Qarabağ Azadlıq Təşkilatının Ağsaqqallar Şurasının üzvü, alim və ziyalı Teymur Novruzoğlunun 80 yaşı tamam oldu.

Qarabağa olan böyük sevgisi, qəlbindəki yüksək vətənpərvər hissi Onu QAT-ın fəaliyyətində bütün varlfığı ilə iştirak etməyə sövq edir.

Teymur müəllimin daxili qüruru və ləyaqəti gənclərə əsl örnəkdir.

Hörmətli Teymur müəllim, 80 illik yubileyiniz münasibətilə, Sizi ürəkdən təbrik edir, Qarabağ torpaqlarının azad olunması uğrunda aparılan mübarizədə uğurlu nəticələr arzu edirəm.

QAT sədri  Akif Nağı

QAT Macarıstan hakimiyyətinə xəbərdarlıq edir

Budapeşt şəhər məhkəməsinin son qərarı ilə bağlı QAT-ın qəbul etdiyi bəyanatda bildirilir:

Azərbaycan ordusunun zabiti Ramil Səfərovun Budapeşt şəhərində aparılan məhkəmə işinin gedişi narahatçılıq doğurur. Məhkəmə açıq-aydın qərəzli mövqedən çıxış edir. Azərbaycan tərəfinin arqumentləri, hadisənin törənmə səbəbləri və motivləri nəzərə alınmır. Son məhkəmə prosesində obyektivlikdən uzaq olan 4-cü ekspertiza rəyinin qəbul olunması, 2 ekspertiza rəyinin nəzərə alınmaması isə heç bir ölçüyə sığmır. Budapeşt şəhər məhkəməsinin son qərarını, Ramil Səfərovu müdafiə tərəfinin vəsadətlərinin qəbul olunmamasını Ermənistan hakimiyyətinin sifarişi ilə Ramil Səfərova divan tutmaq, ona ən ağır cəzanın verilməsi cəhdi kimi qiymətləndiririk.  Macarıstan hakimiyyəti Ermənistan rəhbərlərinin, erməni lobbisinin təzyiqləri qarşısında dayana bilmədi, haqq-ədalət mövqeyindən deyil, siyasi konyuktur maraqlarından çıxış etdi.

Ramil Səfərovun taleyi ilə bağlı vəziyyətin bu həddə çatmasının məsuliyyəti Azərbaycan hakimiyyətinin üzərinə düşür. Hakimiyyət vaxtında zəruri tədbirləri həyata keçirmədi, diaspor təşkilatlarının imkanlarından səmərəli istifadə olunmadı. Əksinə, Xaricdə Yaşayan Azərbaycanlılarla iş Üzrə Dövlət Komitəsinin rəhbərliyinin məsuliyyətsiz bəyanatları diaspor təşkilatlarımızın hər hansı addım atmaq cəhdlərinin qarşısını aldı. Erməni təşkilatlarının hərtərəfli fəaliyyətinə rəğmən diasporamız bu proseslərdən kənara çəkildi.

Qarabağ Azadlıq Təşkilatı Budapeşt şəhər məhkəməsinin son qərarını qətiyyətlə pisləyir və Macarıstan hakimiyyətindən erməni təzyiqləri altında formalaşmış mövqeyini dəyişdirməyi tələb edir. Biz Azərbaycan vətəndaşına qarşı  ədalətsiz mövqeni heç kəsə bağışlamayacağıq. Hələ vaxt var, Budapeşt şəhər məhkəməsi məsələyə obyektiv yanaşa və ədalətli hökm çıxara bilər. Budapeşt şəhər məhkəməsi ədalətsiz hökm çıxararsa, bu birbaşa Azərbaycan-Macarıstan münasibətlərinə ağır zərbə vuracaqdır. Biz Budapeşt şəhər məhkəməsinin son qərarı ilə bağlı hökumət təşkilatları səviyyəsində Azərbaycan və Macarıstan arasında istənilən əlaqələrin dayandırılmasını tələb edir və bu qərarımızın yerinə yetirilməsi üçün istənilən  vasitələrdən istifadə edəcəyimizi bildiririk.

H.Hacızadə: İranla müharibə elə asan məsələ deyil
(Həmsöhbətimiz politoloq Hikmət Hacızadədir)

- İran-Amerika münasibətlərinin gərginləşməsinin kökündə uranın zənginləşməsi dayanır, yoxsa Çin-Rusiya və İranın "Şanxay əməkdaşlıq təşkilatı"nda birləşərək Qərbə və ABŞ-a qarşı güc birliyi yaratması?

