğəmbərimiz (s) bu baxımdan hədislərinin birində: “Vətəni sevmək imandandır.” – buyurur. Bu mübarək hədisdən bizə aydın olur ki, vətəni sevmədən kamil imana sahib olmaq olmaz.

Ey inanc sahibləri və sevgi insanları! Bu gün bizim ən böyük borcumuz Allahın əmr etdiyi, Rəsulunun buyurduğu kimi bu vətəni azad edib qorumaqdır. Gəlin həm inancımıza, həm də vətənimizə sahib çıxaq. Şərəfimizi  və inancımızı qurtaraq. Çünki “döyüş meydanında ölmək rahatca uzanıb ölməkdən daha şərəflidir. ” (Həzrət Əli)Yaxud can verməkdən daha yaxşıdır.

Əbədi ibrət

Yaşadığımız dövr öz qayğı və problemləri ilə bütün zamanlardan fərqlənir. Günümüzdə hər bir insana təsir edən. qloballaşma deyilən bir şey mövcuddur. Bu qloballaşma bu günün insanını dünənin insanından xeyli fərqləndirir. Elə bunun nəticəsidir ki, həyatımız bütün yönlərdə fərqli şəkillərə düşmüşdür. Demək olmaz ki, bu hal bütün məsələlərə müsbət təsir etmişdir. Bizi dünənimizdən qoparmaqla mütləq inkişafa gətirib çıxarmışdır. Çox təəssüf olsun ki, bəzi məsələlərin düzgün anlaşılmaması nəticəsində tarixi, milli, dini dəyərlərimiz ikinci dərəcəli yerdə dayanmışdır. Bunu deməklə biz heç də müasir zamanın tələb etdiyi qloballaşmanın əleyhinə deyilik. Sadəcə hər şeyi müasirliyə-qloballaşmaya bağlayıb, mənəvi dəyərlərimizdən uzaqlaşmağın əleyhinəyik! Unutmaq olmaz ki, dünənimiz bizim işıqlı sabaha çıxmağımız üçün ən böyük məktəbdir. Ən azından ona görə ki, biz 18 illik Qarabağ savaşının içindəyik. Bir də ona görə ki, şəhidlik və qazilik bizim hər birimizin alnına yazılıb!

Içində olduğumuz fevral ayı hicri tarixinin məhərrəm ayı ilə üst-üstə düşür. Məhərrəm ayı dedikdə hamının nəzərinə ilk olaraq Kərbala hadisəsi və imam Hüseyn (ə) düşür. Təbii ki, hər halı ilə. Kimisi şücaətinə görə, kimisi faciə baxımından, kimisi xəyanət baxımından, kimisi də ibrət baxımından bu hadisəyə münasibət bildirir. Maraqlı hal budur ki, 1400 illik bir zaman fasiləsində bu hadisə öz mahiyyət və təsirini itirməmiş, əksinə günümüzə qədər bir sıra ölkələrin və millətlərin həyatında inkişaf baxımından çox önəmli yer tutmuşdur. Azından ona görə ki, bu mücadilə haqq savaşı idi. Haqqı yaşatmağa, həqiqətə qovuşdurmağa xidmət edirdi. Bəs bu gün qloballaşmağa doğru kosmik sürətlə gedən dünyamızda Kərbala hadisəsinin və imam Hüseyn(ə) böyüklüyünün hansı müsbət təsiri ola bilər?

Bu suala cavab tapmaq üçün istər-istəməz imam Hüseyn(ə)-in kimliyinə baş vurub araşdırmalı olacağıq. Qüsurumuzu Allah bağışlasın.

Kim idi imam Hüseyn (ə)?- Allahın çox sevimli qulu, aləmlərin yaradılış səbəbkarı, iki cahan sərvəri, Peyğəmbərlər sultanı, ən böyük həqiqət məktəbinin banisi Məhəmməd (s)-in nəvəsi; Allahın aslanı adlanan, vəlilər sultanı, elmin qapısı, natiqi-Quran olan Həzrəti Əli (ə)-ın eyni zamanda Cənnət xanımı, analar anası, ayağını qoyduğu yerə başımızı qoymağımız lazım olan Fatiməyi-Zəhra (ə)-ın oğlu və özündən sonra bəşəriyyətdə ədalətin və həqiqətin yaşamasına səbəb olan mübarək şəxsiyyət!

Bu mübarək insan ta ki dünyanın sonuna kimi unudula bilməz. Çünki haqq dedi, haqqa qulluq etdi, haqqı yaşatdı və haqq uğrunda şəhid oldu. O günlərdən bizə bu kəlamını ibrət olaraq deyə yadigar qoydu: “Əgər mənim şəhid olmağım İslamın-həqiqətin yaşamasına xidmət edirsə, onda ey qılınclar, doğrayın məni!”- Doğrayın ki, haqq yaşasın, haqq batildən ayrılsın, haqq qələbə çalsın.

Bəli, bu imam Hüseyn(ə) məktəbi idi. Dünənimizi qoruyan, bu günümüzə xilas gətirəcək imam Hüseyn(ə) məktəbi.

İmam Hüseyn (ə) yaşadığı ömür içində hər şeyindən – oğlundan, qızından, qardaşından , yoldaşından, məqamından keçib həqiqəti seçmişdir.

Bu gün bu məktəb bizə heç də ağlamağı öyrətmir. Bu məktəb bizə millət, din, vətən yolunda hər şeydən keçməyi öyrədir. Bu məktəb bizə qazi olmağı, şəhid olmağı öyrədir. Bu məktəb bizə qazilikdə bir şəhidlik, şəhidlikdə qazilik olduğunu öyrədir.

