Qarabağ məhbuslarına azadlıq!
Ramil Səfərov	Rövşən Bədəlov	Xızır Marqaşvili	Fariz Hacıyev	Müşfiq Qurbanov
Əlirza Babayev	Firuz Babayev	Yaşar Məmmədov	Məmməd Məmmədov	Ədalət Ağayev
Məhəmməd Məmmədov	YA QARABAĞ YA ÖLÜM!

 “Buna hansi Azərbaycan oğlu dözər?”

Sizlərə haqqında danışacağım növbəti partizan Yaşar Əsgər oğlu Məmmədovdur. Yaşar haqqında onun bacısı Ramidə xanımın söylədikləri əsasında yazıram.

Y.Məmmədov 1974-cü ildə Bakıda doğulub. Ailədə iki bacı, iki qardaşdırlar. 135 saylı orta məktəbi bitirən Yaşar, məktəbdə yaxşı oxusa da, ali təhsil almağa həvəs göstərməyib. Bərbərlik sənətini öyrənərək həbs olunana qədər elə bu işdə çalışıb. O, həm də rəssamlığa həvəs göstərib hərdən gözəl şəkillər çəkərdi. Elə Qarabağda aparacaqları partizan müharibəsinin xəritəsini də Yaşar çəkmişdi. Atası Əsgər kişi idman müəllimi idi. O, gəncliyində güləşlə məşğul olub, bu sahədə müəyyən uğurlar qazanmışdı. Əsgər müəllim uşaqlarını çox vətənpərvər böyütmüş, lap körpəlikdən onlara vətəni, torpağı müqəddəs tutub sevməyi öyrətmişdi. Axı o hardan biləydi ki, məhz bu vətənpərvərlik, torpaq məhəbbəti bir gün oğlunu həbsxanaya atacaq. Yaşar da digər yoldaşları kimi Gürcüstana hərbi təlim keçməyə getmiş, ordan qayıdandan sonra tutularaq, bir neçə il icbari iş almışdı. Daha sonra Yaşar da həmin o müdhiş kasetə baxaraq yoldaşları kimi bu yolda ölənə qədər vuruşmağa, ermənilərə qan uddurub, türkün kim olduğunu göstərməyə and içmişdi. O hətta bu kaseti evə gətirib ailəsinə də göstərmişdi. Ramidənin söylədiklərindən: "Bir gün Yaşar evə ermənilərin Azərbaycan əsirlərinin başına gətirdikləri müsibətlərin çəkildiyi kasetlər gətirdi. O kasetdə gördüyüm dəhşətli səhnələr yəqin ki, ömrüm boyu yadımdan çıxmayacaq. Ermənilər əsirlərə insan ağlına gəlməyən işgəncələr verirdilər. Erməni Azərbaycan qadınlarını göstərib deyirdi: "Bir neçə ildən sonra bu Azərbaycan qadınlarının bizlərdən doğulan oğlanları azərbaycanlılara qarşı vuruşacaq". Onlar qadınlara üz tutub istehzayla, çağırın Azərbaycan oğullarını, bəlkə səsinizi eşidib sizi qurtarmağa gələlər - deyib gülürdülər. Buna hansı Azərbaycan oğlu dözər?! Necə ki, mənim qardaşım da dözmədi. Mən qardaşımı qınamıram, kasetdə gördüyüm səhnələr məndə elə bir intiqam hissi yaradıb ki, bacarsaydım mən də əlimə silah götürərdim".

Ramidə, sən deyirsən ki, o kasetdəki səhnələri görən Azərbaycan oğlu dözməz. Ancaq çox təəssüf ki, buna dözən, biganə qalan oğullarımız da var. Hamınız söyləyirsiniz ki, o kasetlərə məhkəmədə də baxdılar. Ancaq bu dəhşətli səhnələr onların halına təfavüt etməyib, əgər  etsəydi, sənin qardaşın və eləcə də onun kimi qeyrətli oğullarımızla o cür rəftar etməzdilər.

