Almaniyada soyqırım tədbirləri

Dəyərli, vətənpərvər soydaşlarımız Rəhmi Tüncər və İntiqam Məmmədovun təşkilatçılığı ilə martın 28-də ermənilərin xalqımıza qarşı törətdikləri soyqırımın ildönümü ilə bağlı Almaniyada tədbirlər keçirilmişdir. Tədbir Saksoniya vilayətinin Bruchausen (Visen) şəhərində düzənlənmişdir. Toplantıya Almaniyanın siyasi partiyalarının nümayəndələri, jurnalistlər, orada yaşayan azərbaycanlılar və digər millətdən olan siyasi mühacirlər qatılmışlar. Öncə iştirakçılar Azərbaycan xalqına qarşı törədilmiş soyqırımı əks etdirən sərgi ilə tanış olmuşlar. Onlara həmçinin soyqırıma, erməni vəhşiliklərinə həsr olunmuş kitablar paylanmışdır. Kitabın müəllifi Rəhmi Tüncər tədbir iştirakçılarına soyqırım haqqında geniş məlumat vermiş, jurnalistlərin suallarını cavablandırmışdır. Tədbirdə  erməni vəhşiliklərini əks etdirən film də nümayiş etdirilmişdir. Sonda soyqırımın tanınması üçün tədbir iştirakçıları adından İnsan Haqları üzrə Avropa Məhkəməsinə müraciət göndərilmişdir. Yerli partiyaların, qeyri-hökumət təşkilatlarının xahişi ilə tədbir aprelin 3-də təkrar keçirilmişdir.

 Kanadada silsilə aksiyalar keçirildi

Azərbaycan xalqına qarşı ermənilər tərəfindən törədilmiş soyqırımın ildönümündə Kanada azərbaycanlıları bir sıra önəmli aksiyalar keçirmişlər. Bu haqda Ottavodakı Azərbaycan icmasının rəhbəri Asif Kərimov məlumat verir:

Martın 31-də Kanadada fəaliyyət göstərən  Azərbaycan təşkilatları Ermənistan səfirliyi, YUNESKO nümayəndəliyi və ölkə parlamentinin qarşısında möhtəşəm etiraz aksiyaları keçirdilər. İlk olaraq, azərbaycanlılar Ermənistan səfirliyi qarşısına toplaşaraq,  çıxışlar etdilər, "Erməni terroruna son qoyulsun!", "Erməni terrorçuları Qarabağdan əllərini çəksinlər!", "Qarabağda erməni vəhşiliklərinə son qoyulsun!" və digər şüarları səsləndirdilər. Aksiya ətrafdan keçənlərin diqqətini də cəlb etdi, onlara "Azərbaycan Təşkilatları Federasiyası"nın hazırladığı Soyqırım və Xocalı vərəqələri paylandı. Səfirliyin işçiləri böyük təlaş və təəccüblə aksiyanı izləyirdilər. Bir saat davam edən aksiyanın sonunda təşkilatçıların imzaladığı müraciət səfirliyə təqdim olundu.

Bundan sonra aksiya iştirakçıları yürüşlə YUNESKO nümayəndəliyinin qarşısına yollandılar. Yol boyu izdihamın içərisində "Qarabağ", "Erməni terrorçuları" şüarları minlərlə insanın diqqətini çəkdi.

Nümayəndəliyin qarşısında da eyni şüarlar səsləndirildi, müraciət təqdim olundu. Aksiya parlamentin binası qarşısında davam etdirildi. Üst-üstə 4 saat davam edən aksiyada Azərbaycan xalqının haqq səsi Kanada ictimaiyyətinə, beynəlxalq təşkilatlara çatdırıldı.

Aksiyanın əhəmiyyəti ilə bağlı Kanadadakı "Azərbaycan Təşkilatları Federasiyası"nın icraçı direktoru Əkbər Məcidov fikirlərini bizimlə bölüşdü: "Bu aksiyanı təkcə Kanada miqyasında deyil, bütün dünyada  azərbaycanlıların fəallaşmasının göstəricisi kimi dəyərləndirmək olar. Biz erməni terrorçuları haqqında həqiqəti çatdırmaqla, hayqırmaqla digər ölkələrdəki soydaşlarımıza da nümunə göstərməyə çalışdıq. Biz dünyaya haqq davamızı nümayiş etdirdik".

