Sonun əvvəli və ya müxalifət üçün “Nə etməli?” sualına cavab

Avtoritarizmin nəticəsi olan sülalə rejimi heç bir dəyişikliyə yol vermədən Heydərizmi öz siyasi kursu elan edərək sistemli şəkildə davam etdirir. İ.Əliyevin islahatçı görüntüsü yaradılsa da, ölkə iqtisadiyyatında hərc-mərclik daha geniş vüsət aldı: infilyasiya, bahalaşma, enerji daşıyıcılarının qiymətlərinin artırılması, kasıblıq, işsizlik, insanları sosial partlayış həddinə gətirib çıxartdı. Dövlətüstü məmurların inhisarçılığı sahibkar və iş adamlarının asılılığını daha da artırdı. İqtisadiyyata total məmur nəzarəti davam etdirildi. Təbəqələnmə daha da sürətləndi. Bir tərəfdə kasıb və işsizlərdən ibarət çoxluq, digər tərəfdə milyardlara sahib olmuş hakim sülalə və məmur elitası xalqı bir-birinə nifrət edən sosial qruplara böldü.

Saxta yolla dövlət başçısı seçilmiş İ.Əliyev bələdiyyə və parlament seçkilərini də saxtalaşdırdı. Xalqın özünüidarəetmə forması olan bələdiyyələr və qanunverici orqan üzvü olan millət vəkili mandatları məmur vəzifələri kimi satıldı.

Regionda gedən demokratik inqilablardan sonra parlament seçkilərinə bəslənilən ümidlərin özünü doğrultmaması, saxtalaşdırılmış seçkilərin nəticələrinin Qərb və ABŞ tərəfindən bəzi istisnalarla qəbul edilməsi müxalif düşərgəni çox çətin vəziyyətə salmışdır. Parçalanma və qarşılıqlı ittihamlar səslənməkdədir. Enerjisini antidemokratik rejimin dəyişdirilməsinə sərf etməli olan müxalif siyasilər bir-birini zəiflətməklə məşğuldur. Bu olay yolverilməzdir.

İqtidarın sonundan əvvəl siyasi müxalifət millət və dövlətin gələcəyi naminə öz vəzifələrini son dərəcə dəqiqliklə müəyyənləşdirməli və yerinə yetirməlidir. Bu missiyanın milli azadlıq mübarizəsi qədər müqəddəs və əhəmiyyətli olduğunu siyasi müxalifətin bütün üzvləri başa düşməli, mücadilə aparmalıdır.

Demokratik seçki keçirməyə hazır olmayan Iqtidar mənsubları Qərbin təzyiqlərini hiss edən kimi Rusiya, İran və Çin avtoritar rejimlərinə sığınır. Demokratiyanı sözdə qəbul etmiş Iqtidar işdə Mərkəzi Asiya dövlətləri ilə eyni mövqedə olduğunu sübut etdi. Bu manevr rejimin asanlıqla hakimiyyətdən getməyəcəyinin göstəricisidir.

Müxalifət qüvvələri proqramlaşdırılmış şəkildə fəaliyyət göstərməli, rejimin gücünü düzgün qiymətləndirməli, minimum itki ilə vəziyyətdən çıxış yolu tapmalıdır.

Həqiqi siyasi müxalifətin kimlərdən və hansı siyasi qüvvələrdən ibarət olduğu müəyyənləşdirilməli, hakimiyyət və iş birliyinə girmiş yalançı müxalifətlə əlaqələr kəsilməlidir. Saxta müxalifət xalqı çaşdırmaq, düşərgədə birliyin olmaması haqqında mənfi rəy yaratmaqda davam etsə, əməlləri KİV-də müzakirə edilməlidir.

Müxalifət düşərgəsinin birliyi, monalitliyi, kütləviliyi təmin edilməli, partiyalararası münasibətlər səmimilik əsasında qurulmalıdır. Funksionerlərdən tutmuş sıravi üzvlərə qədər hamı müttəfiq siyasi qüvvələr haqqında mənfi rəy yaratmamalı, dost və qardaşcasına münasibətdə olmalıdır. Siyasi rəqabət sülalə rejiminə qarşı olduğu üçün bütün siyasi qüvvələrin gücü və enerjisi xalqın Iqtidara qarşı çevrilməsinə yönəldilməlidir.

Kütləni siyasi cəhətdən maarifləndirmək üçün KİV-də güclü, ciddi, davamlı təbliğat aparılmalıdır. Siyasi rejimin iç üzünü açmaq üçün tayfa-klan və məmur elitasının ayrı-ayrı üzvləri haqqında faktlara əsaslanan yazılarla çıxış edilməlidir. Rüşvətxorluq və korrupsiyanın, inhisarçılığın miqyası haqqında xalq tez-tez məlumatlandırılmalıdır. Rəsmi dövlət statistikasının yalanları üzə çıxarılmalı, kasıblıq həddindən aşağı səviyyədə yaşayanların 40%-dən iki dəfə çox olduğu müəyyənləşdirilməli, istehsal və kənd təsərrüfatında inkişafın saxta rəqəmlərə əsaslandığını öyrənmək üçün müstəqil QHT-nin köməyi ilə monitorinqlər keçirilməlidir.

