“... Bu gün Azərbaycanın vətən daşı ola bilən vətəndaşlara
çox  böyük ehtiyacı var”

-Qarabağ probleminin həllini AKXCP olaraq necə görürsünüz? Hakimiyyətə gəlsəydiniz işğal faktının aradan qaldırılması üçün hərb, yoxsa sülh yoluna üstünlük verərdiniz?

  -Qarabağ probleminin həlli barədə səslənən bütün fikirlərə hörmətlə yanaşsam da, məsələnin yalnız hərb yolu ilə həll olunacağı qənaətindəyəm. Əgər iqtidar nümayəndələri, konkret olaraq Heydər Əliyev 2001-ci ilin fevralında bütün siyasi partiyaları Milli Məclisə yığıb, ermənilərlə keçirdiyi çoxsaylı görüşlərdən nəticə əldə etmədiyini etiraf edirdisə, bu sülh danışıqlarının əhəmiyyətsizliyinin sübutu idi. Hakimiyyətə gələcəyimiz təqdirdə dövlətin hər bir strukturu öz işini yerinə yetirməklə bu məsələnin həllinə töhfəsini verəcək. Azərbaycan kişisinin Qarabağ probleminin sülh yolu ilə həllindən nəinki danışmaq, hətta düşünmək haqqı yoxdur. Müdafiə Nazirliyi məsələni hərb yolu ilə həll etdiyi məqamda Xarici İşlər Nazirliyi də danışıqları davam etdirməlidir. Bax onda ermənilərlə danışıqların nəticəsi olacaq. Dünyada qanla verilən torpağın sülh yolu ilə alınması  faktına rast gəlməmişəm.   

- Sizin fikrinizcə, indiki iqtidar işğal faktını aradan qaldıra bilmir, yoxsa bu onların maraqları ilə ust-ustə düşmür?

 - Bayaq qeyd etdiyim kimi, bu məsələnin həlli yalnız müharibə ilə mümkündür. Bugünkü iqtidar isə 1994-cü ildən bəri sülh danışıqları ilə baş aldadaraq, müharibə variantını həmişə "lazım gələrsə" sözündən sonra işlədib. Bu iqtidar atəşkəslə fəxr edə-edə Azərbaycan ailələrinə şəhidlərin, özü də atəşkəs şəhidlərinin davamlı gəlməsini təmin edib. Müharibənin labüdlüyünü bilsələr də,  heç vaxt bu sözü dillərinə gətirməyiblər. Bu dediklərim yəqin ki, sualınızın cavabını sizin üçün aydınlaşdırar.

- Mübariz millətin dözümlü millətə çevrilməsində həm fərd, həm də partiya olaraq günahınızı etiraf edirsinizmi?

- Bizim millət 1988-ci ildə fasiləsiz mitinqlər keçirib sovet rejiminin çökməsində müstəsna xidmət göstərdiyinə görə, həmin ilin mübariz milləti adına layiq görülmüşdü. Mübariz millətin dözümlü millətə çevrilməsində hər bir vətəndaş təbii olaraq məsuliyyət daşıyır. Günah Tanrı ilə bəndənin arasında olan məsələdir. Hansısa səhvdən və yaxud məsuliyyətdən söhbət gedə bilər. Mənim də Azərbaycan vətəndaşı olaraq, müəyyən dərəcədə səhvlərimin olması mümkündür və mən də bu gün bunu etiraf edirəm.  

- Partiya sədri olaraq, Qarabağ üzrə müavininizin qarşısına nə tapşırıqlar qoymusunuz? Konkret olaraq onun iş sahəsinə nələr aiddir?

