Kimin sözü daha məntiqlidir?

Bəlkə də adi iş günlərindən biri olacaqdı bu gün,  əgər qəfil telefon zəngi Şəhid ruhlarının etirazını "Azad Qarabağ" vasitəsi ilə millətinə çatdırdığıma görə, sakit olan ürəyimi yeni ittiham qarşısında qoymasaydı. Yazının altında  mənim imzam qoyulsa da, əslində o, şəhid ruhlarının qazilərin bugünkü vəziyyətinə etirazı idi. Sözlərimə şübhə edənlər bir gecə Şəhidlər Xiyabanını ziyarət etsələr,  dediklərimi təsdiq edərlər. Dəfn olunduğu ərazini əyləncə mərkəzinə çevirən bir millətin şəhidi, dilənən qazi taleyini onlara yaşatmadığına görə hər axşam şükr edir öz taleyinə və etiraz edir qazilərin bu gününə.

Zəng edən qardaşımın iradlarına hörmətlə yanaşsam da, etmədiyim səhvə görə təkzib vermək fikrindən uzağam. Nəyi təkzib etməliyəm və niyə təkzib etməliyəm? Bir anlıq təsəvvür edək o təkzibi:

Qazisi dilənən millət şərəflənməli,

Qazisi dilənən məmləkət şöhrətlənməli,

Qazisi dilənən millətin və məmləkətin prezidenti ömürlük bu kürsüyə sahib çıxmalıdır.

Bunu istəyirsiniz, qardaşlarım? Dözümlü millət deyə-deyə mübariz millətimi öz tayfasının nökərinə çevirənlərin sözünü təkrar edim? Yoxsa hər addımında haqqı tapdansa da, susmağa üstünlük verən millətimə "ay mənim ucalardan uca  millətim bu sənin haqqındı" deyərək, başının altına "döz düzələcək" adlı narıncı balınc qoyanlar kimi danışım? Bir özünüz fikirləşin, kimin sözü daha məntiqlidir?

Əgər qazisinin dilənməyinə göz yuman bu milləti bu gün lənətləyirəmsə, sabah qazisi onun haqqını yeyən dövlət məmurunu ayağı altına alıb əzəndə, "qazisi belə olan millət məğlubedilməzdir - deyə hayqıracağım şəksizdir.

Rəbbimiz - vətən sevgisi imandandı - dedi, lakin imanlı olub sevə bilmədik vətəni, satdıq onu dəyər-dəyməzinə. Əməl etmədik tanrımızın bizə buyurduqlarına. Kimsə buna görə rəhmətlə xatırlanacağını düşünürsə, yanılır.

Bütün Qarabağ qazilərinə, o cümlədən də Etimad Əsədova qanı bahasına qazandığı qazilik tituluna görə hörmət edirəm və kiminsə məni Qarabağ qazisinə hörmətsizlikdə ittiham etmək haqqı yoxdur. Etimad Əsədova olan hörmətim  ona bu yazını oxumamağı məsləhət bilirdi. Siyahıda adının birinci yazılması mənə görə çox suları durultmalı idi, əfsus ki, belə olmadı.

Bu milləti tərifləyə-tərifləyə yuxuya verib istədiyini edənlər kifayət  qədərdi. İndi böyük iş olubmu? Bir Yetim, tənqidlə milləti yuxudan ayıltmaq istəyir. Axı itirə-itirə bu millətə "dur" deyən bir dəli tapılmalıdır. Adətən düz söz deyənə ya dəli, ya da qəhrəman deyirlər. Sadəcə bir dəliyəm ki, soruşan lazımdı bu dəlidən - ay dəli kim dilənir, niyə dilənir, bu sənə lazımdır? Dəli! Özünü ağıllı göstərib, kimsə dilənən qazini görüb, sonum belə olacaqsa, neynirəm bu vətəni? - deyəcəyini düşünmə.

