Müxalifətin yeni “taktika”sı

Başı Qarabağ probleminin həllinə qarışan və ölkədə çağrılmamış qonağa çevrilən quş qripinin, radikal müxalifətin  sabitliyi pozmaq üçün növbəti təxribatı olduğunu sübut etməyə çalışan iqtidar düşərgəsində pul saymağa vaxt tapılmadığı bir məqamda, müxalifət düşərgəsində vaxt bolluğu müşahidə olunur. Bekarçılıqdan milçək ovuna çıxan müxalifət, İsa Qəmbəri hörümçək torunda görəndə "Allah bazar versin" deyərək, partbiletlərini qabaqlarına qoyub, bundan belə nə etməli sualı qarşısında düşüncələrə daldılar. İcazəli mitinq üçün Hacıbaladan icazələri, icazəsiz mitinqə çıxarmaq üçün sosial bazaları olmayan "Azadlıq" blokunun liderləri, iqtidara "hələ varıq, ölməmişik" mesajını vermək üçün, bütün müxalif qüvvələrə müraciət edib,  "biz mehriban ailəyik" adı altında konsert keçirmək təklifi ilə çıxış etdilər.

Uzun-uzadı naza qoymaqdan sonra, konsertin Heydər Əliyev adına respublika sarayında keçirilməsi razılaşdırıldı. Narıncı torba əməliyyatından incik düşən bəylərin könlünü almaq üçün Amerikanın səfiri Rino Harniş eks-Lenin sarayının icarə haqqını ödəməklə, yenidən müxalifətin xaç atası olmaq iddiasını ortaya qoydu. Konsertdə olanları xalqa çatdırmaq missiyasını boynuma götürüb, təyin olunmuş məqamda özümü yetirdim müxalifətin yeni taktiki gedişi olan konsertə.

Bir vaxtlar mitinqlərin əvəzedilməz tamadası olan Sabir bəy konsertdə də öz kəndinə qayıdıb, əvvəlki bacarığını yenidən nümayiş etdirdi. Təbii olaraq, ilk şərqi oxumaq missiyası da onun boynuna düşdü.

Son qoyub ürəkdə dərdə-azara,

Əlimi çatdırdın dövlətə-vara.

Öyrətdin cibimi, Ramiz, dollara,

Səni sevəcəyəm, sən sevməsən də.

Zaldan kiminsə "kiminin əvvəli, kiminin axırı" replikasına fikir verməyən Sabir bəy, Əli Kərimlini səhnəyə dəvət etdi. Onun oxuduğu

Sən Allahın bəlasısan, Hacıbala,

Bizi qana salasısan, Hacıbala.

- mahnısı zalda oturan mitinq həvəskarlarını əməlli-başlı kövrəltdisə, sonrakı ifada Nemət Pənahlı

"Keçən günlərimi qaytaraydılar,

Gələn günlərimi qurban verərdim"

-mahnısı ilə zalı əməlli-başlı ağlamağa məcbur etdi. Konsertin yasa çevriləcəyi halda, məsuliyyətdən qaça bilməyəcəyini anlayan Sabir bəy, tez-tələsik sözü Sərdar Cəlaloğluna verdi.

Seçkidən seçkiyə yolunu gözlədim,

Ah çəkib, həsrətlə sinəmi közlədim.

-oxuyan Sərdara Aydın Quliyevin:

Dedin gələcəyəm gələn baharda,

Bahar qışa döndü,

sən gəlməz oldun.

Sərdarın dəstəsi dağ çəkdi mənə,

Nələr çəkdiyimi sən bilməz oldun.

-mahnı cavabı zalda bu dəfə pıçıltıları çoxaltsa da, Rəsul Quliyevin birbaşa Amerikadan oxuduğu:

Gözlə gələcəyəm, qurbanın olum,

Pulu böləcəyəm, qurbanın olum.

-şərqisi ilə zalda nisbi sakitlik yarandı.

Sabir bəy növbəti dəfə Əli Kərimlini "Azadlıq" blokundakı həmkarları ilə birlikdə səhnəyə dəvət etdi.

Səhnədə İsa Qəmbərin dostlarından kənarda durması, onları duet oxumağa məcbur etdi.

Evimizdən bir çıxardıq hər səhər,

Qələbəyə izn allıq birtəhər.

Görən bizi deyəcəkdir

"cüt bəxtəvər",

Öz əhdinə dönük çıxan bir nəfər.

Bəs nə deyək, bizi

sənsiz görəndə?!

İsa bəyin sükutu duet oxuyanları daha da həvəsləndirdi.

Deyək, İsa əhdini,

Andını pozdu getdi.

Əllərini blokdan

Hirs ilə üzdü getdi.

-deməsindən sonra  İsa Qəmbər oxumağa məcbur oldu:

Mən nə qədər qoca olsam da belə,

Dəyərəm, inan, min Əliyə.

Gec-tez alaram mandatı ələ,

Fikir vermərəm hər dəliyə.

-deyərək, duet oxuyanları səhnəni tərk etməyə məcbur etdi. Səhnənin boşalmasını görən Sabir bəy, boşluğu doldurmaq üçün millət deputatları Nəsib Nəsibli və Arzu Səmədbəyliyə oxumaq üçün şərait yaratdı.

