Qabil Hüseynli:
Atəşkəsin tez-tez pozulmasını provakasiya kimi səciyyələndirirəm

- Rambuye görüşündən sonra atəşkəsin tez-tez pozulması  müşahidə olunur. Sizcə, bu təsadüfdürmü?

- Atəşkəsin tez-tez pozulmasını provakasiya kimi səciyyələndirirəm. Yəni, Rambuye görüşündən sonra Azərbaycan tərəfindən səslənən, sülh danışıqları bitərsə, biz torpaqlarımızı hərb yolu ilə geri alarıq, kimi şüarlar görünür. Bu, ermənilər tərəfindən qıcıqla qarşılanır, onlar sanki əzələ nümayiş etdirmək istəyirlər. Amma bunun təkcə ermənilərin beyninin məhsulu olduğu qənaətində deyiləm. Qarabağ probleminin  həlli yolunda başlıca maneə Rusiya tərəfinin tutduğu qeyri-konstruktiv mövqedir. Həm Rambuye, həm də İstanbul görüşlərində Rusiya açıqca əngəl olacaq mövqe nümayiş etdirdi. Bütün bunlar onu göstərir ki, Ermənistan tamamilə Rusiyanın təsiri altındadır və bəzi məsələlərdə onun tövsiyələri ilə hərəkət edir.

- Qabil bəy, Ermənistanın sabiq DİN-i hesab edir ki, Ter-Petrosyanın hakimiyyətə qayıdışı qaçılmazdır. Sizcə bu mümkündürmü? Əgər bu mümkün olarsa münaqişənin həlli istiqamətində addım atılarmı?

- Hər halda, nəzərə almaq lazımdır ki, bu fikri Ermənistanın keçmiş daxili işlər naziri irəli sürüb və sözsüz ki, Ter-Petrosyan siyasətdən silinməmiş və siyasi perspektivlərini qoruyub saxlayan siyasi xadimdir. O, Ermənistan siyasiləri içərisində Qarabağ məsələsinə ən konstruktiv münasibət bəsləyən liderlərdən biridir, amma Ermənistan kimi bir ölkədə siyasi olimpin zirvəsinə gətirilmə xalqın iradəsi ilə deyil, bu dövlətə hegemonluq etmək istəyən ölkələrin təsiri altında baş verir, ona görə bu barədə proqnoz  vermək çox çətindir.

- Prezident İlham Əliyev Qarabağa, yəni cəbhə bölgəsinə səfər etdi, bəziləri bunu Azərbaycan hakimiyyətinin hərbi əməliyyata başlamaq istəyi ilə izah edirlər. Sizcə Azərbaycan hakimiyyəti bu il müharibəyə başlaya bilərmi?

- Mən  bunu qəti surətdə istisna edirəm. Belə hesab edirəm ki, hələ müharibəyə başlamağın zamanı yetişməyib. Yəni mən həmin zamanı o zaman hesab edirəm ki, qələbə qazanacağımıza və müharibənin nəticələrinin bizim xeyrimizə olacağına yüz faiz əmin olmalıyıq.

- İlham Əliyevin Rusiya ilə isti münasibət qurması, deyirlər ki, Amerika səfiri Rino Harnişin geri çağırılmasında önəmli rol oynayıb. Bu versiya doğru ola bilərmi?

- Sözsüz ki, Rino Harnişin geri çağırılmasında əsas amillərdən biri də budur. Yəni, bir çox amillər var, əsas təsir edən amil məncə budur.

- İranla Azərbaycan arasındakı diplomatik qalmaqal, sizcə Güney Azərbaycanla bağlıdır, yoxsa ABŞ-ın İranla etmək istədiyi müharibədə Azərbaycanın vasitəçi olacağından ehtiyatlanaraq rəsmi Tehran Azərbaycana hədə-qorxu gəlir?

- İranla Azərbaycan arasında siyasi gərginlik Dünya Azərbaycanlılarının II qurultayından əvvəl baş vermişdir. Ona görə də, Əfşar Süleymaninin qeyri-etik və diplomatik normalara sığmayan hədələri məncə bir qədər Güneylə bağlı olsa da, qlobal məsələlərlə daha çox bağlıdır.

- Qabil bəy, sizcə müharibə başlayacağı təqdirdə Güney Azərbaycan az itgi verməklə, ən azı bu münaqişədə  müxtariyyət əldə edə bilərmi?

- Əgər elə olarsa, yəni müharibənin nəticəsi olaraq təkcə soydaşlarımız deyil, digər milli azlıqlar da ən azı milli mədəni muxtariyyət qazana bilərlər.

- Azərbaycan hakimiyyətinin Güney Azərbaycana dair siyasətini necə qiymətləndirirsiniz?