Əsrin əvvəlində:

Millət necə tarac olur-olsun, nə işim var,

Düşmənlərə möhtac olur-olsun, nə işim var

- deyən Sabirin ayılda bilmədiyi milləti sənmi ayıltmaq istəriysən?

Yoxdu imzası millətimin imzalar içində - deyə hayqıran Hadidən çoxmu sevirsən bu milləti?

Atama, anama, sevdiyim qıza yalan sata bilsəm də, millətimi aldada bilmərəm. Bu gün o lənətə layiqdisə, bunu deməmək heç də millətçilik nişanəsi deyil. Səhvimi deməyən dost düşmənimdən də qorxuludur - belə deyib aqillər, bunu unutmayın. 

Bir də unutmayın ki, yer insanı şərəfləndirməz, əksinə, insan yeri şərəfləndirər. Bu gün Etimad Əsədovun adı yazılan yer şərəfləndi, çünki ona Azərbaycanın  baş qazisinin adı yazıldı.  Adların yanaşı yazılması heç də əməllərin eyniləşdirilməsi anlamına gəlməməlidir. Mənim nə yazdığımdan asılı olmayaraq, kimin kimə işlədiyi hamıya aydındır. Bir də keçinin keçi ayağından asılacağı həqiqətini Bəhlul Danəndə dərk edib rahatlanırsa, niyə kimlərsə mənim yazdıqlarımdan narahat olmalıdır.

Qazi qardaşımın məni ANS-ə rəğbət bəsləməkdə qınaması da bir fikir olaraq kökündən yanlışdır. Döyüşü alnımıza yazan bu kanalın etdiklərini dana bilmərəm, lakin ANS-çilər millətimin nümayəndəsi olduqları üçün, qazisi dilənən millətin lənət payından özüm qarışıq onlara da pay düşür.

Nəbiyev Sadəddin Famil oğlu - dilənən Qarabağ qazisi. Qaziliyimi sübut etsəm, pul verərsənmi? - deyən köhnə döyüşçüdür. Acı olduğuna görə qəbul etmək istəmədiyimiz həqiqətdir.

Yetim yazdıqlarını havadan yazmır. Yazdıqlarım həqiqətə söykənməsəydi, bu gün ən azı lal olub susardım.

Mənə qazilik arzulayan qardaşım! Allaha yalvarıram ki, arzum və arzun ürəyimizdə qalmasın! Amma düşünmə ki, qazi olmadan qazilərin çəkdiklərini anlaya bilmərəm.

Yetimlərin itiriləsi heç nəyi olmur. Ona görə kimdən və niyə çəkinib həqiqəti yazmamalıyam. Yazdığım həqiqətdən inciyə biləcək hər bir qaziyə haqqını halal et, qardaşım - deyə müraciət edirəm. Qardaşın qardaşdan incimək haqqı olmasa da, mən sizdən incidim. Axı niyə unutduz ki, siz qazilər diri şəhidlərsiz. Biz şahidlərin siz şahidləri ittiham etmək haqqı yoxdur. Siz əbədi rəhmətə sahib olmaqla lənət payından uzaqsınız.

Azərbaycan yalanlar vadisidirmi? Burda gerçəyə yer yoxmu?

Yetim Qacar

İradə İbrahimova Daxili Qoşun hissələrində verdiyi konsertləri davam etdirmək fikrindədir

Kifayət qədər  populyar və sevilən müğənni İradə İbrahimova birdən-birə havaların kəskin dəyişməsi ilə əlaqədar olaraq, Daxili Qoşun hissələrində verdiyi konsertləri dayandırıb. Daim yeni sürprizlərlə pərəstişkarlarını sevindirən İradə xanım, bilirik ki, keçən ilin oktyabr ayından başlayaraq, Daxili Qoşunların dəstəyi ilə, Daxili Qoşun hissələrində konsertlər verirdi. Biləcəridə keçirilən ilk konsertdən sonra, vətənpərvər müğənni layihəni davam etdirərək, Şəki, Lənkəran, Quba və Zaqatala rayonlarında əsgərlər arasında bir-birinin ardınca uğurlu konsert proqramları ilə çıxış edib. Hər yerdə böyük sevinc və hərarətlə qarşılanan müğənni, hətta bü münasibətlə Xanım İsmayılqızına bir neçə mahnı da - "İgidim", "Azərbaycan" yazdırmışdı.