 Xosrov bəy Sultanov Dağlıq Qarabağ münaqişəsinin həlli haqqında

Azərbaycan Xalq Cümhuriyyətinin ərazi bütövlüyü ilə əlaqədar yaradılan problemlərin ən mürəkkəblərindən biri də Dağlıq Qarabağla bağlı idi. Bu dövrdə Azərbaycanın siyasi-diplomatik dairələrdə həmin problemin həlli yolları və vasitələrinə dair müxtəlif qənaət və mövqelər  ortaya çıxmışdı.

Bunlar arasında AXC-nin ilk hərbi naziri və Qarabağın general-qubernatoru olan X.Sultanovun mülahizə və təklifləri çox maraqlı və dəyərlidir. Həmin fikir və təkliflər Xosrov bəyin AXC hökumətinə "Qarabağda ingilis siyasətilə əlaqədar olaraq yaranmış vəziyyət və onun düzəldilməsi üçün zəruri tədbirlər" adlı məlumat-məruzəsində, habelə ingilis generalı Şatelvortla Qarabağ məsələsinə dair apardığı müzakirələrdə (25.06.1919) səslənmişdir.

Onlar problemin ayrı-ayrı məqamlarına daha dərindən nüfuz edilməsi baxımından əhəmiyyətlidir. Həm bu cəhət, həm də XX əsrin sonlarında başlayan və hazırda davam etməkdə olan Ermənistan-Azərbaycan münaqişəsinin  reallıqları və perspektivləri X.Sultanovun ibrətamiz mülahizə və təkliflərinin nəzərdən keçirilməsinə ehtiyac yaradır.

Birincisi, X.Sultanov qubernatorluğa daxil olan bölgələrin, xüsusilə də Zəngəzurun Azərbaycan üçün geosiyasi önəmini dəyərləndirmişdi. Onun fikrincə,  Qarabağın itirilməsi Naxçıvan və Ordubadın, ümumiyyətlə isə bütün Azərbaycanın itirilməsi demək olardı. Bununla Bakı ilə Gəncə arasında möhkəmlənən ermənilər dövlətimizin mövcudluğunu təhlükə altına qoya bilərdilər.

İkincisi, Xosrov bəy Şatelvortla söhbətdən belə bir nəticəyə gəlmişdi: İngilislərin guya bizə münasibətdə qərəzsizlik və xeyirxahlıq göstərib Qarabağ məsələsində bitərəf mövqe tutmaları problemin həllini yubatmış və sayıqlığımızı azaltmışdır. Belə hal isə Azərbaycan üçün əlverişsiz şərait yaratmış və ermənilərin xeyrinə olmuşdur. Üstəlik Şərur, Naxçıvan və Qarsın ermənilərə verilməsi elan edilmişdir.

Üçüncüsü, ingilislərin Qarabağ məsələsində üzərlərinə götürdükləri öhdəliklərə əməl etməmələrini (ələlxüsus da Zəngəzurda hakimiyyəti AXC-yə deyil, erməni Milli Şurasına verdiklərini) vurğulayan general-qubernator bu vəziyyətin ermənilərin daha da fəallaşmasına təkan olduğunu açıqlamışdı.

Dördüncüsü, X.Sultanovun yerli şəraitə yaxşı bələd olmasına əsaslanan dərin inamını (qənaətini), vəziyyətdən çıxış yolu kimi təklif etdiyi, təcili həyata keçirilməli olan tədbirləri və onların ləngidilməsi (yaxud da qəbul olunmaması) şəraitində gözlənilən nəticələri belə qruplaşdırmaq olar.

A) Gəlinən qənaətlər:

- Qarabağ-Zəngəzur məsələsinin həllində ingilislərin köməyindən qəti imtina edilməlidir, çünki onlar bu işdə bizə yalnız maneçilik törədirlər;

- Məcburedici tədbirlər görülməzsə, ermənilər Azərbaycan hökumətinin tabeçiliyinə  razı olmayacaqlar;

- Bu məsələni bir ay da həllsiz qoymaq əhalini hökumətin gücsüzlüyünə inandırmaq, müsəlman hissəsində anarxiyaya səbəb olmaq və bölgədən həmişəlik əlini üzmək deməkdir.