- Bu siyasət əlbəttə ki, milli dəyərlərə önəm verən bu partiyanın nümayəndəsi kimi məni qane etmir. Görüləsi işlər çoxdur, məsələn güneyli soydaşlarımızın mədəni intellektual, milli dəyərlərin  inkişafına ciddi töhvələr vermək olar, onların milli şüurunun formalaşmasında iştirak etmək olar. Adi misallar gətirim. Güneydən olan tələbələrin sayını artırmaq olar, mədəni nailiyyətlərimizi radio, internet, televiziya vasitəsi ilə  güneyli qardaşlarımıza çatdırmaq olar, yəni bütün bunlar beynəlxalq hüquq normalarının icazə verdiyi işlərdi və güman edirəm ki, Quzey Azərbaycan hakimiyyəti bütöv millət, bütöv milli şüur istiqamətində yetərincə iş görmür.

Söhbətləşdi: Vüsal

Din xadiminin həbsi narahatçılıq doğurur

Tanınmış din xadimi Höcətülislam Qədim Əzimi  1 il yarım müddətə azadlıqdan məhrum edilmişdir.

O, bir müddət əvvəl Ərdəbildə Cümə məscidində işləyərkən erməni adamlarının Ərdəbilə dəvət olunmasının qarşısını almaq üçün etiraz mitinqinin təşkilatçılığında suçlanaraq Qum şəhərinə göndərilmişdi. O, bu il fevralın 26-da Qum şəhərində Xocalı soyqırımının ildönümü mərasimində iştirakına görə 24 saat ərzində tutulub saxlanılmışdı.

Höcətülislam Qədim Əziminin hərbi Azərbaycan cəmiyyətində narahatçılıq doğurmuşdur. Bəzi gümanlara görə, o, ermənilərin məkrli niyyətlərinə qarşı çıxdığı üçün onların hiylələrinin qurbanı olmuşdur.

Qarabağa məktub

Əvvəla salam, Qarabağ! Halını soruşsam, yəqin deyəcəksən ki, sənin kimi bivec övladı olanın halı necə ola bilər axı? Ona görə soruşmuram halını, sən də soruşma halımı. Gücü ancaq məktub yazmağa çatan "kişi"nin halını deməsəm də, bilərsən. Desəm inanmazsan, o gün Bakıda bir atəşfəşanlıq var idi ki, gəl görəsən, az qala sənin işğalda olmamağına özüm-özümü inandıracaqdım. Hələ az qalmışdı televizoru söndürməmiş özümü dənizkənarı parkda şənlənənlərə yetirmək üçün taksi tədarükü görüm. Qəfil ağlıma gəldi ki, əl telefonuna zəng edim. Zalım operator, "Bu nömrəyə zəng çatmır, telefon ya sındırılıb, ya da söndürülüb" cavabı ilə bütün xəyallarımı alt-üst etdi.

Qarabağ, bilmirəm nədəndir, heç xoşum gəlmir bu mart ayından. Atalar - mart çıxdı, dərd çıxdı - deyəndə, görünür Kəlbəcərin işğalını nəzərə almayıblar. Kimsə məni qınasa belə, deyəcəyəm: Mart ayı kasıba sərf edən ay deyil. Qədəmini qoyan kimi, 8 mart tıqqıldadır boş cibimizi. Qadınları razı salmamış, uşaqlar şəkərbura-paxlava deyib dad edirlər. Mən hələ qoz-fındığı demirəm. Bu mart  gedəndə də qapını bərk çırpıb gedir. Hər il martıq 31-i ağlamağa adət etmişik.  Guya ki, bununla soyqırım qurbanlarını yad edirik. Yazıq Kəlbəcər də 13 ildir ki, gözünü yola dikib bizi gözləyir. Biz də hər aprelin 2-si Şəhidlər Xiyabanını ziyarət etməklə işimizi bitmiş hesab edirik. Daha qorxmuruq ki, bir gün şəhid qəbirləri dilə gəlib "utanın" deyəcək bizlərə.

Qarabağ, deyəsən İlham əmi sənin həkimini dəyişmək fikrinə düşüb. Deyilənə inansaq, ATƏT-in savadsızlığını bəhanə gətirib Avropa Birliyini müalicəyə cəlb etmək istəyir. Belə yerdə deyiblər ki, kişinin oğlu asqırıb ayılıb. Deyirəm, indi Mənn qardaşla Fuşye bacı işsiz qalsalar, balalarını nə ilə dolandıracaqlar. Arada gəlib öz dəyərli məsləhətləri ilə bizi feyziyab edib gedirdilər. Allah bilir, dəlləkliklərini başımızda öyrənmək üçün Avropa Birliyi indi kimi göndərəcək?! Üzüm Merzlyakova elə öyrəşib ki, ayda bir yol səsini eşitməsəm, hamamı işləməyən insanlar kimi qaşınma tutacaq məni.