- Mənə elə gəlir ki, söhbət nüvə silahından gedirsə, bu çox təhlükəli məsələdir. Xüsusilə də radikal anti-demokratik hökumətin əlində. Bu hamıya təhlükə yarada bilər. Onu da qeyd etmək istərdim ki, son zamanlar Rusiya və Çin də Qərbin bu tələbinə qarşı birləşiblər. İndi bu proyektə qarşı  vahid bir cəbhə var. O cəbhədə Qərb də, Çin də, rus da var. Onlar İrandan bu məsələnin müharibəsiz həllini  xahiş edirlər. İranda ki, öz işindədir.

- Müharibə başlayacağı təqdirdə, region dövlətlərinin, xüsusən Azərbaycanın vəziyyətini necə görürsünüz?

- Bu Azərbaycan üçün  çox böyük təhlükədir. İranı bombalamağa başlasalar, təsəvvür edin, dünyanın yarısı ilə əlaqəmiz kəsiləcək. Çünki bunlar İran vasitəsilə həyata keçirilir. Naxçıvana yük maşınları, avtobuslar İran ərazisindən keçir. Şimaldan şərqə gedən yük maşınları və gəmilər var. İran və dünya ilə ticarət əlaqələrimiz də dayanacaq. Bizim üçün çox pis nəticələr ola bilər.  Mən belə olacağını istəməzdim.

- İran-Amerika müharibəsi bu il labüddürmü?

-Müharibə son mərhələdir. Ondan əvvəl diplomatik, siyasi-iqtisadi sanksiyalar olacaq. Ondan sonra uzaqdan raket buraxma olacaq. İrimiqyaslı müharibə kimi qoşun olmayacaq. Hələ ki, ona çox var. Bu il ancaq saknsiyalar ola bilər.

- ABŞ-ın İran rejiminə qarşı Azərbaycan türklərinin istifadə etməsini necə qiymətləndirirsiniz?

-Bu, əlbəttə ki, var. Çalışacaqlar ki, ən pis variantda İranı parçalasınlar.  Orada müxtəlif millətlərdən, Azərbaycan türklərindən, kürdlərdən və digərlərindən də istifadə olunacaq.  Amma bu sonuncu mərhələdir. Məsələ dərinləşsə, müharibə başlasa, çalışacaqlar ki, onlardan da istifadə etsinlər.

- Hikmət bəy, İran uzaqvuran raketlərlə İsraili və digər özünə düşmən saydığı ölkələri vura bilərmi? Ümumiyyətlə, İran özünümüdafiə qüdrətinə malikdirmi?

- Yox. Mənə elə gəlir ki, İran Amerika silahı qarşısında dayana bilməz. Amma İranın bir-iki raketi harasa çata bilər. Müharibə müharibədir. Elə uçmadı, belə uçdu. Elə şeylər ola bilər. Amma tək Amerika yox, bütün Qərb  burda vuruşacaq. Bunların qarşısında İran dayana bilməz. Onun kəşfiyyatı, peykləri var. Amerikanın elə təyyarələri var ki, onlar şüalar buraxacaq ki, raketlər uçmasın. Onlarda qrafik bombaları  var ki, partlayanda bütün elektrik xətləri sıradan çıxır. Necə ki, Yuqoslaviyada oldu. Bütün elektro-stansiyalar sıradan çıxacaq. Yəni, Qərbin imkanları çoxdur. İndiki müharibə kinolarda gördüyümüz müharibə deyil. Heç kəs əlində qranat tankın altına atılmaycaq.  Artıq yeni müharibə üsulları mövcuddur.

- İran rejimi dağıldıqdan sonra burada yeni bir demokratik dövlətin qurulması, insan hüquq və azadlıqlarının yaranması baş verəcəkmi?  Bir sözlə, milli-azadlıq hərəkatı yaratmaq mümkün olacaqmı?

-Müharibə başlasa, demokratiyadan danışmaq çətin olacaq.  Bütün xalq çalışacaq ki, bir yerə toplaşsın və işğalçılara qarşı vuruşsun. Bu elə asan məsələ deyil. Amerika gəldi, İranda demokratiyanı bərqərar elədi. İraqda gördük də. Hələ də bir-birini öldürür, partladırlar.

Söhbətləşdi:
Qalib İbrahimoğlu

Atəşkəs döyüşləri

Az.info.Büro

• Ermənistan silahlı qüvvələri martın 6-da saat 02.00 və 03.10 radələrində İcevan rayonunun Berkaber kəndinin 1,5 km şimal-şərqində yerləşən mövqelərindən Azərbaycan ordusunun Qazax rayonu Qızılhacılı kəndindəki mövqeləri avtomat və pulemyotlardan atəşə tutulub. Bundan başqa ermənilər saat 02.10-da Qazax rayonunun Cəfərli kəndinin 1,6 km cənubunda yerləşən mövqelərindən silahlı qüvvələrimizin mövqelərini atəşə məruz qoyub. Qazaxın Aşağı Əskipara kəndinin 0,5 km cənubunda yerləşən mövqelərindən də Azərbaycan ordusunun üzbəüz mövqeləri atəşə tutulub. İtki yoxdur.

