Rəhim Hüseynov:  Erməni terroristləri hansı yolla torpağımıza gəliblərsə,
o yolla da onları qovmaq lazımdır

 Aprelin 5-i "Xəzər" Beynəlxalq Fondunun prezidenti, QAT-ın Ağsaqqallar Şurasının üzvü, ömrünün yarıdan çoxunu çətin və məsuliyyətli vəzifələrdə keçirən, yaşadığı şərəfli ömür yolu Azərbaycanın baş naziri kürsüsündən keçən Rəhim Hüseynovun 70 yaşı tamam oldu. Tanınmış ictimai-siyasi xadim, ağsaqqal Rəhim müəllimlə yubileyi günü görüşüb təbrik etməyi özümüzə borc bilərək, həm də bizi maraqlandıran bəzi məsələlərə münasibətini öyrənmək istədik. Necə deyərlər, "həm ziyarət, həm ticarət".

 - Rəhim müəllim! Sizi 70 illik yubileyiniz münasibəti ilə təbrik edirik. Bu yaşda özünüzü necə hiss edirsiniz? 70 yaşı insan ömrünün hansı çağı adlandırmaq olar?

- Allaha şükür! Hələ ki, özümü pis hiss etmirəm. Məncə, insanın özünü necə hiss etməsi yaşdan asılı deyil. Daim məşğul olduğuma görə yaşın necə keçdiyini hiss etmirəm, o barədə düşünməyə demək olar ki,  vaxtım qalmır. Tale elə gətirib ki, mən lap cavan yaşlarımdan vəzifələrdə çalışmışam. 29 yaşımda məni nazir müavini təyin etdilər. O vaxtlar elə yaşda hər adama böyük vəzifə tapşırmırdılar. Üstündən 8-9 il keçəndən sonra nazir oldum. 15 il nazir işləmişəm. Yəni, demək istəyirəm ki,  cavan yaşlarımdan vəzifədə olduğuma görə məni həmişə sayıblar. İndi də ictimai təşkilatlara rəhbərlik edirəm, bu təşkilatlar hamısı ümumdünya təşkilatlarıdır. Çox ölkələrlə əlaqələrimiz var, işləyirik, başımız qarışır. Amerikada belə bir təşkilat var: Dillərarası, Xalqlararası Beynəlxalq Federasiya. 2000-ci ildə onlar məni "sülh səfiri" seçiblər. Bu Federasiya ancaq sülh məsələləri ilə məşğul olur, yəni, dünya ölkələri arasında konflikt, terror olmasın, xalqlar bir-biri ilə dost olsun. Bugünkü situasiyaya uyğun bir federasiyadır, 180 ölkədə filialı var. Məni keçmiş baş nazir  kimi dəvət ediblər, bu işlə çox məşğulam. Federasiyanın 60 minə yaxın üzvü var. Bu üzvlərdən yalnız 13-14 nəfəri keçmiş baş nazir, keçmiş prezident, parlament sədridir ki, onlardan biri də mənəm. Başım bu işlərə elə qarışıb ki, yaşım tamam yadımdan çıxıb.

- Sizin çətin və şərəfli bir ömür yolunuz olub. Dediyiniz kimi lap gənc yaşlarından vəzifələrdə çalışaraq, baş nazir vəzifəsinə qədər yüksəlmisiniz. İnsan ömrü  səhvlərlə doludur. Belə bir deyim də var, əgər insan yaşayırsa, o, səhv edir. Sizin də özünüzə bağışlaya bilmədiyiniz elə bir səhviniz olubmu? Yaşadığınız ömür bütövlükdə özünüzü qane edirmi?

- Elə bir səhvim yadıma gəlmir. Rəhmətlik Heydər Əliyev bir dəfə məndən şikayət etmişdi. Hələ SSRİ vaxtında ümumi rəhbərimiz Bakıya gəlmişdi və Heydər Əliyev ona şikayətlənib demişdi ki, Rəhim Hüseynov heç kəsi saymır, səhv edir, həmişə bildiyini tutur. Çünki o vaxt bizə nə toya, nə yasa getməyə icazə vermirdilər. Mən isə qohum-əqrəbanın bir toyundan, yasından qalmırdım. Sovet vaxtında Kərbəlaya da, Məşhədə də getmişəm. Bax bu cür "səhvlər"im olub (gülür).