Müxalif siyasilər ictimaiyyətlə - müstəqil ekspert, hüquqşünas iqtisadçı, alim, yazıçı və jurnalistlərlə diskussiya, dəyirmi masa, konfrans və simpoziumlar keçirərək demokratik dövlət quruculuğunun əsas prinsiplərini müəyyənləşdirməlidir.

Xalq radikal iqtisadi islahatların keçirilməsinə, yeni iş yerlərinin açılmasına, elm, təhsil, tibb sahəsinin inkişaf etdirilməsinə, insan aliliyinin önə çəkilməsinə, ölkə sərvətlərinin millət və dövlətin ehtiyaclarına sərf ediləcəyinə əsaslı şəkildə inandırılmalıdır.

Yuxarıdan aşağıya doğru seçki komissiyalarının tərkibinin paritet əsaslarla dəyişdirilməsi üçün kütləvi hərəkat və mitinqlər davam etdirilməlidir.

Bu Iqtidarın ən böyük düşməni demokratiya, plüralizm, insan haqqları, azad mətbuat, müstəqil fikirlilik, şəffaf və ədalətli seçkilərdir.

Qərbin demokratik institutları və analitik mərkəzləri ilə müntəzəm əlaqə saxlamalı və Azərbaycan Respublikasında baş vermiş antidemokratik olaylar ən kiçik detallarına qədər müzakirə predmeti olmalıdır.

Qərbə məxsus liberal-demokratik görüşlər müdafiə edilməli, şəxsiyyətin suverenliyinə əsaslanan demokratik dövlət qurumunun proqram layihələri xalqa elan edilməlidir.

Keçmiş hərəkatların, qazilərin, həqiqi müxalifət qüvvələri ilə birliyi yaradılmalı,xalqın öldürülmüş inam hissi özünə qaytarılmalı, xüsusilə gənclərin mübarizə əzmi, mütəşəkkilliyi təmin edilməli, əsas zərbə qüvvəsinə çevrilməlidir. Sülalə rejiminin sonu düşünülmüş siyasətin nəticəsi olmalıdır.

İlqar Atabəyli

Sorğu

Qarabağ Azadlıq Təşkilatı Xocalı soyqırımı ilə bağlı mitinq keçirmək üçün Bakı Şəhər İcra Hakimiyyətinə müraciət ünvanlamışdı. Çox təəssüf ki, Bakı şəhər İH bu mitinqə səbəb göstərilmədən icazə verməmişdir.

Bakı şəhər icra hakimiyətinin bu qərarına paytaxt sakinlərinin də münasibətini öyrəndik:

Sadıqov Yusif, tələbə:

- Mən bu xəbəri ANS TV-dən izlədim. Çox pis oldum. Hacıbala müəllimin mövqeyi anti-Azərbaycan mövqeyidir.

Quliyeva Nüşabə, müəllimə:

- Çox pis qərardır. Erməniləri müdafiə kimi qiymətləndirirəm.

Qənbərov Şükür, işsiz:

- Onu Xocalı faciəsi yox, pul maraqlandırır. Yəqin yüksək çinli məmurlar belə məsləhət verib.

Əhmədova Şəfəq, tələbə:

- Bu hakimiyyət Qarabağ deyəni ya həbs edir, ya da sürgünə göndərir. Qarabağ partizanlarına göstərilən münasibət bunun göstəricisidir.

Əhmədov Xasay, iqtisadçı:

- Vallah, gözlənilən hərəkətdir. Bu iqtidar mənsubları həmişə hər hansı bir mitinqə «yox» deyiblər.

Tağıyev Bəxtiyar, sürücü:

- Məncə, Hacıbala Abutalıbov ya erməni, ya da ruhi xəstədir. Ermənidir, ona görə ki, onlarla eyni mövqedən çıxış edir; ruhi xəstədir – ona görədir ki, sağlam düşüncəli azərbaycanlı Xocalı soyqırımı ilə bağlı mitinqə «yox» deməzdi. Buna münasibətim çox pisdir.

Məhəmmədova Məqbulə, tələbə:

- Bir gənc və tələbə olaraq, merin bu addımına çox pis baxıram. Qarabağ problemi bütün türklərin problemi olduğu üçün, belə bir qərar verilməməlidir. Mənə elə gəlir ki, icazəsiz də olsa belə, QAT bu mitinqi keçirməlidir. QAT sədri Akif Nağı həmişəki kimi geri çəkilməməlidir və Azərbaycan gəncliyi bu mitinqdə fəal iştirak etməlidir.

