Erməni terroru

16 sentyabr 1989-cu il - "Tbilisi-Bakı" sərnişin avtobusu partladılmış, 5  nəfər həlak olmuş, 25 nəfər yaralanmışdır.

10 avqust 1990-cı il - "Tbilisi-Ağdam" sərnişin avtobusu partladılmış, 20 nəfər həlak olmuş, 30 nəfər yaralanmışdır.

Arayış: Cinayətlərin icraçıları A.Avanesyan və M.Tatevoçyan həbs olunmuşlar.  Müəyyən edilmişdir ki, bu terrorçu qrup tərəfindən 1991-ci il iyul ayının 17-də "Ağdam-Tbilisi" avtobusunda partlayış törədilməsi planlaşdırılmış, lakin onların həbsi buna imkan verməmişdir.

30 may 1991-ci il - Rusiya Federasiyası Dağıstan Respublikasının Xasavyurd stansiyası yaxınlığında "Moskva-Bakı" sərnişin qatarı partladılmış, 15 nəfər həlak olmuş, 22 nəfər yaralanmışdır.

31 iyul 1991-ci il - Dağıstan Respublikasının Temirtau stansiyası yaxınlığında "Moskva-Bakı" sərnişin qatarı partladılmış, 16 nəfər həlak olmuş, 20 nəfər yaralanmışdır.

8 yanvar 1992-ci il - Türkmənistandan Krasnovodsk (indiki Türkmənbaşı şəhəri) - Bakı marşrutu ilə sərnişin daşıyan dəniz barəsində törədilmiş terror aktı nəticəsində 25 nəfər həlak olmuş, 88 nəfər yaralanmışdır.

28 fevral 1992-ci il - Rusiyanın Şimali Qafqaz ərazisində Qudermes stansiyası yaxınlığında "Kislovodsk - Bakı" sərnişin qatarı partladılmış, 11 nəfər həlak olmuş, 18 nəfər yaralanmışdır.

2 iyun 1993-cü il - Bakı dəmir yolu vağzalında sərnişin qatarının vaqonu partladılmış, dövlətə külli miqdarda maddi ziyan dəymişdir.

Arayış:  Partlayışın icraçısı Rusiya vətəndaşı İqor Xatkovski Bakıda həbs olunmuş və etiraf etmişdir ki, o Ermənistan Respublikası Milli Təhlükəsizlik Nazirliyi kəşfiyyat şöbəsinin rəisi polkovnik Can Ohanesyan tərəfindən məxfi əməkdaşlığa cəlb edilərək, casusluq və terrorçuluq məqsədilə Azərbaycana göndərilmiş, böyük insan tələfatı ilə nəticələnəcək partlayışlar törətmək tapşırığı almışdır. Azərbaycan Respublikası Milli Təhlükəsizlik Nazirliyi və Rusiya Federal Əks-Kəşfiyyat Xidmətinin keçirdiyi birgə tədbirlər nəticəsində Can Ohanesyan, onun müavini mayor  Aşot Qaloyan, Rusiya Federal Əks-Kəşfiyyat Xidmətinin əməkdaşı mayor Boris Simonyan 1994-cü il mayın 13-də Moskva şəhərində tutulmuşlar. İstintaq sübut etmişdir ki, həmin qrup  1991-1994-cü illərdə Rusiya ərazisindən Bakıya gələn dəmir yolu sərnişin qatarlarının partladılmasını təşkil etmiş, nəticədə 47 adam həlak olmuş, 83 nəfər yaralanmışdır.

1 fevral 1994-cü il - Bakı dəmir yolu vağzalında "Kislovodsk-Bakı" sərnişin qatarında terror aktı törədilmiş, 3 nəfər həlak olmuş, 20 nəfər yaralanmışdır.

9 fevral 1994-cü il - Azərbaycanın Xudat stansiyasında ehtiyat yolda dayanan yük vaqonu partladılmış, dövlətə külli miqdarda ziyan dəymişdir.

19 mart 1994-cü il - Bakı metropolitenin "20 yanvar" stansiyasında törədilmiş partlayış nəticəsində 14 nəfər həlak olmuş, 49 nəfər yaralanmışdır.