- Vəzifə daşımaq, məsələn, nazir, baş nazir vəzifələri sovet dövründə daha çətin, məsuliyyətli idi, ya indiki müstəqillik dövrümüzdə?

- Mən 1992-ci ilin əvvəllərində baş nazir olmuşam, artıq sovet quruluşu dağılandan sonra. Cəmi bircə gün Mütəllibovla işləmişəm, çünki mənim baş nazir vəzifəsinə təyin edildiyim günün axşamı Mütəllibovu ölkədən qaçırtdılar. İki gündən sonra rəhmətlik Elçibəyin komandası gəldi və onlar məni yenidən baş nazir vəzifəsinə təsdiq etdilər. Bir ilə yaxın Elçibəylə işlədim. Heç kimi vəzifəsindən azad etməyə qoymadım, yaxşı mütəxəssisləri saxladım.

Vəzifə daşımaq sovet dövründə daha məsuliyyətli idi, çünki bilirdin ki, gördüyün işə cavab verməli olacaqsan. Mən 1965-ci ildən 1992-ci ilə qədər ancaq nazir müavini, nazir, baş nazirin müavini, baş nazir vəzifələrində işləmişəm. Sovet dövründə sənə iş tapşırırdılar və o işin bütün məsuliyyəti sənin üzərinə düşürdü, sən cavab verməli olurdun. Əfsuslar olsun ki, bu məsələlər dağılıb getdi. İndi heç kim heç nəyə cavab vermir. Təzə qayda-qanun yaratdılar, indi Prezident Aparatı hökumətə rəhbərlik edir. Prezident Aparatı ancaq siyasi məsələlərlə məşğul olmalıdır. O gündən ki, Prezident Aparatının kiçik vəzifəli işçiləri belə baş nazirə tapşırıqlar verməyə başladı, hər şey dağılıb getdi. Mən elə o gündən baş nazir vəzifəsindən imtina etdim, dedim, mən belə işləyə bilmərəm. Elçibəy məndən əl çəkmirdi, mənimlə işləmək istəyirdi, ancaq razı olmadım. Heydər Əliyev gələndən iki il sonra Prezident Aparatından mənə zəng edib bildirdilər ki, prezident sərəncama qol çəkib sizi işdən azad etdi. Təəccübləndim ki, görəsən nə məsələdir, mən indi ictimai təşkilata rəhbərlik edirəm, bu nə deməkdir? Sən demə, Elçibəy məni özünə müşavir təyin edibmiş, mənimsə bundan xəbərim yox idi, heç gedib-gəlmirdim. Heydər Əliyev də bilirdi ki, mən o vəzifədən imtina etmişəm, odur ki, sərəncama qol çəkib məni azad etmişdi.  Sonradan özü də məni dəvət edib, nə üçün vəzifədə işləmək istəmədiyimlə maraqlandı, istədi yenidən vəzifə tapşırsın. Ancaq mən dedim ki, sərbəst olmasam, işləyə bilmərəm. O da Prezident Aparatına zəng vurub tapşırdı ki, Rəhim Hüseynov "Xəzər" Beynəlxalq Fondunu yaradıb, nə işi olsa, ona kömək  edin. Mənə isə üzünü tutub dedi: tı neispravimıy. Çünki əvvəllər, sovet dövründə biz birlikdə çox işləmişdik, o məni yaxşı tanıyırdı. Bu günə qədər də heç kəs mənim işimə mane olmayıb, mənim xarakterimi yaxşı bilirlər, heç kimin işinə qarışmıram, kim düz danışır, onunlayam.

- Yaşadığınız zaman ərzində, vəzifələrdə olduğunuz illərdə Azərbaycan bir neçə dəfə keçid dövrü yaşayaraq, müxtəlif mərhələlərdən keçib. Azərbaycan dövləti, eləcə də Azərbaycan xalqı üçün həm siyasi, həm də iqtisadi baxımdan ən çətin dövr hansı illər olub?

