«Rambuye görüşündə irəliləyiş əldə etmək ya çətin, ya da qeyri-mümkün idi»

Həmsöhbətimiz politoloq Rasim Musabəyovdur.

- Rasim bəy, Fransanın Rambuye qəsrində təşkil edilmiş Azərbaycan və Ermənistan prezidentlərinin növbəti görüşünə yola düşən Robert Koçaryan oraya nikbin və ehtiyatla getdiyini bildirmişdi. Ermənistan mətbuatı bunu məsələnin həllinin uzanacağı kimi nəzərə çatdırırdı. Sizin fikrinizi bilmək maraqlı olardı.

- Ermənilər optimistcəsinə düşünürdülər ki, aparılan danışıqlar onların xeyrinə olan müstəvidə tamamlanacaq. Halbuki mən hesab etmirdim ki, ermənilərin istəkləri reallaşacaq. Mən gözləyirdim ki, Azərbaycan İqtidarı kiminsə təzyiqi altında ermənilərin istəklərinə razılıq verir.

- Azərbaycan özünü elə aparır ki, guya Qarabağda referendum məsələsini müzakirə etmir. Dağlıq Qarabağ separatçıları isə, perspektivdə bunun mümkünlüyünü bildirir. Sizcə, referendumun keçirilməsi baş tutacaqmı?

- Azərbaycan Xarici İşlər Nazirliyinin Mətbuat İdarəsinin rəhbəri Tağızadə rəsmi şəkildə elan etmişdir ki, Azərbaycan İqtidarı Azərbaycanın ayrı ərazisində referendum keçirib, onun taleyinin həll olunmasına razılıq verməyib və müzakirə də etmir. Referendum Konstitusiyada nəzərdə tutulduğu kimi, bütün Azərbaycan ərazisi üçün keçirilə bilər.

-  Ermənilər isə, əksinə, bəyan edirlər ki, referendum danışıqlar masasında olan 9 bənddən biridir. Və Azərbaycan bu məsələnin müzakirəsinə razıdır. Doğrudanmı bu belədir?

- Hər halda, Xarici İşlər Nazirliyinin bəyanatı bunun əksini deyir.

- Erməni tərəfi Dağlıq Qarabağın müstəqilliyinin beynəlxalq aləmdə tanınması müqabilində ərazi mübadiləsinə getməyə həqiqətənmi hazırdır?

- Xeyr, göstərirlər ki, ərazi mübadiləsi variantı aktual deyil və gündəlikdə yoxdur.

- Rambuye görüşü ərəfəsində Ermənistan parlamenti münaqişənin nizamlanma prinsiplərini açıqlayıb. Bu prinsiplər Azərbaycanın ərazi bütövlüyünü tanımır və erməni rəhbərliyinin əvvəlki bəyanatlarının üstündən xətt çəkir. Bu barədə nə deyə bilərsiniz?

- Hesab edirəm ki, bu mövqe və bunun tamamilə əksinə olan Azərbaycanın mövqeyi göstərir ki, Rambuye görüşündə irəliləyiş əldə etmək ya çətin, ya da qeyri-mümkün idi. Bu da baş verdi.

- Azərbaycan və Ermənistan prezidentlərinin Fransanın Rambuye qəsrində baş tutan görüşü, Azərbaycana qarşı növbəti cəfəng kimi görünmürdümü?

- Həm dövlət başçısının, həm də xarici işlər nazirinin görüş ərəfəsindəki çıxışları bunu deməyə əsas verirdi.

Söhbətləşdi: Qalib Qurban İbrahimoğlu

Qarabağ münaqişəsinin həllində Kosovo modeli: uğursuz variant

Qarabağın statusu münaqişənin həllində əsas elementlərdən biri kimi ermənilər tərəfindən dəfələrlə müxtəlif səviyyələrdə qabardılır. Azərbaycan isə məlum olduğu kimi bu məsələyə ölkənin ərazi bütövlüyü şəklində baxılmasına hər zaman hazır olduğunu bildirir. Amma Ermənistanın xarici işlər naziri Vardan Oskanyan isə münaqişənin həllində işğalçı ölkənin birmənalı mövqeyini dəfələrlə bəyan edib. Onların qənaətincə, problemin həlli yalnız Azərbaycanın Qarabağı itirməsi reallığı ilə barışmasından keçir. Dolayısı ilə ermənilər dünya praktikasından misal gətirərək, Qarabağın işğalını qanuniləşdirmək istəyirlər. Belə ki, Ermənistan xarici siyasət idarəsinin rəhbəri Vardan Oskanyan Qarabağ münaqişəsinin həllində Kosovo modelinin istifadə olunmasının tərəfdarı olduğunu bəyan edib. Bu təkliflə ATƏT-in Minsk Qrupunun həmsədrlərinin razı olması sirr deyil. Regionda maraqları toqquşan ölkələrin əksəriyyəti problemin həllində Kosovo modelinə “yox” demirlər. Əslində isə bu münaqişələr bütün kriterilərinə görə bir-birindən tamamilə fərqlənir. Təkcə ona görə ki, ermənilərin Qarabağa yaxın iki yüz il tarixində köçürülməsi nəinki Azərbaycan, həm də rus və İran mənbələrində öz təsdiqini tapıb. Digər tərəfdən, münaqişə başlayan zaman ermənilər təzyiqə məruz qalmış toplum olmayıblar. Onlar “Böyük Ermənistan” ideyasını gerçəkləşdirmək məqsədilə Azərbaycan torpaqlarına qarşı ərazi iddiası ilə çıxış ediblər. Vardan Oskanyanın beynəlxalq aləmə sırıdığı “Qarabağ erməniləri özlərini müdafiə edərkən azərbaycanlıların yaşadığı qəsəbələri tutublar” fikirinin yanlış olmasını anlamaq münaqişənin tarixi haqda bilgisi olanlar üçün çətin deyil. Bu mənada Kosovo münaqişəsinin Qarabağ problemi ilə eyniləşdirilməsi və ikincinin birincinin modeli ilə həllini tapması kimi təkliflər verilməsi ən azı siyasi savadsızlıqdan irəli gəlir.