- 1994-cü ildə hələ AXC olaraq bütün partiyalar arasında ilk dəfə qərara gəldik ki, keçirəcəyimiz bütün iclasların bir nömrəli məsələsi Qarabağ olmalıdır. Qarabağ ətrafında baş verən hadisələri nəzərə alıb, bu sahə üzrə müavinlik postu təsis etmək qərarına gəldik. Düzdür, ilk əvvəl adı indiki kimi adlanmasa da, eyni funksiyanı  icra edirdi.  Biz bu problemin həlli üçün bir partiyanın edə biləcəyini  edirik. O ki qaldı müavinin görəcəyi işlərə, bu barədə onu deyə bilərəm ki, Qarabağın taleyi ilə əlaqədar hər hansı bir məsələdə partiya üzvləri ilə düşüncələrini bölüşmək, partiyanın mövqeyini mətbuata və ictimaiyyətə çatdırmaq, həmin müavinin görəcəyi işlərdir. Bundan əlavə işğal günlərinin anılması, QAT-ın  tədbirlərində üzvlərimizin iştirakının təmin edilməsi kimi işlər bu postun lazımlı olduğunu əsaslandıran şərtlərdəndir.

- Bəzi müxalifət qüvvələri Qarabağa dönüşümüzün demokratik seçkilərdən keçdiyini deyirlər. Sizin fikrinizcə, birləşə bilməyən müxalifətlə demokratik seçkilərin keçirilməsinə nail olmaq mümkündürmü?

- Hamını bir yerdə görmək istəyi, istək kimi gözəl olsa da, əslində hamının bir yerdə olmaq imkanı inandırıcı görünmür. Şübhəsiz ki, demokratik yolla hakimiyyətə gəlmiş qüvvələrdən Qarabağın azadlığını tələb etmək və gözləmək həm asan, həm də ağlabatandır. Ona görə də, bu fikirlə qismən razıyam. Amma əlimizi yanımıza salıb demokratik seçkiləri gözləməyin tərəfdarı da deyiləm.

- Biz bu gedişlə neçə ilə rəhmətlik Elçibəyin “Bütöv Azərbaycan” arzusunu gerçəkləşdirə biləcəyik?

-"Qarabağ  problemi həll olunmamış, bütöv Azərbaycandan danışmamalıyıq"  deyənlərin fikri ilə razı deyiləm. Qarabağ bizə müvəqqəti də olsa Təbrizi, Dərbəndi unutdurmamalıdır.  Bu gün Bütöv Azərbaycan ideyasına lağ edənlər, vaxtilə "bu rejim çökəcək" deyəndə Elçibəyə inanmayanların davamçılarıdır. Bütöv Azərbaycan uğrunda mübarizə tək rəhmətlik Elçibəyin yox, bütöv millətin ideyasına çevrildiyi danılmaz bir faktdır və apardığımız mübarizə sonda öz nəticəsini verəcəkdir.

-Səbr Allahın adlarından biri olsa da, izafi olan hər bir əməl haram sayılır . Bizim on üç illik   səbrimiz izafi səbr sayılmırmı?

- İnsan doğulan andan ölən gününə qədər səbr etməyi bacarmalıdır. Lakin səbrlə dözüm tamam ayrı-ayrı anlayışlardır. Biz 13 ildir ki,  səbr etmirik. Sadəcə olaraq, edilən zülmə dözürük. Bəli dözümümüzün izafi olması fikri ilə razıyam. Torpağı işğal olunan millətin dözməmək haqqı var və dözməməlidir. Lakin edəcəyi müharibədə səbrli olmağı unutmamalıdır.

- Mirmahmud ağanı təkrar seçkilərdə nə gözləyir? Millət vəkili seçiləcəyi halda işğal faktını aradan qaldırmaq üçün nə işlər görəcək?

- Mən təkrar seçkilərə qatılmaqla  seçkini saxtalaşdıranların hər bir vətəndaşın seçmək və seçilmək hüququna hörmətlə yanaşmasına nail olmaq istəyirəm. Millət vəkili seçiləcəyim təqdirdə, imzamı atdığım QAT-ın Qarabağ bəyannaməsinin müddəalarının və partiya olaraq lazım bildiyimiz bütün qərarların qəbul olunmasına çalışacağam.

- İran  səfirinin son hərəkətləri barədə fikrinizi bilmək maraqlı olardı.  Sizin fikrinizcə, Azərbaycan höküumətinin reaksiyasını yetərli saymaq olarmı?