- Azərbaycan üçün ən çətin illər Qarabağ hadisələri başlayanda başladı. Bundan istifadə edərək respublikada müxtəlif dağıntılar etdilər. İqtisadiyyat da dağılmağa başladı, pespublikanın idarəedici orqanları da cürbəcür səhvlər buraxmağa başladılar. Yəni Qarabağ hadisələri başlayandan sonra idarəetmə işləri bir növ həyata keçirilmədi.

- Qarabağ probleminin həlli yollarını necə görürsünüz?

- Bu haqda mən dəfələrlə çıxış etmişəm. Birinci çıxışım 2001-ci ildə BMT-də oldu. Nyu-Yorkda binalar partladılan zaman qlobal terrorizmlə bağlı ümumdünya konqresi keçirildi. O konqresdə Amerikanın keçmiş dövlət katibi və baş prokuroru da mənim çıxışımı dinləyirdi. Mən orada onlara dedim: 10 ildir siz bizim beynimizi çürüdüb deyirsiniz, Qarabağ məsələsini bu terrorist ermənilərlə sülhlə həll edin, hansı ki, oğurluqla bizim evimizə girib torpaqlarımıza yiyələniblər. Ancaq indi sizin iki binanızı partladıblar, bunun üçün Əfqanıstanı dağıdırsınız, nə var, nə var, Ben Ladeni versinlər. Gedin Ben Ladeni sülhlə alın, daha bunun üçün əfqan xalqını niyə qırırsınız?

Bu problemin həlli yolu odur ki, terrorist hansı yolla torpağımıza gəlib, o yolla da onu qovmaq lazımdır. Sülh yolu ilə bu problem həll olunmayacaq. Özü də bu bizim daxili işimizdir, heç bir ölkə, heç bir beynəlxalq təşkilat gərək buna qarışmasın. Biz öz torpaqlarımızı azad edirik, ancaq  gərək buna konkret imkanımız olsun. Torpaqlarımızı özümüz azad etməsək, bu məsələ unudulub gedəcək. Nə qədər ki, Qarabağdan köçən yaşlı insanların hələ hamısı dünyasını dəyişməyib, bu məsələni həll etmək lazımdır. Cavanlar, uşaqlar Qarabağı unudacaq, sonra ora heç qayıtmaq da istəməyəcəklər.

Mən hələ 1992-ci ildə Amerikada böyük Buşla görüşəndə Qarabağ və ermənilər haqqında bir çox  həqiqətləri faktlarla onun nəzərinə çatdırmışdım. Sən demə, o, bu faktların çoxunu heç bilmirmiş.

Bu məsələnin bu qədər uzanmasının bir səbəbi də heç bir ölkə ilə münasibətləri pozmaq istəməmək, müəyyən iqtisadi əlaqələri saxlamaqdır. Bir sözlə, biz hərbi gücümüzlə erməniləri torpaqlarımızdan çıxarmalıyıq. Bütün ölkələr Qarabağın Azərbaycanın torpağı olduğunu təsdiq edib.

- Bir qədər də rəhbərlik etdiyiniz "Xəzər" Beynəlxalq Fondunun imtiyaz və vəzifələrindən danışmağınızı istərdik.

- "Xəzər" Beynəlxalq Fondu 1994-cü ildə yaranıb və o vaxtdan Milli Akademiyanın alimlərinin, iqtisadiyyatçıların xahiş-təklifi ilə mən bu fonda rəhbərlik edirəm. Fondun işi Xəzər və Xəzəryanı ölkələrlə birlikdə, xüsusən Abşeron yarımadasında ekologiya məsələləri ilə məşğul olmaqdır. Ekologiya və iqtisadiyyatı bir-birindən ayırmaq olmaz, harada ekologiya yoxdursa, orada iqtisadiyyat da yoxdur.

Mən həm də 1990-cı ildən Azərbaycan Alimlər və Mühəndislər İttifaqının sədriyəm. Bu təşkilat, ştabı Moskvada yerləşən mənim vitse-prezident olduğum Beynəlxalq Alimlər-Mühəndislər İttifaqının üzvüdür. Allah qoysa, iyun ayında Sankt-Peterburqda beynəlxalq  təşkilatın 140 illik yubileyinə həsr olunmuş konfrans olacaq və mən də təşkilatın vitse-prezidenti kimi konfransda çıxış edəcəyəm.