 Yaşarı da digər partizan yoldaşları kimi avqustun 13-də yenidən həbs ediblər. Bacısının dediyinə görə, qardaşı Xırdalanda - öz evində həbs olunub: "Qardaşımın və yoldaşlarının niyyəti bu yolda ya qazi, ya şəhid olmaq idi. Onlar  bunun üçün heç kimdən mükafat gözləməyərək, ölümü gözləri önünə almışdılar. Ancaq Azərbaycan hakimiyyəti tərəfindən həbs olunacaqları ağıllarına belə gəlmirdi".

Yaşar ailəlidir, iki oğul atasıdır. Böyük oğlu Əsgər V, kiçik oğlu Hüseyn isə II sinifdə oxuyur. Ramidə üstündən artıq iki il yarım keçdiyinə baxmayaraq, hələ də qardaşının həbsinə inanmadıqlarını söyləyir: "Hələ də inana bilmirik ki, Yaşar həbsdədir, yoldaşını, iki övladını tək qoyub gedib. Hər gün yatıb-duranda, bunun yuxu olmasını arzulayırıq. Uşaqları artıq böyüyüb, başa düşürlər. Onlar deyirlər ki, atamı yaxşı olub tutublar, əgər o gedib Qarabağda ölsəydi, biz neylərdik?!"

Ağır Cinayətlərə Dair Məhkəmə Yaşara 6 il həbs cəzası kəsib. Sonradan Ali Məhkəmə digər partizanlar kimi onun da cəza müddətini bir il azaldıb. Hazırda o, Güzdəkdə yerləşən 13 saylı kalonda cəza çəkir. Atası Əsgər müəllim bu haqsızlığa dözməyib infarkt keçirərək dünyasını dəyişib. Ramidə o günləri xatırlayıb kədərlə əlavə etdi: "Atam ölüm ayağında Yaşarı çağırırdı. Xahiş etdik ki, Yaşarı heç olmasa bir-iki saatlığa buraxsınlar, atam görsün. Ancaq icazə vermədilər. Atamın bu dünyadan niskillə, oğlundan nigaran köçməsi bizi daim ağrıdacaq. Qardaşım bu yolda atasını itirsə də, ailəsindən ayrı düşüb orada çox əziyyət çəksə də, tutduğu işdən peşman olmayıb. Çünki bilir ki, düzgün yoldadır, onun hərəkəti Allaha xoşdur. Biz bacılar da həm qardaşımızla, həm də onun partizan yoldaşları ilə fəxr edirik. Gücümüz isə həm onlara, həm də onların yaxınlarına Allahdan səbr diləməyə çatır".

Yaşarla ayda iki dəfə gedib həbsxanada görüşmək mümkündür. 3 aydan bir isə ailəvi görüşdə ailəsi 3 gün onun yanında qalır.

Hələ də yaxınları, qohumları əlaqədar təşkilatların Qarabağ partizanlarını yada salıb onları əfv edəcəyi ümidi ilə yaşayır. Allah ümidlərinizi doğrultsun!

Orxan

Əsir və girovların axtarışı ilə əlaqədar layihə geri qaytarılıb

24 mart 2006-cı ildə "Həsrət Yolu" Əsir və Girovlara Kömək İctimai Birliyinin qərargahında "Ermənistanın Azərbaycan Respublikasına qarşı hərbi təcavüzü nəticəsində əsir və girov götürülmüş şəxslərin valideynləri, ailə üzvləri, qohumları və yaxınları ilə görüş" adlı dəyirmi masa keçirilib. Tədbiri İctimai Birliyin sədri Esmira Orucova açıb. O, birliyin yaranma səbəbi, məqsəd və vəzifələri haqqında məlumat verib. Esmira xanım əsir və itkin düşmüş, girov götürülmüş şəxslərin taleyinin, onların ailələrinin problemlərinin çox az adamı maraqlandırdığını qeyd edib. Onu da vurğulayıb ki, Azərbaycanda  fəaliyyət göstərən xarici təşkilatlar hər sahəyə aid qrantlar ayırdıqlarına baxmayaraq, Birliyin təqdim etdiyi əsir və girovların axtarışı ilə əlaqədar 3 əhəmiyyətli layihəni geri qaytarıb, görüşmək məqsədilə İnsan Haqları Üzrə  Müvəkkil Ombudsman Elmira xanım Süleymanovaya 21 fevral 2006-cı il tarixdə göndərilmiş məktuba hələ də cavab almayıb.