Unutmaq olmaz ki, bu hadisə bəşəriyyətin faciəsi, həqiqətin qələbəsi idi. Yeri gəlmişkən, bu fevral ayı bəxtimizə iki hadisə ilə  yazılacaq. Kərbala vaqiəsi və Xocalı faciəsi. Sizcə bu Məhərrəmlik bizi haqqımıza sahib çıxıb günahsız vətəndaşımızın, şəhid qardaş-bacımızın qisasını almağa səsləmirmi?

Hədislərdən seçmələr 

Aləmlərin rəhməti, iki cahan sərvəri

1. Peyğəmbər (s) buyurur: “Əməllər niyyətə bağlıdır və hər kişi üçün ancaq niyyət etdiyi şey vardır.”

2. Yenə buyururdular: “Bilin ki, hər bir hökmdarın yasaq etdiyi bölgəsi var. Allahın yasaq bölgəsi də onun haram etdiyi şeylərdir.”

3. Yenə buyururdular:“Sizdən hər hansı biriniz özü üçün istədiyini qardaşı üçün də istəmədikcə iman etmiş olmaz ”

4. Yenə buyururlar: “Harda olursan ol, Allahdan qorx və pisliyin arxasından tez yaxşılıq çatdır ki, onu silsin. İnsanlarla da gözəl bir əxlaqla davran”

5. Yenə buyururdular: “Şəfqətli olmayana mərhəmət edilməz.”

6. Yenə buyururdular: “İki şəxsə qibtə edilər:-malını Allah yolunda xərcləyən zənginə, elmini infaq edən alimə.”

7. Yenə buyururdular: “Hədiyyəyə hədiyyə ilə cavab vermək yaraşır.”

8. Yenə buyururdular: “İnsanlara öz ağlınızın yetdiyi qədər deyil, onların ağılların qavrayacağı dərəcədə söyləyin”

9. Yenə buyururdular: “Amandı ölülərlə oturmayın.” Ey Allahın Rəsulu, ölülər kimlərdi? Sualına Allah Rəsulu:       ölülər dünyada qalanlardır-buyurdu.

Fitnənin yeni növü

Son zamanlar Norveç və Danimarkanın bir sıra qəzetləri bütün müsəlmanların inancına təsəvvürə gəlməz dərəcədə təcavüz etmişdir. Bu kainatın əfəndisi, böyük İslam peyğəmbəri Məhəmməd (s) –nə olan hörmətsizliklə bağlıdır.

Gördüyünüz kimi bütün dünya müsəlmanları nəyinki Norvec və Danimarkaya eyni zamanda onları hər formada dəsdəkləyən Avropa ölkələrinə də dərs verdi və verməkdə davam edir. Əslində bizi maraqlandıran hadisələrin heç də görünən tərəfi deyildir. Çünki bu adi qəzet səviyyəsində və yaxud təsadüfən olunan bir səhvə bənzəmir. Məhz belə hadisələr gizli maraqların nədən ibarət olduğunu göz önünə çəkir. Təbii olaraq hamımızı hiddətləndirən bu məsələnin formalaşmasında bir sıra önəmli amillər mövcuddur. Əslində bu hadisə İslam mədəniyyətinə olan qısqanclıqdan, yaxud düşmənçilikdən doğur. Çünki bu gün Avropa, eləcə də xristian mədəniyyətindən çox-çox yüksəkdə dayanan İsalam mədəniyyətinin uğurlarını sözügedən cəmiyyətləz qəbul edə bilməz. Eyni zamanda Avropa bu gün islamlaşır. Elm adamları, yüksək elitar təbəqə artıq İsalmın və Quranın həqiqətlərinə varır və onu qəbul etmək zorunda qalır. Məhz belə olduğu təqdirdə bu məsələnin ortaya atılması mədəniyyətlərin qarşıdurmasına gətirib çıxarmalıdır ki, bütün müsəlmanların əleyhinə olan bir silaha çevrilsin.

Hər  bir insanın özünün inancına olan hörmətsizliyə ciddi reaksiya verməsi təbii haldır. Çünki bu inanc məsələsidir və birmənalı şəkildə ona qarşı təcavüz olmaz!

Bunu çox gözəl bilən və bizim inancımıza təcavüz edən Avropa və xristian dünyasının maraqlarının harada kəsişdiyi aydın görünür. Əslində onlar müsəlmanların bu məsələyə daha aqressiv yanaşmasına çox maraqlıdır. Çünki belə olduğu təqdirdə göründüyü kimi diplomatik nümayəndəliklərə qarşı təzyiq, bayraqların yandırılması , hadisələri daha da qızışdıran ölümlər və s. baş verəsəkdir. Bu  da onlara uzun zamandan bəri dünya xalqlarının gözündə səhnələşdirmək istədikləri “İslamın terror dini” olduğunu sübut etməyə kömək edir. Axı indi “uran istehsalı” və “Bin laden oyunu” yüksək maraq dairəsi yarada bilmir. Hadisələrin bu şəkildə qurulması fitnə yaratmaqdan başqa bir şey deyildir. O zaman bu olaya sadəcə bir ad vermək olar.

Yeni Səlib yürüşü!

Biz kimlərinsə Qutsal inanclarımıza toxunmasına heç vaxt yol verməməli, eyni zamanda fitnəyə getməməliyik. Axı Quranımızın bizə “Fitnə adam öldürməkdən daha böyük günahdır”-deyir. Axı bizim dinimiz sevgi dinidir. Axı bizim Peyğəmbərimiz (s) ən böyük sevgi insanıdır.

Səhifəni hazırladı: Nicat

◄ 1 ... 13 14 15 16 ► ₪