Abid Şərifovun qəbahəti

Ermənilərin Bakıya gələrək müxtəlif tədbirlərdə iştirakına loyal yanaşan, bunda heç bir "qəbahət" görməyən Abid Şərifov çox böyük qəbahət edir. Abid müəllim əsasən tikinti işləri ilə məşğul  olub, ona görə də ola bilər ki, bu cür məsələlərdən başı o qədər də çıxmır. Amma hətta bu hal da onun sözlərinə bəraət qazandırmır. Necə deyərlər, əgər bir şeydən çıxmırsa, başını gərək zorla oraya soxmayasan. Əgər Abid müəllim bu məntiqi  də bilmirsə, onda onu o boyda vəzifəyə qoyanların başı haqqında böyük şübhələr yaranır. Hər halda, baş-boş nazirin bu qocaman müavini özünü çox itirmiş görsənirdi. Deyəsən, nə dediyini, nə etdiyini özü də başa düşmürdü. Abid müəllimdə belə şeylər olur, həlledici məqamlarda,  insani keyfiyyətlərin önə keçməli olduğu anlarda düzgün qərar qəbul edə bilmir, konyuktur meyllərə üstünlük verir. Bəlkə də, fikirləşir ki, "kaşşey" müəllim kimi elə bu dünyanı tutub duracaq.

Yaşı çox olduğuna görə Abid müəllimin xətrinə dəymirik, amma bəzi şeyləri başa salmağı özümüzə borc bilirik. Ermənilər 1905, 1918, 1920-ci illərdə olduğu kimi, azərbaycanlı qırandan, kəndlərimizi və şəhərlərimizi dağıdıb yerlə-yeksan edəndən, torpaqlarımızı tutandan sonra  münasibətləri nizama salmağa çalışır, bizi heç nə olmamış kimi əvvəlki qaydada, dostluq və qardaşlıqda yaşamağa dəvət edir. Öz məqsədlərinə çatmış ermənilərin bu mövqeyi başa düşüləndi. Bəs biz nə üçnü hər dəfə hər şeyi ermənilərə bağışlamalıyıq? Bizim də dediyimiz odur ki,  bu dəfə erməninin istədiyi alınmayacaq, bizdən qoparıb aldıqlarını geri qaytarana, törətdikləri cinayətlərə görə cavab verənə, intiqamımızı, qisasımızı alana qədər heç bir gediş-gəlişdən, dostluqdan, qardaşlıqdan söhbət ola bilməz. Abid müəllimi, güman ki, anlada bildik. Əgər bununla da başa düşmədisə, onda gərək başqa şübhəyə düşək. Allah eləməsin, bəlkə bu ermənilərlə qohumluq, ya da biznes əlaqələri var? Şeytan adamın ağlına çox şeyləri  salır. Lənət şeytana. Şeytan demişkən, bəlkə bu kişini şeytan yoldan çıxarıb, ermənilərin qulluğunda durmaq qərarına gəlib?

Sonda Abid müəllimin bir fikrinə də münasibət bildirmək zorundayıq. Onun dediyindən belə çıxır ki, hökumət üzvləri heç kimə, o cümlədən mətbuata izahat, açıqlama verməməlidir, yəni onlar heç kəsin, cəmiyyətin, xalqın qarşısında məsuliyyət daşımırlar, kiminsə onlardan nəisə soruşmağa haqqı yoxdur. Çox qəribə məntiqdir. Bu nədir?  Savadsızlıqdı, yoxsa pul, var-dövlət bunların gözünü o qədər tutub ki, beyinləri o qədər piylənib ki, daha heç nə haqda fikirləşə, düşünə, sözlərinin məsuliyyətini dərk edə bilmirlər, özlərinə nəzarət hissini itiriblər. Belə yerdə adamın əli qalır üzündə. Allah betərindən saxlasın!

Fransız tələbələrin sağ əli...

Fransada tələbələr geniş hərəkata başlayıblar. Özü də elə bir ciddi səbəb olmadan. Sadəcə gənclərin işə götürülməsi və işdən çıxarılması ilə bağlı qanun bir az xoşlarına gəlməyib, torpağı işğal altında olan, amma bunu özünə təhqir hesab etməyən bizim gənclərdən fərqli olaraq, özlərini təhqir olunmuş hesab ediblər. Vəssəlam. Bu ağılsız tələbələr, bizim ağıllı gənclərdən fərqli olaraq universitetdən (özü də bizim adı  it dəftərində  də olmayan universitetlərdən yox, dünyanın ən məşhur universitetlərindən) qovulmaqdan, dədələrinin verdiyi yüksək təhsil haqqının batacağından, hələ döyülməkdən, tutulmaqdan demirəm, qorxmayaraq küçələrə çıxır, polis ordusu  ilə əsil döyüşə girərək öz haqlarını müdafiə edirlər.

