"İnsanların dəstə-dəstə İslama daxil olduqlarını gördüyün zaman..."

Zəmanəmizin ən görkəmli şəxsiyyətlərindən biri, fransız mütəfəkkiri və filosofu Roje Qarodi 1913-cü ildə Marseldə anadan olub. 1945-ci ildə o, Fransanın Milli Şurasına seçilmiş, parlamentin sədr müavini, senator vəzifələrini tutmuşdur. Onun Fransa Kommunist Partiyasından ayrılması və 1982-ci ildə İslam dinini qəbul etməsi çox gözlənilməz oldu, axı həmin dönəmdə Qarodi öz siyasi karyerasında zirvələri fəth etmişdir, təkcə öz ölkəsində deyil, bütün dünyada şöhrət qazanmışdır.

"...Mən ateist ailəsində dünyaya göz açmışam və bunu özümə üstün cəhət kimi qiymətləndirirəm, çünki  bu vəziyyət mənə hələ uşaqlıqdan azad düşünməyi təmin etmişdir. Mən o qərara gəlmişdim ki, bu dünyanı dəyişmək, qaydaya salmaq lazımdır. Ona görə də, ilk olaraq seçimim marksizmin üzərinə düşdü. Lakin bir gün tanınmış xristian mütəfəkkiri, yezuit Karl Ranner mənə dedi ki, marksizm mövcud problemlərin qlobal həllini təmin etməyə qadir deyil. Onda üz tutdum xristianlığa. Siyasi baxışlarımda isə marksist olaraq qalırdım. Ancaq kilsə də bu gün cəmiyyəti islah etmək imkanına malik deyil. Məhz onda mən İslama üz tutdum. Dahi Hötenin dediyi kimi, biz hamımız sonda şüurlu İslamı qəbul edəcəyik. Əgər biz Qurani-Kərimə müraciət etsək, görərik ki, İslam - son din deyil, İslam hələ Adəm peyğəmbərin yaradılışından bu yana mövcuddur. İslam, yəni Allaha tabe olmaq, - həqiqətən də bütün insanlar üçün bir əlamətdir!.."

Hədislərdən seçmələr  

Həzrəti Muhəmməd (s) buyurur:

1. Heç bir damla Allah yolunda tökülən qan damlasından əziz (qiymətli) deyil.

2. Elm öyrənənin əcəli çatdıqda şəhid kimi ölər.

3. Əgər öz yaxşı işindən sevinib, pis işindən narahat olursansa, deməli möminsən.

4. Qəzəbləndiyin zaman sakit ol! (dayan)

5. Allah-təala ata və anaya yaxşılıq edən insanın ömrünü uzadar.

6. Allah bəndəsinin Ona tərəf uzanmış əlini geri qaytarmaqdan və onu ümidsiz qoymaqdan  həya edər.

7. Öz sübhünüzü sədəqə verməklə başlayın, çünki  bəla sədəqənin üstündən keçə bilmir.

8. Qadının cihadı ərinə yaxşı baxmaqdır.

9. Dostlarınızın ən yaxşısı eyiblərinizi sizə deyəndir.

10. Heç bir işi sabaha saxlama ki, hər günün öz işi vardır.

11. Elm ilə birgə olan yuxu, cahilliklə birgə olan ibadətdən üstündür.

12. Allah-təala yalnız rəhmli bəndəsinə rəhm edər.

13. Dünya möminin zindanı, kafirinsə behiştidir.

14. Alimin iki rəkət namazı, alim olmayan adamın yetmiş rəkət namazından üstündür.

15. Elmlə olan az əməl faydalı, cəhalətlə olan çox əməl isə faydasızdır.

16. İnsanı üzünə tərif etmək onu qətlə yetirmək kimidir.

17. Allah yolunda bir gecə keşik çəkmək min gecə namaz qılıb, gündüzləri də oruc tutmaqdan üstündür.

18. İslamın zirvəsi Allah yolunda cihaddır ki, yalnız ən üstün müsəlmanlar bu zirvəyə yetişər.