8 may 1992-ci ildə Şuşa işğal olunan zaman əsir götürülmüş tankçı Rəfael Abbasovun atası - Ermənistandan məcburi köçürülmüş Abbasov Sultan  öz çıxışında Əsir və  İtkin Düşmüş, Girov götürülmüş vətəndaşlarla əlaqədar Dövlət Komissiyasının İşçi Qrupunun fəaliyyətindən narazı olduğunu, 1996-cı ilin may ayından bu günə kimi heç bir əsirin qaytarılmadığını qeyd edib. Sultan müəllimin şikayətinə eyni tarixdə əsir götürülmüş döyüşçülərin - Azərbaycan Tibb Universitetinin  V kurs tələbəsi, könüllü olaraq Qarabağın müdafiəsinə getmiş Hüseynov Ağasinin anası - Svetlana Hüseynova, Neft Akademiyasının II kursundan könüllü olaraq döyüşə getmiş Bədəlov Vüqarın atası - Bədəlov Hamlet və Bayramov Ramizin anası - Bayramova Zinyət də qoşuldular.

Şuşanın işğalı zamanı əsir götürülmüş Tofiq Rzayevin (Tofiq Oğuzun) həyat yoldaşı - 3 uşaq anası Hüseynova Güləsər də  əsir və girovların axtarışı ilə məşğul olan əlaqədar təşkilatların laqeydliyindən gileyləndi. Hüseynova Güləsər həyat yoldaşının  axtarışı istiqamətində demək olar ki, Azərbaycanın bölgələrində yerləşən bütün hərbi hissələrdə olduğunu söylədi. Məmurların laqeydliyindən gileyləndi.

Əsir və girovluqda olanların yaxınları Dövlət Komissiyasının İşçi Qrupunun, BQXK, Azərbayacn Qızıl Aypara Cəmiyyəti, Beynəlxalq İşçi Qrupunun işindən narazı olduqlarını bildirdilər.

1 ay 5 gün erməni əsirliyində olmuş Xocalı şəhər sakini Ağayev Səttar Muxtar oğlu hələ də iki oğlunun - şəhid olmuş Ağayev Zahid və Ağayev Allahverdinin meyitlərinin qaytarılmadığı haqqında göz yaşlarından boğula-boğula danışdı. Talelərinə 3-cü dəfə qaçqınlıq həyatı yazılmış, Xocalı işğal  olunan gün ailəliklə girov götürülmüş, 2 oğlu - Cabbar və Alişer Binaliyevlər bu günə kimi erməni əsirliyindədir. Hazırda Dəvəçi rayonunun Udulu kəndində yaşayan Binaliyevlər ailəsinin başçısı Gülali Binali oğlu əsirlikdə olarkən Ermənistanın indiki prezidenti R.Koçaryan tərəfindən qışın soyuğunda, yarıçılpaq vəziyyətdə ağır işgəncələrə məruz qaldığını hönkürə-hönkürə qeyd edib.

Tədbirdə iştirak edən milliyyətcə ahıska türkü olan tədqiqatçı alim Sevil Piriyeva erməni əsirliyində olan 15 ahıska türkünün ailəsi və qayıtmış 50 nəfərin adından birliyin sədri Esmira Orucovaya cəmiyyət tərəfindən  unudulmuş hər qayğıya ehtiyacı olan bu insanları bir araya toplayıb, onların dərdinə şərik olduğu üçün öz dərin təşəkkürünü bildirdi.

Xocalı sakini Allahverdiyev Sovet, atası - Allahverdiyev Saleh, qardaşları Novruz və Ziyadxan, qardaşı oğlu Mahirin indiyə kimi erməni əsirliyində olduğundan danışdı və Esmira Orucovaya belə bir təşkilatı yaratdığı üçün minnətdarlıq etdi.

Tədbirin sonunda işğal olunmuş Xocavənd rayonu, Qaradağlı kənd sakini Axundov Əmir, Babayev Kamran, Şuşa sakinləri, erməni əsirliyində olan Bağırov Ruslan və Bağırov Nasirin qardaşı - Bağırov Elman və şəhid Hacıyev Azərin atası - Hacıyev Nəriman Esmira Orucovaya belə bir təşkilatı yaratdığı üçün minnətdarlıq etdi.

◄ 1 2 3 ... 16 ► ₪