Qarabağ məhbuslarına azadlıq!
Ramil Səfərov	Rövşən Bədəlov	Xızır Marqaşvili	Fariz Hacıyev	Müşfiq Qurbanov
Əlirza Babayev	Firuz Babayev	Yaşar Məmmədov	Məmməd Məmmədov	Ədalət Ağayev
Məhəmməd Məmmədov	YA QARABAĞ YA ÖLÜM!

İdmançı partizan

Bu dəfə haqqında danışacağım partizan tanınmış idmançı, boks üzrə idman ustası Ədalət Bəylər oğlu Ağayevdir. Ədalətin anası Gülayə xanım redaksiyamıza gələrək, oğlu haqqında ürək ağrısıyla, yana-yana danışırdı. O özü ilə gətirdiyi, Ədalətə məxsus 20 medalı (7 qızıl, 5 gümüş, 8 bürünc), 45 diplomu və fəxri fərmanı (hələ dedi ki, bu hamısı deyil, yarısı evdədir) göstərib dedi: «Bunları qazanan oğul, Azərbaycanın bayrağını həmişə dalğalandıran, onun adını dünyanın hər yerində tanıdan idmançı, bu gün hansı günahı işlədib ki, həbsdə yatır?» Diplomlara, fəxri fərmanlara bir-bir nəzər salıram. 1988-ci ildən başlayaraq, 2001-ci ilə qədər müxtəlif ölkələrdə keçirilən beynəlxalq yarışların qalibiyyət göstəriciləri. Əksəriyyəti birinci yerin diplomudur. 1988-ci ildə (VIII-ci sinif şagirdi olanda) Azərbaycan çempionu olub. XI sinifdə oxuyanda SSRİ birinciliyi qazanıb. Həmin vaxt oxuduğu 3 saylı Sumqayıt şəhər məktəbinin şagirdinə verdiyi fəxri fərman da qarşımdakı diplomların içərisindədir. 1991, 1993-cü illərdə Türkiyədə, dəfələrlə ayrı-ayrı illərdə Rusiyada, İranda keçirilən yarışlarda  I yerin sahibi olub. Yuxarıda qeyd etdiyim kimi diplomlar o qədər çox idi ki, hamısına nəzər yetirib, bir-bir bura qeyd etmək mümkün deyil. Bircə onu deyə bilərəm ki, 22 il boksla məşğul olan, iki dəfə  SSRİ idman ustası adına layiq görülən, 20 medal, çoxlu sayda diplomla təltif olunan Ədalət Azərbaycanın nüfuzunu yetərincə qaldırıb, onun şərəfini qoruyub.

Ədalət Ağayev 1973-cü ildə Sumqayıt şəhərində doğulub. Sumqayıt şəhər 3 saylı orta məktəbi bitirib. Ailədə üç qardaşdırlar – üçü də idmançı. Azərbaycan yığma komandasının tərkibində olublar. Hər üçü ailəsinə, xalqına başucalığı gətirib. İdmana məhəbbət onlara ataları Bəylər kişidən keçib. Bəylər kişi ali təhsilli müəllim olsa da, futbolla məşğul olub. Sumqayıtın «Xəzər» komandasında bir neçə il oynayıb. Oğlanları atalarından fərqli olaraq, boksu seçiblər. Hazırda Bəylər kişi təqaüdçü olmaqla yanaşı, həm də Sumqayıtda – kimyəvi kombinatda briqadir işləyir.

Boksla əvvəlcə böyük qardaş Malik məşğul olub. Sonra kiçik qardaşlarını da həvəsləndirərək ardınca aparıb. Malik də dəfələrlə beynəlxalq yarışlarda birinci yerə çıxıb, SSRİ çempionu olub. Ana oğlanlarından qürurla danışır: «Malik  beynəlxalq yarışlardan qayıdanda heç vaxt soruşmurduq ki, neçənci yeri tutub. Çünki bilirdik, o həmişə birinci yeri tutur. Oğlanlarımın üçü də heç vaxt xarici ölkələrdə keçirilən beynəlxalq yarışlardan uduzub qayıtmayıblar, ən aşağısı 3-cü yerə sahib olublar. Kiçik oğlumun bir gözü görmür, boksda zədə alıb. Balalarım həmişə Azərbaycanın adını yüksəldiblər».

