“Artıq 12 ildir nə danışıqlar baş tutur, nə də müharibə baş verir”

“ATƏT heç nədir,  onu bilin. ATƏT-in heç nəyi də yoxdur. ATƏT-in bapbalaca bir qərargahı var. İçində də 5-6 nəfər adam. ATƏT-in “xozeyni” Amerikadır”.

Həmsöhbətimiz politoloq Vəfa Quluzadədir.

-Vəfa müəllim, Azərbaycan və Ermənistan prezidentlərinin Fransa görüşündə danışıqların predmetinə aydınlıq gətiriləcəkmi?

-Bilirsinizmi, bu çox çətin sualdır. Birincisi sualınız qəribədir. Nə deməkdir ki, aydınlıq gətiriləcək? Bizim aydınlıq nəyimizə lazımdır, qaranlıq nəyimizə lazımdır. Bizə lazımdır ki, işğal olunmuş torpaqlarımız BMT-nin qərarları əsasında azad edilsin. Əgər siz soruşsanız ki, BMT-nin qərarlarının əsasında, Azərbaycan torpaqları işğaldan tamamilə azad olunacaqmı? Mən buna bir qədər şübhə ilə yanaşardım!

-Danışıqlar baş tutmasa, müharibə ehtimalını necə qiymətləndirirsiniz?

-1994-cü ildən, artıq 12 ildir danışıqlar baş tutmur. Nə də müharibə baş vermir. Ona görə müharibə ehtimalını hələlik görmürəm. Çünki hələlik  danışıqlar nəticəsində həmsədrlərin niyyəti güzəştli sülh əldə etməkdir. Və bu niyyəti də bizə aşılamaq istəyirlər. Biz də bu niyyəti heç cür qəbul edə bilmirik. Ona görə ki, Azərbaycan gərək öz torpaqlarını güzəşt etsin.  Buna isə heç kəs cəsarət edə biməz. Ona görə hələlik ki, danışıqlar bu səpgidə gedir. Onlar  bizə təklif edir ki, torpaqlarımızı güzəşt edək. Biz isə bunu qəbul edə bilmərik. Onlara izah edirik ki, biz bunu xalqımıza necə başa salaq? Digər tərəfdən də sizə bildirim ki, müharibənin əmrini verən mən  deyiləm. Müharibə ehtimalını məndən soruşmayın. Müharibə ehtimalını soruşun Müdafiə Nazirindən və ondan yüksək prezidentdən. Mən sizə müharibə barədə heç nə deyə bilmərəm.

- Putinin Azərbaycana növbəti səfəri hansı məqsədi daşıyır?

-Əgər biz Rusiyanın Azərbaycana  qarşı apardığı siyasəti bir-bir təhlil etsək görərik ki, Rusiya həmişə Azərbaycana qarşı düşmən mövqeyində dayanıbdır. Rusiya Azərbaycanı çar dövründə işğal edib, kaloniyaya çevirib. Bizim pasportlara çar hökuməti milliyətimizi tatar yazdırırdı. Türk dilimizi əlimizdən almışdılar. Sonra isə Sovet Rusiyası Azərbaycan çoxlu zülmlər eləməyə başladı. Azərbaycanı türklüyündən çıxardıb Azərbaycanlı yazdırdı. Demək tatardan keçirdi azərbaycanlıya, yəni yer adını bizə verib, azərbaycanlı kimi tanıtdı. Türk milləti adını götürməyə icazə vermədi.

-Ondan başqa torpaqlarımız işğal olundu. Demokratik respublikamız darmadağın edildi, ordumuzu qırdılar, ziyalılarımızı məhv etdilər. Hüseyn Caviddən tutmuş... daha hamısını sadalamıram. Özünüz yaxşı bilirsiniz. Beləliklə, burada eybəcər bir Sovet Respublikası yaratdılar.

-Bir milyard beş yüz milyon ton neftimizi  Azərbaycandan çıxardılar. Sovet hökuməti yıxılanda isə bütün Azərbaycan əhalisi dilənçi vəziyyətində oldu. Ondan sonra ikinci dəfə yenə işğal etdilər. Sovet dövründə bizim demokratik respublikanı yıxandan sonra ermənilərə Zəngəzuru verdilər. İndi isə Rusiya Dağlıq Qarabağa zərbə vurub, onun ətrafındakı rayonları işğal edib. Ermənilərin dil il, həyasızcasına deyir ki, nə Dağlıq Qarabağı, nə Kəlbəcəri, nə də Laçını strateji baxımlardan Azərbaycana verməyəcəyik. Bax, məsələ belədir. Ona görə mən Putinn gəlməsini pisləyirəm. Putin kimi adamı burda qəbul etmək olmaz. Həmçinin Yeltsin kimi adamı da burda qəbul etmək olmazdı, təəssüf ki, etdik. Yeltsin Azərbyacan torpaqlarının 20%-nin işğalında bilavasitə iştirak edibdi. Ona görə mən Rusiyadan heç nə gözləmirəm. Nə də heç kimdən... Allahdan başqa heç kimdən heç nə gözləmirəm...

Bilirsinizmi, Rusiya da Azərbaycana qarşı düşmən mövqedədir. Başqa ölkələr də, elə götürək Avropa ölkələrini, Məhəmməd peyğəmbəri təhqir etməyə qədər qalxıblar. Onların İslam dininə, müsəlmanlara münasibəti bəllidir. Ona görə belədir vəziyyət.

-Siz sülhməramlıların Azərbaycanda yerləşdiriləcəyinə inanırsınızmı? Əgər yerləşdiriləcəksə onların tərkibində hansı ölkələrin hərbiçilərini məqbul edirsiniz? Sülhməramlıların hansı ərazidə yerləşdirilməsini düşünürsünüz?