Arayış: Müəyyən edilmişdir ki, terror aksiya Ermənistan kəşfiyatı tərəfindən hazırlanmış separatçı "Sadval" ləzgi təşkilatının üzvləri tərəfindən  keçirilmişdir. İstintaq və məhkəmə ilə yetirilmişdir ki, 1992-ci ilin əvvəllərində Ermənistan Respublikasının xüsusi xidmət orqanları "Sadval" təşkilatı ilə gizli əlaqə yaratmış, onu maliyyələşdirərək, Azərbaycana qarşı istiqamətləndirilmişlər. 1992-ci ildə Ermənistandan Dağıstana "Sadval"ın yaraqlıları üçün  vertolyotlarla külli miqdarda silah, döyüş sursatı, partlayıcı maddələr gətirilmiş və Azərbaycanın  şimal rayonlarında təşkilatın fəallarına paylanmışdır. 1992-1993-cü illərdə erməni kəşfiyyatı tərəfindən Ermənistan Respublikasının Nairi və Arzni rayonlarında, eləcə də Dağıstan Respublikasının ərazisində gizli hərbi təlim-məşq  bazaları yaradılmış, bu düşərgələrdə 100-ə yaxın "sadvalçı" Ermənistandan gəlmiş təlimatçıların rəhbərliyi altında xüsusi terror-təxribat hazırlığı keçmişdir. Həmin terrorçuların 30 nəfər Bakı metropolitenin "20 Yanvar" stansiyasındakı partlayışla əlaqədar cinayət məsuliyyətinə cəlb olunmuşdur.

13 aprel 1994-cü il - Dağıstan Respublikasının "Daqestanskie Oqni" stansiyası yaxınlığında "Moskva-Bakı" sərnişin qatarı partladılmış, 6 nəfər həlak olmuş, 3 nəfər yaralanmışdır.

3 iyul 1994-cü il - Bakı metropolitenin "28 May" və "Gənclik" stansiyaları arasında elektrik qatarında partlayış törədilmiş, 14 nəfər həlak olmuş, 54 nəfər müxtəlif dərəcəli bədən xəsarəti almışdır.

Arayış: Terror Azərbaycan Respublikasının vətəndaşı, milliyətcə ləzgi Aslanov Azər Salman oğlu tərəfindən törədilmişdir. A.Aslanov Qarabağ uğrunda gedən döyüşlər zamanı əsir düşmüş və Ermənistan xüsusi xidmət orqanları tərəfindən məxfi əməkdaşlığa cəlb edilmişdir. İstintaq və məhkəmə prosesində sübuta yetirilmişdir ki, Aslanovun terrorçu kimi hazırlanmasının "ideoloji təminatında" erməni separatçı-millətçi ekstremizminin ideoloqlarından biri, publisist Zori Balayanın və Dağlıq Qarabağ erməni separatçılarının lideri, hazırda Ermənistan Respublikasının prezidenti Robert Koçaryanın iştirakı olmuşdur.

1994-cü ilin may ayından qüvvədə olan atəşkəs, həmçinin Azərbaycan tərəfinin göstərdiyi təşəbbüslər faktiki surətdə eyni vaxtda münaqişə zonasında döyüş əməliyyatlarının və Azərbaycanın cəbhə xəttindən uzaq rayonlarında Ermənistan Respublikasının terrorçuluq fəaliyyətinin dayandırılmasına şərait yaratdı. Bu bir daha göstərir ki, həm birbaşa hərbi təcavüz, həm də dinc əhaliyə və mülki obyektlərə yönəlmiş terrorçuluq Ermənistan Respublikasının Azərbaycan Respublikasına qarşı yeridilən vahid dövlət siyasətinin tərkib hissələridir. Erməni tərəfinin münaqişənin sülh yolu ilə nizama salınmasını süni şəkildə uzatması sübut edir ki, regionda vəziyyət gərginləşəcəyi halda Ermənistan Respublikası dinc əhaliyə qarşı terror taktikasına dövlət siyasətinin tərkib hissəsi kimi yenidən əl ata bilər. 

◄ 1 ... 15 16 ► ₪