Qarabağ, qorxuram axırda adımı bədxəbər Qacar qoyasan. Sənə bir şad xəbər vermək istəyirəm. Gözün aydın, Mirmahmud ağa da partiyasının adını dəyişdi. İndən belə Əli Kərimli rahat nəfəs ala bilər. Eşitdiyimə görə, YAP-da da dəyişiklik gözlənilir. Deyirlər Siyavuş Novruzov partiyanın adını dəyişib Yep Yeni Azərbaycan Partiyası qoymaq istəyir. Düz də eləyir. Axı, partiyada çoxlu dəyişikliklər baş verib. Yadındadırmı, sovet məktəblərində  keçirilən dərslərdən birinin adı "Ən yeni tarix" idi. məndən olsa, "Ən Yeni Azərbaycan Partiyası" ən uğurlu seçimdir.  Əslinə qalsa, o partiyanın adı gördüyü  işə uyğun olaraq ya "Yalançı azərbaycanlılar partiyası", ya da maraqlarını müdafiə etdiyi bölgənin şərəfinə "Yeraz adamlar partiyası" adlandırılmalıdır. Birdən Siyavuş hirslənib - Bəyəm müxalifət yalan danışmır - desə, deyərəm ki, danışır, amma normasını bilir. Məsələn mənim yadıma gələni İsa Qəmbər cəmi iki dəfə yalan danışıb. Bir dəfə 1992-ci ildə karıxıb demişdi ki, 1993-cü il quruculuq ili olacaq, amma qırıcılıq ili oldu. Elə bu yalanına görə İsa Qəmbər 1992-ci ilin yalançısı seçildi.  Ağzıyanan İsa Qəmbər bir də 2003-cü ildə İlham Əliyevi siyasətdən süpürüb atacağını demişdi, amma əksinə oldu. Hacıbala onun özünü mərkəzdən süpürüb kənara atdı. Hesablasaq, İsa bəy on ildən bir yalan danışır ki, bu da beynəlxalq normalara tam uyğun gəlir.

Qarabağ, o gündür ki, "Bakı-xəbər" qəzetində oxuyuram ki, Heydər Əliyev erməni həmkarları ilə düz 21 dəfə görüşüb-dərdləşib. Desəm inanmazsan, mən heç  qonşum Məmişlə 21 dəfə dərdləşə bilməmişəm. Sən sevginin gücünə bax ey. Bunu vaxtında bilsəydim Heydər Əliyev rəhmətə gedən kimi Ermənistan  dövlətinə və onun prezidentinə baş vermiş faciə ilə əlaqədar başsağlığı verərdim. Şübhə etmirəm ki, bu itki bizdən çox onları yandırıb. Zarafat deyil, rəhmətlik  cavanlığında da ermənilərə çox  görüm - baxım edib. Mənə təəccüblü gələn odur ki, nə əcəb ermənilər Yerevanda indiyəcək onun heykəlini ucaltmayıblar?! Ya da heç olmasa, adına şəhər, yaxud küçə verməyiblər?!

Qarabağ, ayağı yer tutan Azərbaycandan qaçır. Bircə bu millətin üzünü  Xankəndi istiqamətinə döndərə bilsəydim heç dərdim olmazdı. Onda ayağımı rahat uzadıb "Qurdlar vadisi"nə baxardım.

Qarabağ, öpürəm bizdən fərqli olaraq səni tərk etməyən sərçələrinin gözündən. Atalar bilib, deyiblər ki, insanlar gəldi-gedərdi, ümidini sərçəyə bağla.

Qarabağ boyda dərdi olan məmləkət döyüş meydanına çevrilməlidir.

Qarabağ boyda dərdi olan "millət"in və məmləkətin prezidenti Bakının küçələrini yox, səngərlərini gəzməlidir. Özü də təkcə bayram günləri yox!

Şənlənmə millətim!

Döyüş meydanına çevril, məmləkətim!

"Millət"imin və məmləkətimin prezidenti səngərlərə get, səngərlərdə yat. Bəlkə onda döyüş əmrini tez verəsən.

Bizim Qarabağ kimi Zəngəzur, Təbriz, Borçalı, Dərbənd dərdlərimiz də var.

Qeyd: Bu yazını Müsavat naziri İsa Qəmbərin və Yeraz adamlar partiyasının funksioneri Siyavuş Novruzovun oxuması məsləhət deyil.

◄ 1 ... 4 5 6 ... 16 ► ₪