• Martın 6-sı saat 12.00-da Ermənistan Silahlı Qüvvələrinin bölmələri Füzuli rayonunun işğal edilmiş Aşağı Seyibəhmədli kəndi  sahəsində yerləşən  mövqelərindən Silahlı Qüvvələrimizin üzbəüz mövqeləri atəşə tutulub. Nəticədə hərbi qulluqçumuz, əsgər Nazimov Mühiddin Vəli oğlu yaralanıb. Hazırda onun vəziyyəti ağırdır.

• Martın 7-də saat 4.45-də Ermənistan Silahlı Qüvvələri bölmələrinin Tərtər rayonunun Qızıloba kəndiin cənub-qərbində yerləşən mövqelərindən açdığı atəş nəticəsində Azərbaycan Silahlı Qüvvələrinin hərbi qulluqçusu, əsgər Cahangirov pərviz Akif oğlu həlak olub.

• Martın 9-u Ermənistan Silahlı Qüvvələri İcevan rayonunun Berkaber kəndindəki mövqelərindən Silahlı Qüvvələrimizin Qazax rayonunun Qızılhacılı kəndindəki mövqelərini atəşə tutub. Cavab atəşiylə düşmən susdurulub. İtki yoxdur.

• Martın 9-da silahlı qüvvələrimiz bir əsgəri - Ələkbərov Rasim Əlövsət oğlu Ağdam rayonunun Yusifcanlı kəndi yaxınlığında minaya düşüb. Nəticədə əsgərimiz bir ayağını itirib.

• Murovdağ istiqamətində Silahlı Qüvvələrimizin bir əsgəri Əliyev Elmir xidməti borcunu yerinə yetirərkən həlak olub.

Erm.info.Büro

• Martın 2-də Azərbaycan tərəfindən atəşkəs  pozuldu. Həmin gün saat 17.50-də Baqanis-İcevan magistral yolu atəşə tutulmuşdur. Zərər çəkən yoxdur.

• Martın 2-də saat 22.30-da erməni mövqeləri atəşə tutulmuşdur. İtki yoxdur.

• Martın 3-də saat 11.00 radələrində İcevan hərbi hissəsinin mövqeləri atəşə tutulmuşdur. Sıravi Arsen Zakevosyan başından güllə yarası almış, 12.55-də dünyasını dəyişmişdir.

• Martın 4-də saat 17.30 radələrində Azərbaycan tərəfindən Mehrab hərbi hissəsinin mövqeləri atəşə tutulmuşdur. Martın 5-də saat 00.20-dən 04.40-a qədər İcevan, 23.30-dan 03.30-dək Vaykdakı mövqelər atəşə tutulmuşdur. İtki yoxdur.

• Martın 6-da saat 19.05-də Vaykda, 21.40-da Berddə, martın 7-də 2.50-də İcevanda erməni mövqeləri atəşə tutulmuşdur. İtki yoxdur.

Vaşinqtonda keçirilən görüş başa çatıb

ATƏT-in Minsk Qrupunun həmsədrləri Stiven Mənn (ABŞ), Yuri Merzlyakov (Rusiya), Bernar Fasie (Fransa) və ATƏT-in hazırkı sədrinin şqəxsi nümayəndəsi  Angey Kaspşikin Vaşinqtonda keçirilən görüşü başa çatıb. Görüşdə Dağlıq Qarabağ münaqişəsinin həllinə dair Azərbaycan və Ermənistan prezidentlərinin Rambuye danışıqlarının nəticələri təhlil edilib, bundan sonra atılacaq addımlar müəyyənləşdirilib. Üç gün davam edən görüşdə müzakirə olunan məsələlər barədə heç bir açıqlama verilməyib, bildirilib ki, müzakirələrin nəticələri, eləcə də, münaqişənin nizamlanması istiqamətinhdə hansı addımların atılmalı olması haqqında rəsmi Bakıya, İrəvana və Vyana məlumat veriləcək. Amerikalı həmsədr S.Mənn bildirib ki, ABŞ Dövlət katibinin müavini Daniel Fridlə  Azərbaycan və Ermənistana səfəri zamanı iki ölkənin prezidentlərinə Vaşinqton görüşündə müzaikrə olunan məsələlər barədə ətraflı məlumat verəcəklər.

◄ 1 2 3 4 ... 17 ► ₪