Hər günümüzü Novruz edək

Hər bir xalqın çox qədim dövrlərdən gözəl və maraqlı bayramları vardır.

Bu bayramlarda insanlar daim həyatın çətinliklərini, dərd-qəmini unutmağa çalışıb və belə bayramları hər zaman ruh yüksəkliyi ilə qeyd ediblər. Bunların sırasında Novruz da ən qədim bayramlardan biri sayılır. Baharın gəlişinin və bir çox əlamətdar hadisələrin rəmzi olan bu bayramın qeyd olunmasına hələ eramızdan çox-çox əvvəldən başlanmışdır.

Tarixçilər və bir çox digər tanınmış şəxsiyyətlər Novruz barədə öz maraqlı fikirlərini söyləmişlər.

XI əsr mütəfəkkiri Əbu Reyhan Biruni Novruzu təbiətin oyanması, əkinçilik təsərrüfatının başlanması bayramı adlandırmış, Nizami Gəncəvi isə özünün "Siyasətnamə" əsərində yazın gəlişini kütləvi xalq bayramı kimi təqdim etmişdir.

Novruz elə nadir milli bayramlar cərgəsinə aiddir ki, İslam dini onu rədd etməmiş, əksinə, onlara yeni ruh və təravət bağışlamışdır. İslam mənbələrində Novruz bayramının mənşəyini dini baxımdan izah edən onlarla rəvayətə rast gəlmək mümkündür.

Novruz bayramının İslam dini ilə əlaqəsinə gəldikdə, qeyd etmək yerinə düşər ki, Şah Abbas Səfəvi dövründə yaşamış dahi alim Şeyx Bəhai dini bayramlar siyahısında Novruzun adını da qeyd etmişdir.

Əllamə Məclisi isə əlamətdar dini tarixlərin məxsusi ibadət və əməlləri qeyd edilmiş "Zadül-məad" kitabında Novruz bayramına müstəqil bir fəsil həsr etmişdir. Onun  məşhur "Biharül-ənvar" kitabında Novruzla əlaqədar onlarla rəvayət toplanmışdır.

Novruz gününün ibadətləri barədə məlumat verən ilk alim -  X-XI əsrdə yaşamış Şeyxüt-taifə Əbu Cəfər Məhəmməd Tusi sayılır. O, "Müxtəsərül-Misbah" kitabında Novruz gününün müstəhəb orucundan, bayram namazından və ilin təhvil olma duasından söz açmışdır.

Eyni məlumatlara XII əsrin mütəfəkkiri İbn İdris Hillinin "əs-Sərair" kitabında da rast gəlirik. Məsum imamlarımız da Novruz haqqında bir çox rəvayətlər söyləmiş, o cümlədən İmam Cəfər Sadiq əleyhissalam bu gün barədə belə buyurmuşdur: "Həqiqətən, Novruz günü, Allah-Təala cismləri yaratmazdan əvvəl onların ruhundan əhd aldı. Onlarla şərt kəsdi ki, Allaha şərik qoşmasınlar. Onun peyğəmbərlərinə və imamlarına iman gətirsinlər. Bu gün Günəşin çıxdığı, ağacları tozlandıran küləyin əsdiyi, yer üzünün gül-çiçəklə örtüldüyü ilk gündür. Həmin gün Nuh peyğəmbərin gəmisi tufandan sonra Cudi dağında qərar tutdu. Cəbrayıl əleyhissalam Məhəmməd peyğəmbərə ilk vəhyi gətirmək üçün nazil oldu. Novruz günündə Məhəmməd peyğəmbər öz əshabələrini Həzrət Əliyə beyət etməyə çağırdı. Yenə o gün Osmanın  ölümündən sonra xilafət Həzrət Əliyə qaytarıldı və camaat ona xəlifə kimi beyət etdi. Yenə Novruz günündə Əli əleyhissalam Nəhrivan müharibəsində düşməni məğlub etdi. Məhz Novruz günündə İmam Mehdi əleyhissalam zühur edəcək və düşmənlərinə qalib gələcək. Elə bir Novruz günü yoxdur ki, biz o gün Sahibi Zamanın zühurunu gözləməyək...". Bu rəvayət Əllamə Məclisinin "Zadül-məad" kitabında qeyd olunmuşdur.