İradə xanımın mətbuat katibi ilə əlaqə saxlayaraq öyrəndik ki, hazırda müğənni Vüqar Camalzadənin "Sevgi nağılı" mahnısının klip çəkilişlərinə başlayır. Klipin rejissoru Samir Fərzəlibəyovdur.

İradəsevərlərin nəzərinə çatdıraq ki, o, sözləri Baba Vəziroğluna məxsus olan "Bilsən də, bilməsən də" mahnısının klip çəkilişlərini də artıq başa çatdırıb. Müğənni klipin təqdimat mərasimini Məhərrəmlik ayından sonraya saxlayıb. İradə həmçinin "İgidim" mahnısına da klip çəkdirməyi düşünür.

Onu da deyim ki, həmişə yenilik axtaran və çox məhsuldar işləyən sənətçi, Daxili Qoşun hissələrində verdiyi konsertləri hələ dayandırmaq fikrində deyil. Sadəcə, havaların dəyişməsi bu işi bir qədər təxirə salıb. Əsgərlər üçün verdiyi konsertlərdən böyük zövq duyan sənətçi, bu layihəni davam etdirərək, yaxın gələcəkdə Naxçıvan, Hacıqabul, Qazax və Gəncə şəhərlərində yerləşən Daxili Qoşun hissələrində konsert verməyi planlaşdırır.

Nüşabə

Eşitsin cahan

Azərbaycan əsgəri,
Döyüş meydanında göstər hünəri.
Qaytar torpaqları, gəl qaytar geri.

Vermə düşməninə, vermə sən aman
Zəfər sorağını eşitsin cahan.

Xətayi qılınclı, Həzi tanklısan,
Babək qeyrətlisən, iftixarlısan.
Hücum et düşmənə kəsginən başın
Məhv eylə birlikdə  dostun, qardaşın.

Vermə yağılara vermə sən aman,
Zəfər sorağını eşitsin cahan.

Göstər əməlinlə sən qeyrətini,
Qalib əsgər kimi yay şöhrətini.
Görsünlər qoy sənin şərafətini,

Vermə yağılara, vermə sən aman
Qələbə sədanı eşitsin cahan.

Əvəz Süleymanoğlu
(Tağıyev)

Müsabiqə

Qarabağ Azadlıq Təşkilatı  Qarabağ mövzusunda ən yaxşı publisistik, analitik yazı, şer, plakat, karikatura müsabiqəsi elan edir. Ən yaxşı nümunələr “Azad Qarabağ” qəzetində çap olunacaq, ilin sonunda isə hər nominasiya üzrə qaliblər müəyyən ediləcəkdir. Arzu edənlər işlərini qəzetimizin ünvanına göndərə bilərlər.

Təşkilat komitəsi

INTERNATIONAL BANK OF AZERBAIJAN
Yasamal Branch

Address:  14h., 533bl., Inshaatcilar Str., Baku 370073, Azerbaijan.
Tel./Fax:  +(994)(12) 4387486, 4397208, 4316398

Intermediary Bank:  Citibank NA, New York, USA
Corr. account: 36083186
SWIFT: CITIUS33

Beneficiary Bank:  International Bank of Azerbaijan Republic
Yasamal Branch kod 805562
SWIFT: IBAZAZ2X

Beneficiary:   NAGI AKIF QAZAX INN 2000557822
USD only Account #: YSM-673785-USD-3822-01

◄ 1 ... 14 15 16 ► ₪