Qarabağa məktublar

Əvvəla salam, Qarabağ! Halımı soruşsan, halım fərq etmir Əli Nağıyevin halından. Əli müəllimin nazir kreslosu üçün burnunun ucu necə göynəyirsə, mən də o  cür göynəyirəm yağı tapdağında qalan elatlar üçün. Bakıda nə var-nə yox soruşma. Canından iraq, quş qripini də gətirdilər Bakıya.  İndi görək müxalifət qəzetləri nədən yazacaq. Elə hey yazırdılar ki, ölkədə yenilik yoxdur, səhiyyə bərbad vəziyyətdədir. İndi həm həkimlərin, həm də mollaların mobil telefonları söndürülmür.  Bu iki "zəhmətkeş" zümrə  xalqa 24 saat ərzində öz xidmətlərini təklif edirlər.

Yəqin ki, keçən həftə sənə məktub yazmadığıma görə, nigaran qalmısan. Düşünmüsən ki, Yetimin bir vərəqlik mürəkkəbi var idi, yazdı qurtardı.  Amma  məsələ sən düşündüyün kimi deyil. Birinci məktubumu ələ keçirib oxuyan zəhmətkeşlər ordusu gecə-gündüz bilmədən etiraz aksiyaları keçirdilər ki, bəs niyə Qarabağa məktub yazıb bizdən şikayət etmisən. Əgər düz adamsansa,  özün də cavan oğlan, məmləkətdə qız qəhətdir mesaj yazmağa, götürüb Qarabağa məktub yazırsan? Mən də canımı dişimə tutub, bir söz demədən dözdüm. Axı mən dözümlü millətin nümayəndəsiyəm. Millət dedim, yadıma Milli Məclis düşdü. Gözün aydın, Qarabağ! Müxalifət deputatları da getdi Milli Məclisə. Onsuz da müxalifət bekarçılıqdan milçək öldürürdü. Özü də "Səs" qəzeti ilə. İndi, baxma, maaş alanda, dominodan-zaddan alıb oynayarlar. Amma məndən olsa, onları MM-nin qapısından içəri buraxmazdım. Çünki bilirəm, Cəlal babamın onlara qarşı allergiyası var. O gün kişi onları görəndə necə qaşınıbsa, dişinin dibindən çıxanı desə də, yenə də sakitlik tapmayıb. Müxalifət qəzetləri də yazırlar ki, sən demə, Cəlal bu sözləri komitə sədrinə deyirmiş. Əsas məsələ ata olmaq deyil, atalar məsəli bilməkdir. Bunlar bilmirlər ki, Cəlal müəllim üzünü kimə tutub desə də, sözünü yenə də müxalifətə deyir. Atalarımızın bir yaxşı misalı var, "qızım sənə deyirəm, gəlinim, sən eşit!" İndi ay müxalifət, sən də eşit ha, bu gündən bir gün sənin üçün də var. Özünüz bilirsiniz ki, mənim söyüş söyməyimə "dobro"nu rəhmətlik sağlığında vermişdi. 

Bizim bu müxalifət deputatlarına bir deyən gərək, əgər gedəcəkdinizsə, kimə naz atırdınız? Ara yerdə Lalə xanım mandatından uzaq düşdü. Siz də utanmaz-utanmaz getdiniz Məclisə. İndi isə maaş davası döyürsünüz ki, bəs keçən ayın da maaşını verin alaq. Yoxsa uşaqlarımız acından kompüter oynayırlar.

Qarabağ! Özünü azad edə bilməsək də, qəzetini azad etdik. Bəzi ağzıgöyçəklər deyirlər ki,  İlham əmim yeni iş yerləri açmır. "Azad Qarabağ" qəzeti yeni iş yeri deyil, bəs nədir. Azından 30 nəfər axşam evinə bir parça çörək pulu aparır. İlham əmi tələsib Qarabağı tez azad etsəydi, nə "Azad Qarabağ" qəzeti olardı, nə də 30 nəfərin gündəlik çörək pulu.

Qarabağ! Keçən həftə həm də şəhid balan Xocalının ildönümü idi.  İqtidar nümayəndələrinin ürəyi elə dolmuşdu ki,  ayın 26-nı gözləməyə səbrləri çatmayıb, 25-i yığışıb ildönümünü verdilər. Görənlər deyirlər ki, ağlamaqdan gözləri şişmiş Ramil Usubov, rəhmətlik öndərin qəbrinə and içərək  deyib ki, bu qanı yerdə qoymayacağam. Başqasını bilmirəm, mən o kişiyə inanıram.  Dediyini edəndir də bizim müxalifətdən fərqli olaraq. Deyirdi  meydanda çadır qurmağa qoymayacağam. Qoymadı da. Kişi sözünə düz adamdır. Çadır demiş, müxalifət bir ətək qrant pulu verib, çadır almışdı ki, bəs inqilab edəcəyəm.  İndi də qalıb üstlərində. Rənginə görə alan da yoxdur. Ağıllarına da gəlmir ki, qara rəngə boyayaraq, satıb pul eləsinlər. Yenə baxma, İsa Qəmbər öz payına düşəni sata bilsə, bir ürəkdolusu qəlyan çəkər.

Qarabağ! Ölülər elə bilir ki, dirilər halva yeyir. Yəqin elə düşünürsən ki, Şəkinin, Şamaxının əli nöyütə batıb, bircə sən qalmısan nöyütsüz/.