1999-cu ildə üçüncü bir təşkilat - Əmtəə Nömrələnməsi Milli Assosiasiyası  yaratmışıq. Bu təşkilat 114 ölkənin daxil olduğu Ümumdünya Federasiyasının üzvüdür. Biz həmin siyahıda 91-ci olduq. Bu gün Azərbaycanın beş mindən artıq məhsulu bütün dünyaya Azərbaycanın öz nömrəsi - 476 ilə gedir.

Haqqında söhbət açdığım bu üç təşkilata rəhbərlik edirəm. Hər üç təşkilat elm, ekologiya, iqtisadiyyat məsələləri ilə məşğuldur. Üçünü birləşdirdikdə bir işi tam görə bilirik.

Nüşabə Səməndər

 Ramil Səfərov vətənə qaytarılmalıdır

 Ramil Səfərovun Hüquqlarını Müdafiə
Komitəsi konkret təkliflərlə çıxış etmişdir:

 Azərbaycan ordusunun zabiti Ramil Səfərovun işi ilə bağlı məhkəmə prosesi sona yaxınlaşır. Heç bir şübhə yoxdur ki, Budapeşt şəhər məhkəməsi Ermənistan hakimiyyətinin və erməni lobbisinin təsiri altındadır və məhkəmə obyektiv, ədalətli qərar qəbul edə bilməyəcəkdir. Bu son məhkəmə prosesində birmənalı şəkildə nümayiş etdirilmişdir. Hakim Andraş Vaskuti Ramil Səfərovu müdafiə edən tərəfin müraciətlərini qeyd-şərtsiz rədd etmiş, obyektiv ekspertiza rəylərini, həmçinin Ramil Səfərovun təhsil aldığı məktəblərin, o cümlədən, Budapeşt təlim mərkəzinin müsbət xasiyyətnamələrini, onun ordu və kurs yoldaşlarının ifadələrini nəzərə almaq istəməmişdir. Bütün bunlar bir daha göstərir ki, Budapeşt şəhər məhkəməsi ermənilər  tərəfindən ələ alınmışdır, ermənilər bu məhkəmənin vasitəsi ilə Ramil Səfərova divan tutmaq istəyirlər.

Ramil Səfərovun hüquqlarını müdafiə komitəsi hesab edir ki, düşmənin məkrli niyyətlərinə yol verməmək üçün  təcili və təsirli tədbirlər həyata keçirilməlidir:

1. Azərbaycan hakimiyyəti aprelin 13-də məhkəmə prosesinin təxirə salınması, məhkəmə heyətinin dəyişdirilməsi üçün konkret addımlar atmalıdır.

2. Azərbaycan Respublikası Milli Məclisinin Macarıstan parlamenti ilə əlaqə qrupu təcili Budapeştə səfər etməli, Macarıstan parlamentində məhkəmə prosesinin müzakirəsinə nail olmalıdır.

3. Dövlət səviyyəsində təşkil olunmaqla, geniş tərkibdə mətbuat qrupu yaradılmalı və təcili olaraq Budapeştə ezam olunmalıdır.

4. Azərbaycanın Macarıstandakı səfirliyi dərhal Macarıstanın müxtəlif dövlət və hüquq-mühafizə orqanları ilə intensiv iş aparılmasına başlamalıdır.

5. Ramil Səfərov haqqında hansı hökmün çıxarılmasından asılı olmayaraq, onun dərhal Azərbaycana ekstradisiya edilməsinə Azərbaycan hakimiyyəti nail olmalıdır. Ona qarşı ediləcək hər hansı terror hərəkətinin məsuliyyəti Macarıstan hakimiyyətinin üzərinə düşəcəkdir. Macarıstan hakimiyyəti bunu başa düşməli və Ramil Səfərovun ekstradisiya edilməsində maraqlı olmalıdır.

◄ 1 ... 4 5 6 ... 16 ► ₪