-Sülhməramlıların Azərbaycanda yerləşdirilməsi o vaxt mümkün olar ki, bütün Azərbaycan torpaqları işğaldan azad olsun. Dağlıq Qarabağ da, Kəlbəcər də, Laçın da və  başqaları... bizim  işğal olunmuş torpaqlarımızda sülhməramlılar necə gəlib yerləşdirilə bilər. Mən bunu heç cürə təsəvvür etmirəm. Nəyə görə ermənilərin çıxdığı torpaqlarda Azərbaycan qoşunları yerləşməsin. Nə səbəbə görə, Azərbaycan süvernliyini öz torpaqlarından bərpa etməsin. Bizim sülhməramlılar nəymizə lazımdır? Nə sülhməramlı... Qonşu gürcülər sülhməramlılardan ağlayırlar. Bilmirlər onlardan canlarını necə qurtarsınlar. Sülhməramlıların yerləşdirilməsi elə işğal deməkdir.

-Vəfa müəllim, “ATƏT-in həmsədrlərinə istədiklərini desələr, azərbaycan xalqı onları daş-qalaq edər.” 525-ci qəzetdə sizin belə bir fikriniz səslənib...

- Onların istədikləri odur ki, Azərbaycan Dağlıq Qarabağı birdəfəlik versin ermənilərə, bununla da məsələni bitirək. Sülh müqaviləsi imzalansın və hər şey qurtarıb getsin. Onların bütün fikirləri budur. Ancaq onlar bunu bərkdən deyə bilmirlər. Mətbuat qarşısında söyləməyə qorxurlar.

1993-1999-cu illərdə mən bütün danışıqlarda iştirak etmişəm. Onlar bir dəfə də olsun ermənilərə deməyiblər ki. Öz işğalçı qoşunlarınızı Azərbaycan torpaqlarından çıxardın. Amma, Azərbaycana deyblər ki, gərək siz ermənilərə güzəştə gedəsiniz. Nə güzəşt edək? Nəyi güzəşt edək?

-ABŞ-ın Ermənistandakı səfiri Con Evansın sözlərindən belə çızxır ki, qonşu ölkələrin Türkiyə, İran və Gürcüstanın, eyni zamanda, həmsədr ölkələr kimi ABŞ, Rusiya və Fransanın hərbiçiləri sülhməramlı qoşun yaranarsa, onun tərkibində iştirak etməməlidir.

-Bilirsinizmi, onlar məsələni elə qoyurlar ki, güya sülhməramlıların yaradılması həll olunub və Azərbaycan da buna razılıq verib. İndi də deyirlər ki, kim iştirak etməlidir,  kim iştirak etməməlidir.

Birincisi biz rasılıq vermişikmi? Sülhməramlı qüvvələr bura gəlsin? Ikincisi Sülhməramlı qüvvələr varmı? Yoxdur. ATƏT heç nədir, onu bilin. ATƏT-in heç nəyi də yoxdur. ATƏT-in bapbalaca bir qərargahı var. İçində də 5-6 nəfər adam ATƏT-in “Xozeyni” Amerikadır. Nə vaxt Amerika əmr etsə ki, sülhməramlı qoşunları filan-filan ölkələr versin, bax onda verəcəklər. Amma indiyə qədər nə sülhməramlı qüvvələr var,  nə də Azərbaycanın buna razılığı. Heç Ermənistanın razılığı haqqda mənim xəbərim yoxdur. Sülh müqaviləsindən sonra, sülhməramlı qüvvələr gəlir. Sülh müqaviləsi yoxdursa, heç bir razılıq yoxdur.

Söhbətləşdi: Qalib İbrahimoğlu

Xocalının ildönümünə mitinq keçiriləcəkdir Qarabağ Azadlıq Təşkilatı Xocalı soyqırımının ildönümü ilə bağlı mitinq keçirmək haqqında qərar qəbul etmişdir. Mitinqin kecirilməsi üçün dünən Bakı Şəhər Icra Hakimiyyətinə xəbərdarlıq məktubu göndərilmişdir. Bütün ictimai, siyasi qüvvələrin də dəvət olunduğu aksiyanın fevralın 26-da saat 1200-dan 1300-a qədər Xətai metro stansiyasının yaxınlığında “Vətən harayı” abidəsinin qarşısında keçirilməsi nəzərdə tutulur. Mitinqdə “Xocalı soyqırımını törədənlər cəzalandırılsınlar!”, ”Qarabağa azadlıq!”, “Erməni işğalına son qoyulsun!”, “Nəticəsiz danışıqlar dayandırılsın!”, və digər şüarlar səsləndiriləcək, çıxışlar ediləcəkdir. QAT mətbuat xidmətindən verilən məlumata görə, Xocalı soyqırımının ildönümü ilə bağlı təşkilat bölgələrdə də fərqli tədbirlər keçirəcəkdir. Bundan başqa, QAT-a daxil olan məlumatlara görə, Dünya Azərbaycanlıları Konqresi, Dünya Azərbaycanlıları Məcilisi, Avropa İnsan Hüquqları Təşkilatının Qafqaz bölməsi, ABAD Azərbaycan Təşkilatı, İsveç Azərbaycanlıları birliyi, Moskva gənclərinin Koordinasiya Şurası, Qarabağ Azadlıq Təşkilatı İsveç bürosu və digər qurumlar dünyanın müxtəlif yerlərində fotosərgilər, yığıncaqlar, küçə yürüşləri, mitinqlər, piketlər keçirəcəklər.

◄ 1 2 3 4 ... 16 ► ₪