- Partiya olaraq səfirin hərəkətlərinə kəskin etirazımızı bildirdik. İzmir şöbəmiz İran səfirliyi qarşısında piket keçirərək partiyanın mövqeyini daha kəskin şəkildə ortaya qoydu . Hesab edirəm ki, İran səfiri öz səlahiyyət həddini aşdığına görə  ölkədən çıxarılmalı idi. Medianın bu məsələdə mövqeyini bəyənməsəm də, millət vəkillərinin tutduğu mövqe çox xoşuma gəldi. O ki qaldı İran dövlətinə, özünü İslam dövləti  hesab edənlərin Ermənistana yardım etməsi heç bir məntiqə sığmır. Biz partiya olaraq, İranı İslam dövləti yox, anti-islam dövləti  hesab edirik.

- Son olaraq  Mirmahmud ağa qəzetimiz vasitəsilə oxuculara  nə demək istərdi?  

- “Azad Qarabağ” adı ilə sizə Bakıda çox az ömür arzu edirəm. Arzu edirəm ki, qəzetiniz azad edəcəyimiz Qarabağda nəşr olunsun. Oxuculara isə üzümü tutub deyirəm: Bu gün Azərbaycanın həqiqi mənada vətən daşı ola bilən vətəndaşlara çox  böyük ehtiyacı var. Gəlin Azərbaycanda vətəndaş qıtlığı problemini bir yerdə həll edək ki, vətənin hər daşı vətəndaşlarımız tərəfindən sevilsin.

               Manaf Kərimli

Atəşkəs döyüşləri

Az.İnfo.Büro:

Martın 29-da Ermənistan Silahlı Qüvvələrinin növbəti dəfə atəşkəsi pozması nəticəsində Tovuz rayonunun Əlibəyli kəndində  ordumuzun bir əsgəri- 2005-ci ildə Sumqayıt şəhər Hərbi Komissarlığından hərbi xidmətə çağırılmış, 1983-cü il təvəllüdlü  Əliyev Fərid Rəhim oğlu aldığı snayper gülləsindən şəhid olub.

 Martın 29-da saat 19.40-dan19.55-dək
Ermənistan Silahlı Qüvvələrinin bölmələri  Noyamberyan rayonunun Barekamavan kəndinin 2,3 kilometr şərqindəki mövqelərindən Azərbaycan Silahlı Qüvvələrinin Qazax rayonu ərazisindəki adsız yüksəklikdə yerləşən mövqelərini avtomat və pulemyotlardan atəşə tutub.  Düşmən cavab atəşi ilə susdurulub,  itki yoxdur.

 Martın 30-da Ermənistan Silahlı Qüvvələrinin bölmələri  saat 13. 40-dan 13.50-dək Tovuz rayonunun Hacı Həsənli kəndinin 2.2 kilometr qərbindəki işğal olunmuş adsız yüksəklikdə yerləşən mövqelərindən Azərbaycan Silahlı Qüvvələrinin üzbəüz mövqelərini avtomat və pulemyotdan atəşə tutublar.

 Martın 31-də saat 13.25-də Ermənistan Silahlı Qüvvələrinin bölmələri işğal altında olan Fizuli rayonunun Əbdürrəhmanlı kəndindən Azərbaycan Ordusunun üzbəüz mövqelərini atəşə tutublar. Cavab atəşi ilə düşmən susdurulub. İtki yoxdur.

 Aprelin 2-də saat 9.00-da Ermənistan Silahlı Qüvvələrinin bölmələri Fizuli rayonunun Aşağı Əbdürrəhmanlı kəndinin 1.3 kilometr şimalında yerləşən mövqelərindən Azərbaycan Silahlı Qüvvələrinin üzbəüz mövqelərini atıcı silahlardan atəşə tutub. Nəticədə Azərbaycan Silahlı Qüvvələrinin hərbi qulluqçuları- əsgər 1987-ci il təvəllüdlü, 2005-ci ilin aprelində Zaqatala rayon Hərbi Komissarlığından hərbi xidmətə çağırılmış Yaqubov Şaban Məhəmməd oğlu ağır yaralanaraq şəhid olub. Əsgər, 1979-cu il təvəllüdlü, 2005-ci ilin yanvarında Goranboy rayon Hərbi Komissarlığından hərbi xidmətə çağırılmış Şirinov Niyaməddin Əsəd oğlu isə ağır yaralanıb.