Nəsib Nəsibli:

Mənə mandat verin,

mənimdir mandat!

Arzu Səmədbəyli:

İndi blok söhbəti etmək olmaz,

Hər kəs öz mandatın

bərk saxlasın.

-mahnıları ilə Rauf Arifoğlunu dilə gətirdi:

Deputat olmaq istəyirəm, İsa bəy,

Yox deyəni pisləyirəm, İsa bəy.

İsa bəy öz əqidə yoldaşları ilə səhnəni tərk etdikdən sonra "Azadlıq"ın kvarteti mikrofonu ələ keçirtdi:

Dörd dost, dörd yoldaş,

dörd qardaşıq biz,

Birdir arzumuz, diləklərimiz.

Müsavat gedirsə, ona yaxşı yol,

Deməli, saxtadır çəkdikləri qol.

Yaddaşını itirən Sabir Rüstəmxanlı mahnı savaşına son qoymaq üçün AMİP lideri Etibar Məmmədovu mikrofona dəvət etdi. Etibar Küsənli öz repertuarına təzəcə daxil etdiyi mahnı ilə tamaşaçıları feyziyab etmək fikrinə düşdü:

Ay Əli, keçmə bizim məhlədən,

Uşaqlar ilişər sənə, söz olar.

Gec-tez öpəcəksən

mənim əlimdən,

Etibaram, dediklərim düz olar.

Etibar Məmmədov istədiyi dəstəyi ala bilmədiyini görüb, azsaylı tərəfdarları ilə birlikdə əvvəl səhnəni, sonra isə zalı tərk edib getdi.  Sabir Rüstəmxanlı konserti yekunlaşdırmaq niyyəti ilə bütün liderləri birlikdə səhnəyə dəvət etdi. Siyasi liderlərin xorla oxuduğu "Biz mehriban ailəyik"  mahnısının iqtidarın kürkünə birə saldığı şübhəsiz idi. Beləliklə,  əziz oxucular, sonra deməyin ki, bizim müxalifət heç bir işə yaramır.

Yetim Qacar

Qarabağsız Azərbaycan

Başımın tacısan, Hər dərdimin əlacısan, Ürəyimin qaynar qanısan, Uğurlarımın hər anısan, Candan əziz Azərbaycan, Sənə qurban can, Azərbaycan. Dərdlidir, Azərbaycan, sənin qanın Əldən getmiş Qarabağın - Düşünən beynin, qaçan ayağın. Qarabağsız Azərbaycan qolaydı, Pisdən də pis olaydı, Kaş əsgərimiz Şuşada olaydı. Sevirəm səni Azərbaycan, Ancaq Qarabağla birlikdə, Səsimiz ucalmaz inan təklikdə. Qarabağ, ürəyimə yatan, Əsrlər boyu yağıya top atan, Necə oldun belə lal - kar yatan, Olacaqmı hayına çatan!? Qarabağ, Azərbaycanın Şuşa qalası, Məgər bu düşmənə qalası?! Yoxsa qisasımız əbədi qalası Azərbaycanın qarsımış yarası? Səbrim birdən aşır-daşır, Gözlərimdən sanki alov saçır, Xəyalım yenə Qarabağa qaçır, Əllərim Qarabağın qapıların açır, Belə qeyrət türk əsgərinə yaraşır, Türk hünərlə əzmlə vuruşur, Gərək olanda dağlara da dırmaşır. Biznesmenə boluca para gərək, Amma torpaq üçün mərd sinə gərək, Fərhada Şirin, Məcnuna Leyli gərək, Qarabağa meylli torpaqsevərlər gərək Onda yediyimiz də olan halal çörək

"Azad Qarabağ" qəzetinə abunə yazılmaq istəyənlər
aşağıdakı ünvanlara müraciət etsinlər:

1. Azərmətbuatyayım İstehsalat Birliyi. Ünvan: Bakı şəhəri, AZ-1007, C.Hacıbəyli küçəsi 30,

Əlaqə telefonları: 440-10-35,  440-39-83, 440-27-85.
Respublikanın rayon və şəhərlərində isə "Mətbuatyayımı" şöbələrinə müraciət edin.

2. "Qasid" Açıq Səhmdar Cəmiyyəti.
Ünvan: Cavadxan küçəsi 21 a. Telefonlar:  493-14-06, 493-16-43,  493-23-19

 ABUNƏ YAZILMAĞA TƏLƏSİN!

Müsabiqə

Qarabağ Azadlıq Təşkilatı  Qarabağ mövzusunda ən yaxşı publisistik, analitik yazı, şer, plakat, karikatura müsabiqəsi elan edir. Ən yaxşı nümunələr “Azad Qarabağ” qəzetində çap olunacaq, ilin sonunda isə hər nominasiya üzrə qaliblər müəyyən ediləcəkdir. Arzu edənlər işlərini qəzetimizin ünvanına göndərə bilərlər.

Təşkilat komitəsi

◄ 1 ... 14 15 16 ► ₪