Süleymanova Gülnar, tarixçi:

- Bildiyimiz kimi, ermənilər də 28 fevralda qondarma Sumqayıt hadisələrini qeyd edəcəklər. Ona görə də Bakıda Xocalı mitinqinin keçirilməsi labüddür. Çünki dünya ictimaiyyəti görməlidir ki, Azərbaycan xalqı bu faciəni heç vaxt unutmayacaq. Və nə vaxtsa düşməndən öz öcülünü alacaq.

Təhməzova Təhminə, həkim:

- QAT geri çəkilməməlidir. İnanıram ki, icazəsiz olsa belə, bu mitinq baş tutacaq.

Quliyeva Ayişə, müəllimə:

- Mən Hacıbala Abutalıbovla erməni arasında heç bir fərq görmürəm.

Salmanov Sakit, mühəndis:

- Xocalı mitinqinə icazə verməyən hakimiyyət çətin ki, qarabağı geri alsın.

Həsənova Bəsti, jurnalist:

- Bu merdən ancaq və ancaq anormal addımlar gözləmək olar. Təəssüf edirəm. QAT heç bir vəcdlə geri çəkilməməlidir. Həmişə olduğu kimi, sonadək mübarizə aparıb, hədəfə çatmalıdır.

Əliyeva Rəqsanə, tələbə:

- Bu məsələ bizdə təəssüf hissi doğurur. Düzgün qərar deyil.

Hüseynova Məlahət, işsiz:

- Belə olmasında heç bir qəbahət görmürəm. İcazə verilməyibsə, QAT bu mitinqi keçirməsin.

Rəhimov Akif, tarixçi:

- Bu milləti erməni qırır, məhv edir. Mövcud iqtidar isəac, işsiz qoyur, səsini oğurlayır, hüquqlarını tapdalayır. Mən merin milliyyətcə azərbaycanlı olmasına şübhə ilə yanaşıram.

Hazırladı: Vüsal

Sabah müharibə başlayarsa…

Anar Əliyev – Neft şirkəti işçisi
Sabah müharibə başlayarsa, mən də bir gənc kimi, bu müharibədə iştirak edəcəyəm.

Elminaz Qurbanova – Tibb bacısı
Mən 1992-1998-ci illərdə Füzuli hərbi qospitalında işləmişəm. Baş çavuş olmuşam. Sabah müharibə başlayarsa, əlbəttə ki, yenə tibb bacısı kimi döyüş bölgəsində olacağam. 

Qərənfil Quliyeva – BDU yataqxanası
Sabah müharibə başlayarsa, heç şübhəsiz ki, həyat yoldaşım bu müharibədə iştirak edər və mən isə övladlarımın tərbiyəsi ilə məşğul olaram.

Adını deməyən bir gənc xanım
Sabah yox, müharibə çoxdan başlamalı idi.

Rəşad Məmmədli – işsiz
Sabah əmr olsun, gedək torpaqlarımızı mənfur düşməndən azad edək, məncə bu müharibəyə çoxdan başlamalı idik.

Pərviz Hacıyev – tələbə
Müqəddəs torpaqlarımızı yağı düşməndən geri almaq üçün vuruşmağa canla-başla hazıram. Özü də qələbə arzusu ilə…

Allahverdi Quliyev – yaşlı qoca
Yaşımın çox olmasına baxmayaraq, mən də cavanlarla çiyin-çiyinə vuruşa bilərəm.

Faiq Məmmədov – tələbə
O günü səbirsizliklə gözləyirəm. Sabah müharibəyə əmr verilsə, düşməndən ürəyimdə qubar olmuş Xocalının intiqamını alardım.

Xəyyam Zahidov
Bir əsgər kimi, Qarabağ uğrunda vuruşardım. Bir oğul övladım var, onu da özümlə götürüb döyüşə gedərdim.

Soltanova Rəna – müəllimə
Sabah döyüş başlasa, oğlumun ikisini də döyüşə göndərərdim. Yetər ki, torpaqlarımız azad olsun, qız-gəlinlərimiz əsirlikdən qurtulsun.

Kamran İslamov – döyüşçü
Bizdə döyüşçüyə qiymət verilmir, buna baxmayaraq, yenə də döyüşərdim.

Nadir Abbasov – ağsaqqal
Əlbəttə, istəyərdim ki, mən də döyüşəm. O vaxt mən Koçaryanla bir yerdə işləmişəm. Onu tez-tez ora-bura buyururdum. Bilsəydim ki, bir vaxtlar belə bir alçağa çevriləcək, başına bir güllə vurardım.

◄ 1 ... 9 10 11 ... 16 ► ₪