Orta məktəbi bitirdikdən sonra Ədalət Azərbaycan Dövlət Bədən Tərbiyəsi İnstitutuna daxil olub. İnstitutu bitirəndən sonra bir il əsgəri xidmətdə olub. Həbsə alınana qədər idmanla məşğul olaraq, gömrükdə və AzPetrol-da işləyib. Partizan yoldaşlarından fərqli olaraq, Ədalət Gürcüstana hərbi təlim keçməyə getməyib. Anasının dediyinə görə, partizan hərəkatına başlamaq istədiklərini yoldaşları kimi o da ailəsindən gizli saxlayıb. Bu fikrə necə düşdüyünü Gülayə  xanım sonradan öyrənib: «Ədalət bir gün yoldaşlarıyla birlikdə ingilislərin Qarabağ əsirlərindən, onların başlarına açılan müsibətlərdən çəkdikləri kadrlara baxıb. Onlar gördüklərindən – ermənilərin qız-gəlinlərimizin başlarına gətirdikləri vəhşiliklərdən dəhşətə gəlib sarsılmışlar. Və hamısı bir yerdə and içib ki, Qarabağ alınana qədər vuruşub ermənilərdən heyf çıxacaqlar. Həmin lent məhkəmədədir. Onların heç birinin günahı yoxdur. Bu cür qeyrətli oğullarla mən fəxr edirəm.  Oğlumdan bircə ona görə incimişəm ki, bunları məndən gizlin edib».

Ədalət evlidir. İki oğlu var. İkinci oğlu dünyaya təzə gəlib, hələ adını belə qoymayıblar. İstəyirlər ki, adını Ədalət özü qoysun. Böyük oğlu Abdulhaq doğulandan bir neçə gün sonra, 2003-cü il avqustun 13-də  Sumqayıtda, dəniz sahilində idmanla məşğul olduğu zaman Ədaləti həbs ediblər. Elə həmin gün onun həm atası, həm də qayınatası evində axtarış aparıblar. Anasının dediklərindən: «Evdə oturmuşduq. Birdən qapı döyüldü. Qapını açanda evə 25 nəfərə qədər adam girib, yorğan-döşəyin içinəcən töküb axtardılar. Silah axtarırdılar, ancaq Qarabağın xəritəsindən və Ədalətin sənədlərindən başqa əllərinə bir şey keçmədi.  Sən demə, oğlumun qayınatası evində də axtarış aparıblar, heç nə tapmayıblar».

Ədalət həbs olunanda da üstündə silah olmayıb. Ana sonradan öyrənib ki, oğlu silah-sursat almaq üçün maşınını satıb və əlavə olaraq 3 min ABŞ dolları verib. Partizanlar aldıqları silahdan  hələ istifadə etməsələr də, bir dəfə Qarabağa gedib, oranın xəritəsini çəkərək, özləri üçün müəyyən plan hazırlamağa müvəffəq olublar. Axtarış zamanı Ədalətin evindən tapılan da elə həmin xəritə olub: «Oğlum Ədalət türk vətəndaşıdır. İstəsə gedib orada da yaşaya bilərdi, ancaq qeyrəti götürməyib, partizanlara qoşuldu. Oğlum başqa cür hərəkət edə bilməzdi,  şəhidlərimizin qanı yerdə qalmamalıdır. Ədalət özü də məhkəmədə hərəkətindən peşman olmadığını dedi. Elə hamısı belə danışdı, tək Ədalət yox. Nə pis iş tutublar ki, peşman olalar».

Ağır Cinayətlərə Dair Məhkəmə Ədaləti əvvəlcə dövlət çevrilişində günahlandıraraq 11 il iş kəsib. Baş prokuror Zakir Qaralovun qəbulunda olduğunu söyləyən ana, işin  təzədən araşdırılaraq, QAT-ın, hüquq müdafiəçilərinin, millət vəkillərinin səyi nəticəsində həbs müddətinin 8 ilə endirildiyini bildirdi. Sonra Apellyasiya Məhkəməsinə müraciət edilib və onlar cəmi 6 ay güzəşt ediblər: «Mən heç 6 ay güzəştə razı olmadım. Azərbaycanın adını yüksəklərə qaldıran idmançı üçün 6 ay güzəşt nədir ki?! Bu mənirm oğlum üçün təhqirdir. Apellyasiya Məhkəməsindən sonra Ali Məhkəməyə müraciət etdik. Onlar da mənim xəstə olduğumu (şəkər xəstəsiyəm) nəzərə alıb, bir il cəzanı azaltdılar, 6 il yarımı qaldı».

Artıq iki il yarımdır, Ədalət həbsxanadadır, hələ dörd il cəza çəkməlidir. Ancaq Ədalətlə ayda iki dəfə baş çəkib görüşmək mümkündür. Üç ayda bir dəfə isə ailəsi üç günlüyə onunla birlikdə qala bilər. Ancaq ayda iki dəfə oğlunu görmək ana üçün kifayətdirmi? Vətən üçün canını əsirgəməyən, torpaq təəssübü çəkən qeyrətli oğullar böyüdən ana, indi iztirab içərisindədir: «Oğlumu həbsxanada müxtəlif bəhanələrdə tez-tez karserə salırlar. Ordan çıxanda ciyəri xəstə olacaq. Mən xəstə oğul böyütmüşəm?!»

Orxan

◄ 1 2 3 ... 17 ► ₪