Novruz bayramı barədə çox söz söylənmiş, çox əsərlər yazılmışdır. Novruz - küsülülərin barışdığı bir bayramdır. Novruz - insanları bir-birinə yaxınlaşdırdığı, səmimiləşdirdiyi bir bayramdır. Novruz bahar fəslinə təsadüf etdiyindən, demək olar ki, əhval-ruhiyyəmizdə də yeni həyat səhifəsinin açıldığı bir məqamdır. Novruzda çoxdandır bir-birilə görüşməyənlər bir-birini ziyarət edir, imkanlılar ehtiyacı olanlara əl tutur. İnsanlar sözlə belə olsa, bir-birilə bayramlaşaraq bir-birinə xeyir-dua diləyirlər. Bütün bunların hamısı dinimizin bizə öyrətdiyi dəyərlər, ilahi buyuruqlarıdır.

Rəvayət olunur ki, Novruz bayramında Həzrət Əliyə bir sovqat gətirirlər. İmam soruşur: Bu nədir? Cavabında isə deyirlər: Bu gün Novruz bayramıdır! İnsanlar bir-birlərinə qarşı mehriban olmağa, qəlblərini açmağa çalışırlar. Bu gün insanların bir-birlərini sevindirib sovqat hədiyyə etdikləri bir gündür... Bu zaman İmam buyurdu: Onda hər günümüzü Novruz edin!

Həqiqətən də, sevimli peyğəmbərimizin "bilik şəhərinin qapısı" adlandırdığı İmam Əli hər zaman insanlara bir-birlərinə yaxşılıq etməyi, kasıblara əl tutmağı, bir-birlərinə sevinc bəxş etməyi tövsiyə edirdi. Novruz bayramı da bu saleh əməlləri yerinə  yetirməyə geniş imkanlar yaradan bir fürsətdir. Lakin İmam buyurduğu kimi, bu bayramı yalnız Novruzla məhdudlaşdırmamalıyıq.

Bizlər də bu böyük şəxsiyyətlərdən nümunə götürməliyik. Çalışmalıyıq ki, ilin bütün günlərini özümüzə Novruz sayıb bir-birimizin qəlblərini sındırmayaq, pis davranışlarla uzun müddət küsülü qalmayaq. Ömür çox qısa, əməl dəftərimiz isə demək olar ki, boşdur. Kin-küdurət, qəzəb, intiqam hisslərilə yaşamayaq. Əlimizə düşən fürsəti əldən verməyib yaxınlarımıza, ata-analarımıza, qohum-əqrəbaya, qonum-qonşumuza gözəl sözlər söyləyib könüllərini açaq. Belə olduqda həyatımız da daim günəş saçacaq, qəlbimiz sevinəcək və sevindirəcək. Qoy bizim də həyatımız Novruz gülütək çiçəklənsin və çiçəkləndirsin!

Rəvayətlərdə ilin təhvili aşağıdakı duada öz əksini tapır:

Ey qəlbləri və gözləri

haldan-hala salan!

Ey gecə ilə gündüzü

tədbirlə nizamlayan!

Ey ili dolandıran və əhvallara

yaxşılıq, pislik verən!

Bizim əhvalımızı yaxşılığa

doğru dəyiş!

Novruz bayramınız mübarək olsun!

"Mənəvi Saflığa Dəvət"

İctimai Birliyi

◄ 1 ... 13 14 15 16 ► ₪