Maraqlıdır, görəsən, bizim gənclər, tələbələr fransız yaşdaşlarının bu hərəkətlərini görürlər, yoxsa gözlərini bərk-bərk yumublar?  Bizim tələbələrin qayğıları həm çoxdur, həm də yoxdu. Yoxdur, ona görə ki, qoyun sürüsü kimi səhər axışırlar ali məktəblərə, başlarını qarışdırıb günlərini keçirirlər, oxusalar da, oxumasalar da pullarını verib qiymətlərini alırlar. Daha nəyin qayğısını çəkəcəklər. Amma həm də qayğıları çoxdur. Gecə-gündüz fikirləşir, baş sındırırlar ki,  dədəmizin bizi bura qoymaq üçün verdiyi pullar batmasın, birdən ayağımı kənara qoyaram, hansısa aksiyada görərlər, sonra da institutdan çıxararlar, əsgər göndərərlər. Budur, bizim tələbələrin qayğısı.  Dədələri, nənələri də çalışırlar ki, gül balalarının başı ayrı qayğılara qarışmasın, Qarabağ haqqında, ümumiyyətlə, düşünməsinlər, birdən Allah ağıllarını alar, gedib Qarabağla bağlı hansısa  aksiyaya qoşularlar, erməninin qabağına çıxarlar, peşmançılıq olar, tutub-eyləyərlər, sonra da institutdan qovarlar. Əlbəttə, nənələr, dədələr düz eləyirlər, qoy balaları oxusunlar, onsuz da oxuyub nə olacaqları bilinmir. Düzdür, nə olacaqları bilinmir, amma bu cür gedişlə  bilinən odur ki, adam olmayacaqlar. Nə isə/... İstəyirdik deyək  ki, fransız tələbələrin sağ əli bizimkilərin başına. Amma dədəsi, nənəsi, hökuməti,  prezidenti, gənci bu olan məmləkətdə, bu sözü deməyinə dəyərmi?

Abid Şərifovun fikrinə cəmiyyət nə deyir?

Ermənilər yenə də paytaxtımıza ayaq basdılar. ATƏT-in təşkil etdiyi forumda iştirak etdilər. Baş nazirin müavini Abid Şərifov ermənilərin Bakıya gəlməsində qəbahət görmədiyini vurğulayıb.

Abid Şərifovun bu fikrinə münasibəti öyrənməyə çalışdıq.

Qabil Hüseynli - Müsavat başqanının müavini

- Nə qədər ki, ermənilər torpaqlarımızdan çıxmayıb, qondarma "soyqırım"larını təbliğ edirlər, əlbəttə ki, əlaqə qurulmamalıdır. Abid Şərifovun çıxışı isə, onun yox, hakimiyyətin razılaşdırılmış mövqeyidir.

İsaq Əvəzoğlu - AXCP mətbuat katibi

- Xalq diplomatiyası adı altında bu səfərlərə son qoyulmalıdır. Hakimiyyətin Azərbaycan xalqına vurduğu zərbə, heç də ermənilərin vurduğu zərbədən az deyil. Ermənilərlə Abid Şərifovun təmsil olunduğu hakimiyyətin heç bir fərqi yoxdur.

İlyas İsmayılov - Ədalət Partiyasının sədri

- Əgər istəyiriksə Qarabağ   bizim olsun, onda biz müəyyən dərəcədə hisslərimizi cilovlamalıyıq. Əlbəttə, ermənilərin vəhşi hərəkəti bizdə emosiya yaradır, ancaq ATƏT-in tədbirlərinə dözməliyik. Ermənilər ATƏT-in xətti ilə Bakıya gəliblər, deməli, dövlətin siyasətidir, buna dözümlə yanaşmalıyıq.