 Aprelin 2-də Ermənistan tərəfi atəşkəsi növbəti dəfə pozub. Aldığımız məlumata görə Ermənistan Silahlı Qüvvələrinin bölmələri saat 21.45-də Fizuli rayonunun Aşağı Əbdürrəhmanlı kəndi yaxınlığında yerləşən mövqelərindən Azərbaycan Silahlı Qüvvələrinin üzbəüz mövqelərini, saat 23.05-də  Qazax rayonunun Cəfərli kəndinin yaxınlığında yerləşən mövqelərindən Azərbaycan Silahlı Qüvvələrinin üzbəüz mövqelərini və Cəfərli kəndini atəşə tutub. Həmin gün Ermənistan Silahlı Qüvvələri işğal olunmuş Gülçülük sovxozu və Şıxlar kəndindəki mövqelərindən Ordumuzun üzbəüz mövqelərini, eləcə də rayonun Çıraqlı və Orta Qışlaq kəndlərini səhər saatlarınadək atəşə tutublar. Düşmən cavab atəşi ilə susdurulub. İtki yoxdur.

 Aprelin 3-də saat 17.55-dən 18.00-dək Ermənistan Silahlı Qüvvələrinin bölmələri Berd rayonunun Mosesqex kəndinin 1,7 kilometr cənub şərqində yerləşən mövqelərindən Azərbaycan Silahlı Qüvvələrinin Tovuz rayonu ərazisindəki adsız yüksəkliklərdə yerləşən mövqelərini, saat 21.00-dan 22.00-dək Ağdam rayonunun işğal olunmuş Cəvahirli kəndinin 2,5 kilometr cənub-şərqində yerləşən mövqelərindən Azərbaycan Silahlı Qüvvələrinin Əhmədağalı kəndi yaxınlığında yerləşən mövqelərini atəşə tutub. Cavab atəşi ilə düşmən susdurulub, itki yoxdur.

 Aprelin 4-də saat 14.55-də Ermənistan Silahlı Qüvvələrinin bölmələri Noyamberyan rayonunun Voskevan kəndindən Azərbaycan Silahlı Qüvvələrinin Qazax rayonunun Quşçu Ayrım kəndindəki mövqelərini və kəndin özünü avtomat və pulemyotlardan atəşə tutub. Cavab atəşi ilə düşmən susdurulub, itki yoxdur.

 Aprelin 5-də saat 16.30-da Ermənistan ordusunin bölmələri Ağdamın işğal altında olan Gülçülük sovxozu adlanan ərazisindən Azərbaycan Ordusunun üzbəüz mövqelərinə hücum edib.Cavab atəşi ilə qarşı tərəf geri oturdulub. İtki yoxdur.

Aprelin 6-da Ermənistan Silahlı Qüvvələrinin bölmələri Ağdam rayonunun işğal olunmuş Baş Qərvənd kəndindən Azərbaycan silahlı qüvvələrinin Ağdam rayonunun Çıraqlı kəndində yerləşən mövqelərini və kəndin özünü atəşə tutub. Cavab atəşi ilə düşmən susdurulub, itki yoxdur.

 Aprelin 11-də saat 16.20-də Ermənistan Silahlı Qüvvələrinin bölmələri Noyamberyan rayonunun Berdaban kəndindən Azərbaycan Silahlı Qüvvələrinin Qazax rayonundakı mövqelərini, saat 22.05-dən 22-15-dək isə Noyaberyan rayonunun Şavarsavan kəndi, Qazax rayonunun işğal olunmuş Bağanes Ayrım və Aşağı Əskipara kəndləri ərazisindəki mövqelərindən ordumuzun üzbəüz mövqelərini avtomat və pulemyotlardan atəşə tutub. Cavab atəşi ilə düşmən susdurulub, itki yoxdur.

 Topladı: Xəyyam Fəzailoğlu

◄ 1 2 3 4 ... 16 ► ₪