İki milyon əhali tutumu olan Bakıya üç milyon yarım əhalini necə yerləşdirmişiksə, yazıq Hacıbala müəllim, nə qədər dirək verirsə, sürüşmənin qarşısını ala bilmir.  Bakıda göydələnlərin tikilişi belə sürətlə davam etsə, bütün rayonların əhalisini Bakıya köçürüb, oraları verəcəyik icarəyə. Nə çoxdur icarəyə torpaq istəyən.  Ermənilər deyib ki, guya sən gecə-gündüz "Naxçıvan" deyib dad edirsən. İndi Qarabağa xatir, deyin Naxçıvanın qiymətini, verək, o da olsun bizim. Gürcülər də Zaqatala və Balakənin behini Gürcüstandakı azərbaycanlıların əlinə verib, bu gün-sabah göndərəcəklər üstümüzə.

Lap yadımdan çıxmışdı, "Real" futbol klubunun prezidenti də istefa verdi. Deyirəm, sağ əli mənim əmimin başına. Onsuz da, nə qədər Azərbaycan adlı tağımın Səfər Əbiyev kimi hücumçusu var, rəqib qapısında top gözləməyə dəyməz. Hələ mərkəz müdafiəçisi Eldar Mahmudovu demirəm. Lap elə Tərlan Əhmədov kimi topu öz qapımıza vurmaqdan ləzzət alır. Ölüm ayağında olan Əli İnsanovu tutmağa nə var ki? Bacarırsansa, gedib Koçaryanı tut. Deyim, kişinin oğlu işləyir də.

O gün Blaxin də uşaqları ilə Bakıya gəlmişdi. Tofiq Bəhramov adına stadionunu bostana bənzədən ötənlərin ulduzuna bir deyən olmadı ki, oynaya bilmirsənsə, demə yerim dardır. Fateh Terimin taktikasından baş çıxarmağa nə var ki?! Bacarırsan Şahin Diniyevin qurduğu taktikaya qarşı oyna. Öz aramızdı, Şahin Diniyevin bir sirrini sizə açım. O gəncləşdirmə siyasətini prezidentimizdən oğurlayıb. Amma gərək unutmasın ki,  gənclərimiz arasında da üzüdönüklər olur. Deyirlər, "ilan vuran ala çatıdan qorxar". Yəni, nazir Fərhad Əliyevi görən, qapısı Fərhad Vəliyevdən qorxar. Düzdür, Fərhad Vəliyev hələ üzüdönüklük etməsə də,  arabir meydanda rəqs etmək bacarığını nümayiş etdirir. Yenə Allah üzümüzə baxdı ki, Şahin müəllimin siftəsini kor eləmədi.

Qarabağ! Sözüm qurtarmasa da, məktubu tamamlamaq istərdim. Özün bilirsən, mənim söz ehtiyatım  bizim nazirlərin vəd ehtiyatı kimi tükənməzdir. Sadəcə olaraq, vaxtım daralır. "İç xəbər"ə baxmaq istəyirəm. Deyirlər, Buzovnada yeni əyləncə mərkəzi tikəcəklər.  İndidən yerini öyrənib, deyim Əbülfəz müəllimə ki, gələn il Xocalının ildönümündə qonaqlığı orada versin.

Özündən muğayat ol. Koçaryanın qarınağrısı kəsilən kimi, sənin məsələni həll etməyə çalışacağıq. Bu sözü sənə deyirəm, özgələr bilməsin. Deyirlər ki, prezidentlərin görüşündə çay işinə baxan, bizim müxalifətin nümayəndələrindən olub. Özü bilə-bilə Koçaryana qaynamamış çay gətirib ki, söhbəti axıra çatdıra bilməsin. Eybi yox, qoy müxalifət bildiyindən əl çəkməsin. Elmar Məmmədyarov bu dəfə danışıqlardan əvvəl Koçaryana pampers geyindirib, müxalifəti "mat" vəziyyətinə salmasa, üzüm ağ olsun qazan qarası kimi. Necə ki, Sərdarla Aydının üzü qaradır Rəsul müəllimin yanında.

Öpürəm, YAP-çı ayağı dəyməyən, saxta seçki keçirilməyən hər qarışından.

Rauf Mirqədimova görə narahat olma. O Azərbaycan türkü deyil, türk cildinə girmiş tülküdür.

Torpağı işğal olunan millət silahlanmalı,

Torpağı işğal olunan məmləkət hərb qanunları ilə yaşamalı,

Torpağı işğal olunan "millət"in və məmləkətin prezidenti döyüş əmri verməlidir.

Silahlan millətim!

Yaşamını dəyiş, məmləkətim!

Döyüş əmri ver, "millət"imin və məmləkətimin prezidenti.

Bizim Qarabağımız işğal altındadır.

Bu səhifəyə baş nazir Artur Rəsizadənin, Bakı Dövlət Universitetinin rektoru Abel Məhərrəmovun, Prezidentin İcra Aparatının rəhbəri Ramiz Mehdiyevin nəinki oxumağı, hətta baxmağı da məsləhət deyil.

Yetim Qacar

Bayatılar

Müsabiqə

Qarabağ Azadlıq Təşkilatı  Qarabağ mövzusunda ən yaxşı publisistik, analitik yazı, şer, plakat, karikatura müsabiqəsi elan edir. Ən yaxşı nümunələr “Azad Qarabağ” qəzetində çap olunacaq, ilin sonunda isə hər nominasiya üzrə qaliblər müəyyən ediləcəkdir. Arzu edənlər işlərini qəzetimizin ünvanına göndərə bilərlər.

Təşkilat komitəsi

◄ 1 ... 14 15 16 17 ► ₪