Sadəcə ermənilər bu məsələdən də yararlanmaq istəyirlər. Prezidentlərin Fransada bu günlərdə keçirilən danışıqları da deyilənləri təsdiq edir. Yəni ermənilər bu dəfə də önəm verdikləri status məsələsinin üzərində dayanaraq, razılaşmadan yayınıblar.

R.Məmmədli

Vladimir Putin vəd verir

“Mən Azərbaycan prezidentinə söz vermişəm ki, Ermənistanla əlavə məsləhətləşmələr aparacağam. Yaxın vaxtlarda Ermənistan prezidentini Moskvaya dəvət edib, onunla danışıqlar aparmağı planlaşdırıram”. Bunu Azərbaycanda səfərdə olan Rusiya prezidenti Vladimir Putin prezident İlham Əliyevlə birgə keçirdiyi brifinqdə bəyan edib (APA).   V. Putin bildirib ki, danışıqların müsbət nəticələnməsi üçün Rusiya ondan asılı olan hər şeyi edəcək. Rusiya prezidenti tərəflər arasında indiyə qədər keçirilmiş danışıqları səmərəli saydığını deyib. Onun sözlərinə görə, problemin mürəkkəbliyinə baxmayaraq, hər iki tərəfin məsələnin həllində qarşılıqlı razılaşma əldə edə bilməsi mümkündür.

Xocalı soyqırımının 14-cü ildönümü İstanbulda qeyd olunub

Xocalı soyqırımının 14-cü ildönümü Türkiyənin ən böyük şəhərinin əsas meydanında qeyd olunub. Bu barədə APA-nın Şərqi Avropa bürosuna Türkiyədə fəaliyyət göstərən azərbaycanlı tələbələrin ABAD təşkilatının rəhbəri Araz Aslanlı məlumat verib. Onun sözlərinə görə, Xocalı faciəsi ilə əlaqədar həqiqətləri yerli və beynəlxalq ictimaiyyətə çatdırmaq məqsədilə bu gün Türkiyə vaxtilə saat 12.00-da İstanbulun Taksim meydanında aksiya keçirilib. Tədbirdə İstanbulda və Türkiyədə təhsil alan azərbaycanlı tələbələr, eləcə də Türkiyə ictimaiyyətinin nümayəndələri iştirak ediblər.

Azərbaycan və Rusiya arasında siyasi bəyannamə və bir neçə saziş imzalanıb

Dünən Azərbaycan və Rusiya prezidentləri İlham Əliyev və Vladimir Putin təkbətək görüşüb. Görüşdən sonra dövlət başçılarının iştirakı ilə iki ölkənin hökumətlərarası danışıqları keçirilib. APA-nın görüşü izləyən əməkdaşının verdiyi məlumata görə, Azərbaycan prezidenti V. Putinlə görüşündən razı qaldığını bildirib. İ. Əliyev danışıqların ikitərəfli əməkdaşlıq və regional əlaqələrin inkişafı istiqamətində aparıldığını deyib: “Danışıqların aparıldığı bütün məsələlərdə qarşılıqlı anlaşma və mövqe bərabərliyi hiss olundu. Həm Azərbaycan, həm də Rusiyada iqtisadi inkişaf dinamikdir.  İnanıram ki, bundan sonra da ölkələrimiz arasında münasibətlər daha da möhkəmlənəcək”. Rusiya prezidenti V. Putin isə görüşdə bır sıra beynəlxalq məsələlərdən, o cümlədən Dağlıq Qarabağ münaqişəsindən danışıldığını deyib. İki ölkə arasında iqtisadi əlaqələrin inkişafından danışan V. Putin mal dövriyyəsinin həcminin 1 milyard dollardan artıq olduğunu bildirib. Bundan sonra iki ölkənin dövlət başçısı İlham Əliyev və Vladimir Putin birgə bəyannamə imzalayıblar. Bəyannaməyə əsasən iki ölkə arasında müxtəlif dövrlərdə bağlanmış sazişlər qüvvədə saxlanılıb. Bura qarşılıqlı dostluq, əməkdaşlıq və birgə təhlükəsizlik haqqında, iqtisadiyyatın strateji sahələrində birgə layihələrin həyata keçirilməsinə dair, milli təhlükəsizlik baxımından hərbi və hərbi texniki əməkdaşlıq və digər sazişlər daxil olub. Görüşdə, həmçinin Azərbaycanın baş nazirinin birinci müavini Abbas Abbasov və Sverdlovsk vilayətinin qubernatoru Eduard Rossel ticari-qtisadi və elmi-texniki əməkdaşlıq barədə razılaşmaya da imza atıblar.

◄ 1 2 3 4 ... 16 ► ₪