Pənah Hüseyn - millət vəkili

- Əlbəttə, çox ziddiyyətli bir məsələdir. Azərbaycan bu tədbirləri keçirməsə, beynəlxalq əlaqələrin bir qismindən təcrid oluna bilər. Ancaq etiraz edən insanların, o cümlədən QAT-ın mövqeyi başa düşüləndir və təqdir olunmalıdır. Mən şəxsən QAT-ın və başqa etiraz edən ictimai təşkilatların mövqeyini təqdir edirəm.

Xəzər Teyyublu - AXCP funksioneri

- Hakimiyyət bu məsələlərə diqqətlə yanaşmalıdır. Çünki burada milli hissə toxunmaq məsələsi var.  Torpaqlarımızı işğal ediblər, ortada düşmənçilik var. Nə vaxt torpaqlarımızı düşmən əsarətindən azad edərik, o zaman da ermənilərlə əlaqə qurmaq olar. Qanunlar da işləmir ki, A.Şərifov cəzalandırılsın. Ordan bura, Azərbaycandan da Ermənistana olan səfərlərə son qoyulmalıdır.

Çingiz Qənizadə - hüquq müdafiəçisi

- Respublika ərazilərini işğal etmiş ermənilərin Bakıya ATƏT-in xətti ilə gəlməsini məqbul hesab etmirəm. Neytral ölkədə keçirilsəydi, buna o qədər də pis baxmazdım. Belə tədbirlər, görüşlər keçirməkdənsə, ATƏT üzərinə götürdüyü münaqişənin həlli istiqamətində iş görsün. Dövlət çox güman ki, ermənilərin gəlməsinə razılıq verib. Abid Şərifovun fikri isə şəxsi fikir ola bilər.

Vidadi Fərəcov - Vəhdət Partiyasının sədr müavini

-  Baş nazir müavini vəzifəsində çalışan bir şəxsin - ermənilərin  gəlməsi qəbahət deyil - deməsinə pis baxıram. O, bu sözləri deyərkən, işğal olunmuş əraziləri, şəhidləri gözünün  qarşısına gətirib, heç olmasa xəcalət çəkməli idi.  bizim ermənilərlə hansı nəqliyyat əlaqəmiz var ki, hələ onun təhlükəsizliyi də müzakirə olunur? Bizdən də ora gedənlərə ar olsun - deyirəm. Vəhdət Partiyası olaraq bu əlaqələri pisləyirik.

Samir Əsədli - VHP siyasi Şurasının üzvü

-  Ümumiyyətlə, işğalçı ölkə ilə heç bir əlaqə qurulmamalıdır. Azərbaycandan terrorçu ölkəyə səfər edən insanlar Azərbaycan vətəndaşlığından çıxarılmalıdır. Biz QAT-ın mövqeyini dəstəkləyirik.

Amil Məmmədov - hüquqşünas

- Prezident söyləyir ki, sülh danışıqları nəticə verməsə, müharibə edəcəyik. Ermənilərin də ölkəmizə gəlişləri adi hala çevrilir. Bəs sabah prezident ermənilərlə müharibəni necə aparacaq? Məncə, Abid Şərifov dərhal istefa verib, İrəvana üz tutmalıdır. Ermənilərin gəlməsi, onun sözlərinə görə, qəbahət deyilsə, onda Ruslanı niyə həbs edirdilər?

Elgiz Quluzadə - işsiz

- Ermənilər Abid Şərifova heç nə etməyib, ona görə də o, onların gəlişini qəbahət saymır. Bəs Qarabağda, Xocalıda insana xas olmayan vəhşiliklərlə qətlə yetirilən insanlar azərbaycanlı deyillər? Bu vəhşilikləri törədənlər də ermənilər deyil? Bakıda keçirilən forumda iştirak edən də həmin ermənilərdəndir. Mən bu hakimiyyətin bu hərəkətlərini başa düşməkdən imtina edirəm.

Solmaz Vəliyeva - müəllimə

- Maraqlıdır,  ermənilərin Azərbaycana gəlişinə pis baxmayan, onlara ziyafət verən, İrəvana səfər edən insanların qardaşı, əmisi, bacısı, yaxud da hər hansı bir əzizi  şəhid olubmu? Əgər olsaydı, onlar yenə də Ermənistana səfər edərdilər? Bunlar vətəni pula satan məxluqlardır. Gün gələcək, şəhidlərimizin ruhu onları tutacaq.

Hazırladı: Vüsal

QARA LÖVHƏ
Vətən qarşısında üzü qara olanlar
?	?	?	?

◄ 1 ... 12 13 14 ... 16 ► ₪