B) Təcili həyata keçirilməli olan tədbirlər:

- Təxirəsalınmadan Zəngəzura hərbi hissələr yeridilməsi və ermənilərin İrəvandan Azərbaycana hərəkətinin qarşısının alınması;

- Dağlıq Qarabağ ermənilərinə Azərbaycan hakimiyyətini altı günə tanımaq barədə ultimatum verilməsi;

- Bütün ermənilərə müsəlman rayonlarını tərk etmələrinin təklif olunması (Şuşa şəhəri istisna ediləcəyi bildirilməklə);

- Azərbaycan hökumətinin tanınmayacağı təqdirdə altıgünlük möhlət bitəndən sonra hərbi əməliyyatlara başlanılması.

 C) Təxirəsalınmaz tədbirlərin görülməyəcəyi şəraitdə gözlənilən nəticələr:

- Ermənilərin Zəngəzurdan irəliləmələri və Dağlıq Qarabağdakı daşnak silahlı qüvvələri ilə birləşmələri;

- Müsəlman rayonlarında anarxiya;

-  Qarabağın itirilməsi ehtimalı;

- General-qubernator xülasə olaraq bildirirdi ki, ingilis siyasəti nəticəsində Qarabağ məsələsinin həlli ləngidilmiş, Zəngəzur və Qarabağ ermənilərinin Azərbaycan hakimiyyətini dinc yolla tanımaları təmin olunmamış, nəticədə bölgədə millətlərarası münasibətlər xeyli kəskinləşmişdir.

Gənclərimiz Tuluza şəhərində Azərbaycanı təmsil etmişlər

 "Aprelin 6-da Fransanın Tuluza şəhərində Asiya xalqlarının tanıtım tədbiri  keçirilmişdir.

Mərasim "Crous" fransız təşkilatının köməyilə baş tutmuşdur. Madam Lavunun rəhbərliyilə həyata keçirilən bu tədbirdə məqsəd Qazaxıstan, Özbəkistan, Türkmənistan və Azərbaycanı müəyyən imkan daxilində  qonaqlarla tanış etmək idi. Vaxt məhdudluğuna baxmayaraq, müvafiq ölkələrin Fransada təhsil alan tələbələri öz qabiliyyətlərini lazımınca nümayiş etdirərək, məqsədlərinə çatdılar.

Qonaqlar ölkələrin ümumi görüntüsü, iqtisadi-siyasi durumu, təbii sərvətləri, coğrafi mövqeyi və iqlim şəraiti, müxtəlif və zəngin səhnəciklər, milli rəqslərilə tanış oldular. Strasburqdan gəlmiş azəri rəqqasları Seyfi Mustafayev və Esmira Qasımova öz ifaları ilə bütün zalı ayağa qaldıraraq, yaddaşlarda uzun müddətlik iz saldılar. Azərbaycana verilmiş müəyyən zaman daxilində Emin Əhmədov, Böyükağa Mustafayev, Rəşad Əliyev, Musa Həsənov, Vaqif Cabbarov, Xuraman Mustafayeva və Qoşqar Qasımov ölkəmiz barədə hər bir sahədə qısa məlumat verərək, tamaşaçılarda az da olsa vətənimiz barədə təsəvvür yaratdılar. Və belə tədbirlərin gələcəkdə də keçiriləcəyini söylədilər. Mərasimin sonunda çıxış edən Madam Lavu tədbirdən razı qaldığını vurğulayaraq, tələbələrin bir araya gəlib, istədiyi səviyyədə hazırladıqları gecənin ürəyincə keçdiyini söylədi. Tədbirdə qonaqlara özbək plovu və bir sıra şirniyyatlar da təqdim olundu. Həmvətənlərimizin uğurlu işini qiymətləndirərək, onlara bir vətəndaş kimi öz adımdan təşəkkürümü bildirir, gələcəkdə bu cür işlərin davam etdirilməsində bol-bol qüvvət, iradə arzulayıram".

Aysel Novruz, Fransa 

◄ 1 ... 11 12 13 ... 16 ► ₪